¹ Mwesi o waahumbwa sambo wango wadjaki la teni sambo, adjaali akpomesanali la mbai ate, ''Djaka iyoenese esambeselo e moli o ndumba, ongo oyabati likolo la malia masungu, ² ongo makumu ma mbume wakelali la inde ondumba, koto wato wa mbume wakengeli la inde bino e ondumba wonde.'' ³ Akpalia mbai la okulu e elimo la lisobe, imoenia moli ayabati likolo la mbau mbe e langi etanake enge etumi la nkombo e wiliko. Edjei la mito sambo la ndjeka liomu. ⁴ Moli oho akpalali esindje etanake-boloo koto etanake ngbaa, ayawongeli wenge la wihoo wa wolo, la mabukeli e motio, la wangbengbe. Aikali la wo ende teni e wolo, etumi la sambo mbe djinge dja ondumba wonde. ⁵ La mbanda ende nkombo, edhingani ndjo: ''Babilona mosungu, nango o wali wa ndumba la sambo mbe djinge dja mbume.'' ⁶ Imwenia ongo moli alangoia makila ma wasantu la makila ma watotoli wa Yesu. Ango emoenia mbai, okamwi wosungu egbotoli mbai. ⁷ Ahumbwa andjaselia mbai ndjo, ''Nde ekokamwaka owe? Ikoewesa sekele e moli koto e mbau mbe enge emokpali, ongo odjei la mito sambo la ndjeka liomu. ⁸ Mbau mbe enge eeni owe edjaki, ase eti kine, inga te ndjongo etikali makeke epumbe la liwela lilindake, ekoke ongo la obitesani. Ango ekoene iwo ndenge mbau mbe enge edjaki ase eti kine, inga te ndjongo ekodja, wato wango wayabati la mbume wakokamwa la mwemu, ase kombo djau idhingani la buku keke e mokalo tee la lipoteli e moki. ⁹ Mine ahala ewongi odjei la kandela enge eboliani la lokenge. Mito sambo mienesi nda mikoli sambo, djinge iyabati moli. ¹⁰ Edjei koto la makumu sambo: Watano wakwi, mwesi adjei, ongo odji adjaki yo, ango ekodja inde, atiumwa. ¹¹ Mbau mbe enge edjali, enge etikine, eho amene edjei likumu o mwambi. Ase elongoi la iwo sambo, koto ekokeeke la obitesani. ¹² Ndjeka liomu djinge ieneli owe einyei makumu liomu, wango watotakiyo okumu, ase wakondjiga okulu wadje makumu la engele eesi mongindji la mbau mbe enge. ¹³ Iwo kpaa wadjei la lomungo lokikima, eho lenge wakohaka mbau mbe okulu koto okumu wou. ¹⁴ Wakosana wita la Mana o meme, mana omeme akowalonga, ongo edjei inde Eloko e wiloko, Likumu la makumu-wato wango wawelani koto waononi koto wango wadjei meemene wakolonga mongindji la inde.'' ¹⁵ Ahumbwa aasia la mbai, ''Malia mango maeneli owe, mango mayabati moli o ndumba, mainei wato, miki, minoko. ¹⁶ Ndjeka liomu djinge ieni owe la mbau mbe, wakomotona moli oho o ndumba, wakomolongosa wisindje, wakomotika lingbengbele, wakolaka ndjini ndjande, wakomolongosa koto la misa. ¹⁷ La ebili ate Mwengei abatiga la mitema mau waengese mamungo mande, la oengesi mamungwene mau amene ehake mbau mbe okumu wou, tee engele wingbundu wa Mwengei wikoengesana. ¹⁸ Moli ongo omoeneli owe, edjei gbata lisungu enge edjei la okumu likolo e makumu ma mbume.''