¹ M'pa atoleli besu bande bena ekanda behumise bande nnda banee, na nnda toleli bokenea besu nganga. ² Mmbe moti anga besu anjemise dhae na sunjilana lae ngebe. ³ Ngama Kilisito nnda ya ekenei ye nganga; che biande basaei nee: Boota nde bagesi angao amogu a nyenye. ⁴ M'pa bhulibhu nde aye meno basai a hana lasu, ngaa besungile a bondela, na a lilisana ne Nsao-li agabha, bebe na booketela. ⁵ Mokonga mmbe aaosokandisa na lilia lasu anohe maako ndo bimoti anga batoo asuba Yeso Kilisito, ⁶ ngaa benu bobhu, bobe na yonga imoti a bhebha la Mokonga Abha Mokama nde masu Yeso Kilisito. ⁷ Boseseane tondo benu sinde nde Kilisito aino sesei ne, ngaa ebhebho'a Mokonga. ⁸ Neyongi, angeli ndo, Kilisito aya adji mokobe la bande bagu ganja, nga domi nde Mokonga aya beeli anga baebha akolekane madomi-domi. ⁹ Kesi bakobe-li ba-bhebha Mokonga nga lokoo ndae, biande basai-ne: Angise ama neobhebha ameeme a bato, Na ama nelebha a ebhebho'a inao. Na bayongi go: ¹⁰ Leengo na bato-li bae, banjange! ¹¹ Asago: Bonsime Mokama, benu ba leengo-li bhuu, Bonsime benu, bato-li bhuu. ¹² Isaya na iye ayongi: Auma ahobela anga Yese, Mmbe amasondolisa bato-li, maha-la bato-li bobhu ama aikila nde angae. ¹³ Mokonga mmbe begesi maha-li angae anodegelege na bodjeme na bokolo-li bhuu asuba lebea, bolende asuba boosobela a ekonda nda Meema nd'Abhu. ¹⁴ Asuba-mi nelebei domi-domi badhami, biande botumilili na bonja, na boubha bhuu, asago angabotoisa hanana. ¹⁵ Che, aindo, neeno saei na bolundu, bia djudjusa la mako lanu, nga lokoo nde Mokonga agesi angami. ¹⁶ nebe mokobe mmbe ma Yeso Kilisito angala bakoli bodjede, nedje mokobe la tabhisa la mbino aanja la Mokonga, nga bande nnda banebei babe egabhi a lomoo, nde abhumani na Meema d'Abhu. ¹⁷ Nena inde angise neebhebhele asuba Kilisito Yeso ainde a nengeleli Mokonga. ¹⁸ Nnda nga nekengeisa yonga, che a mobili nde Kilisito amokolela, nga bande baleengo batoe sikisa a yonga na a bikoli. ¹⁹ A ekanda la betekoteko, a ekanda nda Meema Mokonga, biande toa la Yelusalema na leengo nde abhibhi-lae tii Ilylia, ne kidisi ngima na weli mbino anja nda Kilisito. ²⁰ Na nga indo, nekengeisi tomia la mbino anja la Kilisito, nnda ga nde a leengo nde nnda-i bamubha nga, nehia-i antata inde ntoo a koli bia nde ai basaei ne. ²¹ Bande baengode-i mbe meno yonga ndae, amabaona, Na bande baoko mbe meno ama baubha. ²² Indo yeu angise nndaki nebhia sea nde bonee. ²³ M'pa, nndaye go be indeamalingisigi ioni, na aye ateisi elii ati amanesunjilile gaa sea nde bonee. ²⁴ Neakate neeno lenga a teisa mbeno nde ne sisana-le Uesipania, na ankindi na benu tambusa kutisa la mako lami a ika la n'oongo nu. ²⁵ Mbeno-mbeno nde ani negoe Yelusalema nga mobili nda babhu. ²⁶ Nga Makedonia na Acha basudjili t bakongolise ngaa bayene angala babhu bande ba Yelusalema. ²⁷ Basunjilili domi, na ainga bakola; nga bande bakola bodjede bai na motambola, atoleli aba baedhadisa asuba ema nde ateisa. ²⁸ Mbeno nde negoba-le mboa nde na sisa la boembo, auma nega Uesipania nyenela la noongo-nu. ²⁹ Neubha biande gaa sea nde bonee ande ama Kilisito agesi sulia angami. ³⁰ Nenongodea, badhami, a teisila la Mokama nde masu Yeso Kilisitone a ekondi a Meema, manisa ankindi na eme, mema la Mokonga ngaami, ³¹ nga netoe anjaga bachochoki-li ba Yudea, na boembo nde ne kumbi a Yelusalema abe aanja a iso;a bato babhu, ³² Nekida sea bonee na bodjeme, abe Mokonga asunjili na nesulie a meeme anu na yombia. ³³ Mokonga amena bokolo abe na benu bobhu! Abebo!