¹ Mbuse e sambo djaho, imoenia ahumbwa odji alongoi ongo likolo. Akoyadjimbaka la okumu wosungu, mbume engalali la otwa wonde. ² Apamali la moli motetelake ate, '' Akwia, akwia, Babilona mosungu! eumia eyabatelo e milimo mbe, koto ebete ekwabataka milimo kpaa minge mbe, ebete ekwabataka mbulu kpaa ndjinge mbe, koto nama kpaa itonani. ³ Laate miki kpaa wakokengaka bino ende e ondumba, makumu ma mbume miyalumbia ongo ndondo e ondumba wonde, wato wagumake wa mbume wayagumesia la okulu e ogumake wonde.'' ⁴ Iokia moli modji ongo likolo moasia ate, ''Pumbani ndondo ende, wato wa mbai, laate otilingeleni ongo ndondo e masumu mande, otiyawaneseni koto la odjidji wonde. ⁵ Laate masumu mande makaumiga tee ndji ongo likolo koto Mwengei asumboiya obe wonde. ⁶ Moputani ndenge kikima nda eputiaka inde, mowongweselani mbala iwale la oengani la tomo djande. La teni enge esuiyaka inde mosuelani mbala iwale. ⁷ Ndenge eyaganali inde koto eyabatali inde la ngbii e wihoo wamotio enge etidjakali inde ookeli soni, mohani koto nongo e ndenge eho. La motema monde akoasaka ndji ate, ''Idjei likumu, iti moli ongo ogueli molome, itiene koto odjidji te ma keke,' ⁸ La ndenge eho, la lisio likikima, odjidji wonde ekouma, logo, la magba, la ndjala, akolongola la misa ngoo laate Likumu Mwengei ongo omosambesi, ateteli.'' ⁹ Makumu kpaa ma mbume, wango wayalumbali la inde ebete ekikima la ondumba wonde la ogumake wonde, wakoswa poo wakoyasumbwa la kole ende, ange ekoene iwo milungu ma obitesani wonde. ¹⁰ Wakoyamala lihehe la owangi odjidji wonde, wakoasa ate, ''Magba, magba, Babilona mosungu, moki mo okulu! La engele ekikima e sambeselo e owe eumia. ¹¹ Wato wa ogumake wa mbume wakoumesa poo la kole ende, laate moto te mokikima atisomba kine wihoo wau- ¹² Wihoo winge wa wolo, wa palata, mabukeli mango ma motio, e maayaka, la lini ewongake, la wisindje tanake ngbaa, la wihoo kpaa winge winge wikelani la pembe e mbongo, la wiho paa wikelani la mabaya e lumba ndamu, e motako e wibende koto e malabe, ¹³ la kinamoni, la amomo, la paka e malasi, la maita e lumba ndamu, la maita ma olibe la mteke ndamu, la ndongo, la nama, la wameme, la wapunda, la makalo, la tuke, la milimo ma wato. ¹⁴ Pukapuka djinge ibaliaka molimo mo owe ikia lihele la owe, wihoo winge wilamu koto wihoo wa owe wingengake ebitania, watiene koto eho alidji. ¹⁵ Wato wa mombongo e winge wihoo, wango wayagumesali lai nde, wakwamala lihele, la owangi odjidji wonde, wakopumbesa poo wakodja koto la oleli wo logo. ¹⁶ Wakoasa, ''Magba, magba! moki mosungu mungo mokpaliaka wisindje wamondjele alingamiaka la wolo, la mabukeli ma motio, la engele ekikima likondja lande kpaa libitisania! ¹⁷ Wato kpaa wango wakosombelaka la enge ebete ndjongo, la wato wango wakosombaka la andondoli la wasombesi wa andondoli, wakoyamala lihele.'' ¹⁸ Wahumbali pui, ango eenia iwo milungu ma odjidji wonde. Waasali ate, '' Nda gbata eengani la ehele gbata esungu? ¹⁹ Waswakali limungele la mito mau, walelakali wadjakali la magba, wahumbakali pui ndjo: Magba! magba! gbata esungu ebete eyagumesali wato kpaa wango wadjei la wihoo winge wikosombaka la ewale, la engele ekikima abitesania.'' ²⁰ Likolo emela la kole ende, la ino koto wasantu, wa toma, la watiesakoli, ino koto emeleni! laate Mwengei aokeleliani oyengebene ango emosambesi inde.'' ²¹ Aseko ahumbwa mwesi atotia libukeli enge ekuani la enge ekonuelaka eho pukapuka alilumbia la ewale, asia ndjo, ''Ndjo nde ekolumbana Babilona, gbata esungu la mbala kikima, atienene kine alidji. ²² Watioka kine atie owe etale ewango wakobingaka kidale, la wango wakobingaka ndundu, la wango wakelelo, la wango wakotulaka, waigboto kine atie owe etali enuake pukapuka. ²³ Ngbai e lotambe etingala kine atie owe, moli mo molome o liwala te mo moli o liwala motiokana kine atie owe, laate wango watambesakali wihoo wo owe wadjakali wato wango waewanake la mbume, la ebili ende miki kpaa midjimbisamiaka la owe. ²⁴ La ebili ende yainde waeniaka makila ma watiesakoli la mawasantu ma wato kpàa wango wa wateniaka iwo kingo ahala la mbume.''