¹ Lo kene kendana la weshasha wa numa, halange, analengo, nyu kosa mbeya. ² Nyumbeyaka nyate, lo shii yakinyu apagani, nyakayatshike nomboma la dikishi dahateketa, oko wakanyalomboma. ³ Dako dele lambonyote koyango, naka amboteketa lo nyuma ke Zambi, hate: Yeso kele kyoko! ndo ko oto lata: Yeso kele Owandji! naka aha lo nyuma k'ololo. ⁴ Aleko weho efula wa weshasha, koko nyuma ele otoyi; ⁵ Weho efula wa lolombo, koko Owandji wako otoyi; ⁶ Weho efula ya tomu, koko Zambi keko keme kekamba tshee le ato tshee. ⁷ Koko, le oto l'oto enamelo ke nyuma tanemoka lo dihombo d'oto tshee. ⁸ Okone, le one latanelo la nyuma oteketa wa yimba; le okina, oteketa wa mbeya, oko nyuma keko keme; ⁹ Le okina, mbetawo, lo nyuma keko keme; le okina, woshasha wekonywelo, lo nyuma keko keme; ¹⁰ Le okina, woshasha wa menya ahindo; le okina tabiri; le okina, tshunguza tokani; le okina weho w'eteketa; le okina gewuza eteketa. ¹¹ Aleko otoyi wako wa nyuma keme ke tshee akambo, mbahakanya le oto l'oto lo yema lande oko walangande. ¹² Ne da, oko wele demba otoyi ndo asonga efula, ndo oko wele asonga tshee wa lo demba, kanga wele lofulo lawo, waleko lo tonga demba otoyi, okone woho wako welende ndo le Kristo. ¹³ Taleko laa sho tshee, okone, takabatizama lo nyuma keko keme, da tonga demba otoyi, kaanga Yuda, kana, Ngirika, kana ehombo, kana kanga lotsungo, ndo takatongama lo nyuma otoyi. ¹⁴ Okone demba kema la songa otoyi, koko tongama l'asonga efula. ¹⁵ Naka lokolo mbuta: lote lemi kema lonya, lemi kema lo demba, lotoki kema lo demba lote w'osoku? ¹⁶ Ko naka toyi mbuta: lote wa lemi kema soo, lemi kema lo demba, lotoki kema lo demba lote w'osoku? ¹⁷ Naka demba tshee otoyala soo, lende otoyala toyi? naka tshee eki toyi, lende otoyala ohembe? ¹⁸ Keso saa Zambi akakitsha songa la songa lo demba oko wakanalange. ¹⁹ Naka tshee otoyala songa otoyi, lende otoya demba? ²⁰ Keso saa okone aleko asonga efula, ndo demba otoyi. ²¹ Soo hahombe mbutee lonya: lemi kema la lazima laye; kana ote mbute ekolo: lemi la lazima lanyu. ²² Koko dimena efula, asongo wa demba watanemo djekaleka woodu waleko lazima; ²³ Ndo wane watedika wele kema lazima lo demba, taleko lo mbadinga la leemba la kenemo. okone asonga waso wele kema kenemo waleko lo nongola kinemo ke woke, ²⁴ Koko wane wele la kinemo vo kema la lazima. Zambi a akakitsha lo demba lo yoho ya mbisha kinemo djekaleka le kanga la kalihombe, ²⁵ Kele aha okakitanelo hayoyala lo demba, koko asonga wayale popo lo lotomu l'amotshi l'akina. ²⁶ Ndo naka songa otoyi asowa, asonga tshee wasowe lande; naka songa dimotshi ambopata kinemo, asonga tshee wa ngenengene lande. ²⁷ Nyaleko demba da Kristo, ndo nyaleko asonga wande, oto l'oto lo yoho yande. ²⁸ Ndo Zambi akakitsha lo kanisa tondondo Atomami, kehende Ambutshi, kesato tomanyi, kisha wane wele la woshasha w'ahindo, ko wane wele la weshasha wa konola, da saïdiya, da nombola, da teketa eteketa efula. ²⁹ Vo tshee waleko Atomami? vo tshee waleko Ambutshi? vo tshee waleko tomanyi? vo tshee waleko la woshasha w'ahindo? ³⁰ Vo tshee waleko la woshasha wekonelo? vo tshee lo teketa eteketa w'eyoyo? vo tshee gewuzaka? ³¹ Kombola weshasha we dimena. ndo lemi lokina lakokenya mboka koleki dimena.