¹ Nyoyale mifano wami, oko welemi lemi leme le Kristo. ² lambonyotombola lo kene kohonyu lote wami lo saa tshee, ndo woho wayelanyu wadjango wami oko wakamanyosha. ³ Lemi nangaka koko da nyumbeya da Kristo kele owandji woto tshee, pami kele owandji wodimoto, ndo Zambi kele owandji wa Kristo. ⁴ Pami tshee kelomba kana ke tabiri, ote kombama, halenya owandji wande. ⁵ Odimoto tshee, lokongo, lalomba kana la tabiri, ote hwe, halenya owandji wande: aleko oko akanya divo. ⁶ Ne da naka odimoto hakombo ote, ko nde pembola divo. oko aleko soni le odimoto da ndjala la divo pembo kana minya divo, ayakombe. ⁷ Pami hahombe ndjafe ote, lote wa aleko mufano ndo lotombo la Zambi, koko odimoto aleko lo lotombo la pami. ⁸ Okone, pami kotomba oma le odimoto, koko odimoto kekatombe oma le pami; ⁹ Ndo pami kotongma lote wodimoto, koko odimoto akatongama lote wa pami. ¹⁰ Dako dele odimoto, lote wa andjelo, pombaka ladiko d'ote ndjala mufano lowandji layelande. ¹¹ Mala efula, le Owandji, odimoto kema naka aha pami, kana pami aha odimoto. ¹² Ne da, yoho yako yele odimoto akatombe oma le pami, yoho yako pami aleko oma le odimoto, ndo tshee ndjakaka oma le Zambi. ¹³ Nyolombosha nyu nyame: aleko dimena dodimoto nomba Zambi aha diha ote? ¹⁴ Andja vame hanyofundisha da aleko soni le pami mboda divo detale, ¹⁵ Koko aleko lotombo le odimoto da ndjala la divo detale, lote divo dakashama oko ekombo? ¹⁶ Naka oto omotshi la yashita da manya, sho kema la donga, aho da ndeka kanisa ya Zambi. ¹⁷ Lo mbisha nye yambalo, kene kehamatombola, lo kene ke homananyu, aha da monga dimena, koko da ndeka djekaleka koolo. ¹⁸ Ndo tondo, lakoke one, lo saa kekotshanyu lo losanganya, koleko lateyi wanyu datanelo, - ndo lemi mbetawoka yema tshiki, ¹⁹ Ne da paka koyadi lokina totshimbotshimbo lasanyu, kele wane wakeni weye oko okone lateyi wanyu. - ²⁰ Lo saa kokone konyokotsha, aha lote wa nde deshi d'Owandji; ²¹ Ne da, lo saa ketawo nde lo mesa, oto loto tateka mbosa deshi dande ndame, ndo omotshi aleko la ndjala, koko okina aleko lolevi. ²² Nyu kema la vudu da nyunde ndo noo? kana nyumonyolaka kanisa ke Zambi, ndo nyutsheka soni le wane wele la koyanga? omonyoye? lakonyotombola? hamotombola poo. ²³ Ne da lakalongola le Owandji kene kekamanyofundisha; kene kele Owandji Yeso, lotsho wone wakawotowe, akoshi okate, ²⁴ Ndo, kisha tshokola, akate, ndo akate: one lele demba dami, dambohakanyema lote wanyu; nyotshee okone lo mboho yami. ²⁵ Yoho yako yame, kisha ndende la dikolo, akoshi kikombe, ndo akate: kene keleko daka doyoyo lo dikila dami; nyotshe okone lo mboho yami lo mala tshee ko nyonokaka. ²⁶ Ne da mala tshee konyonokaka one okatek ndo kene kikombe, kanyoteketake nyoyi k'Owandji, polo ndolondoya. ²⁷ Dako dele kanga lole okate kana noo kikombe k'Owandji aha lananga, akolombola lo demba ndo lo dikila d'Owandji. ²⁸ Oto loto okone ayaewoya ndame, ndo okone ale okate ndo noo kikombe; ²⁹ Ne da one lale ndo noo aha kaniya demba d'Owandji, londe ndo no kilombo kende ndame. ³⁰ Lote wako kele lateyi wanyu efula kehodu ndo ase hemo, ndo leemba wakavu. ³¹ Naka sho shwame ndjalombosha, hatolomboshama. ³² Koko lo saa kotolomboshama, takotolama le Owandji, kele hatoyohukumiwa la duniya. ³³ Okone, analengo, lo saa kehomananyu lo deshi, nyokongani amotshi lakina. ³⁴ Naka oto omotshi aleko la ndjala, ale lekande, kele hanyoyohomana da ndjosa kilombo lenyu. lakolongosola akambo akina lo saa komokoma.