¹ Impa belami nde teisila la lebeala Yeso, bena djedeje ankindi na Mokonga teisila la Mokama nde masu Yeso Kilisito. ² Angae beoni ahe la lebeala Yeso kidilila lokoo nde meli aunde; na bedjema angao boketela nde benee asuba bouma nda Mokonga. ³ Impa inda ande bende, che bedjemi asuba noba li neyu, na beubha sinde nobali abhisa meema akpe. ⁴ Na meema nda kpe abhisa singana asuba diya, na singanali abhisa booketela. ⁵ Che, booketela indanga dhema neede angaa ekondi nda Mokonga atumi asuba meema teisila la meema idha bhuu inde ai basomoi. ⁶ Angaa, mbeno nde bei beiki amakanga kala, Kilisito andambi ndo, aku angaa besu nde badjede. ⁷ Angaa atidi anga nto kuala angaa nto la domi: che atoani yeli kengeala kua angaa into manja. ⁸ Che Mokonga ahangiana ekondi ndae angasu mbeno nde bei na beha bato badjede, Kilisito aya ku angaa besu. ⁹ Impa domi kpee, ndiende belami teisila nsangi, beuma belama ngaa teisila ye toala boetani. ¹⁰ Anga sinde, mbeno nde bei nde banongo, bai basotulanisi na Mokonga teisila la kua la Nae, impa go kpee, basotulanisi, beuma belama angebea. ¹¹ Impa amakanga indo bosa, che impa bebhebhe suba Mokonga nde masu Yeso Kilisito, teisila la Yeso beiki asuba tulana na Mokonga. ¹² Angaa indo, sinde bodjedeli angine na leenga angaa into moti, na toala bodjede kua, impa na indo kuali ai ekidii batoli bodjede. ¹³ Anga kidala nkani bodjede ai na leengo onio. Che, bodjede inda ndungo into, mbeno nde nkani inda be. ¹⁴ Che kuali ai ame toala Adamu kidala anga Mosa, na anga bande ndai bakoli bodjede sinde ai akoli Adamu, imbe ande elime lime aimbe auma abhia. ¹⁵ Impa boembo a lokoo indai sinda bodjede ndo. Angaa teisila la bodjede inda into moti bato bangaya aibaku, impa kpee lokoo nda Mokonga, na boembo teisila la lokoo inda into moti, Yeso Kilisito, lokoo-li akidi anga bato batii! ¹⁶ Impa anga noto nde moti imbe ayi akoli bodjede, inda akidi a boembo nde; angaa ekale ayi abhia toala anga into moti abai abhia na ekale akpee, che boembo a lokoo nda Mokonga ai akidi angaa bhiala dongoa bodjede atii, abai akidisa lama. ¹⁷ Angaa sinde toala bodjede inda nto moti kua ai aekumbi bato batii angaa nto moti, impa kpee bande bapata lokoo na boembo a lama auma baika asuba onea la meyo na meyo teisila la Yeso Kilisito. ¹⁸ Angaa indo sindelinde toala bodjede moti bato bobhu bangi ayonga akpee; na ibo a mobili a moti a domi, batoli bobhuu balami na hana bala beli. ¹⁹ Impa angaa bodjede inda nto moti bato bati baangi asuba bodjede, na asikisa inda nto moti, bato batii bangi asuba lama ²⁰ Impa salia-li ai angi, angaa bodjede adje atii kpee; che mpuo nde bodjede adji atii, lokoo li aba djuluana. ²¹ Angaama, bodjedeli ai ame tesila la kukuali, na sindelindo lokooli ame teisila la domi anga ngebe'a meyo, teisila Yeso Kilisito Mokama nde masu