¹ Wayamalia iwo kpaa wakia la Yesu ongo edjei Pilato. ² Wabandali omokambi waasali ate : tomogboti oholo moto ndjo akwasaka la wato ate watindjime mibeko ma Moize, alidji watipute mamelo e Sezale, akwasaka alidji la wato ate inde adjei kilisito, likumu. ³ Pilato amohuelia : owe nde likumu la wayuda? e edjei mabi, owasiga koto. ⁴ Pilato asia la makumu ma wanganga Mwengei, la wato kpaa wadjaki ango: iyeniti loi ungo okeli oholo moto. ⁵ Kasi wamwamalelia waasia ate : akowatomaka wato la oya maleli mateya ma Moize obandi la yudea, galilea tee alandjo. ⁶ Ango eokia pilato ndjongo, ahuelia inga inde adjei moto o galilea; ⁷ Ango eokia inde ate adjei moto o sese e okumu e Elode, amotomia ongo edjei Elode, laate mango masio Elode adjakali la Yelusalema. ⁸ Ango Elode amwenyia Yesu, aemelali laate tee la gala adjali la posa e omweni la djinge sambo edjakali inde ooki, adjakali omolambeli ate amokelele ma ema ekamwesake. ⁹ amohuelia poopoo ngbi, kasi Yesu atiwongolali loyi te okikima. ¹⁰ Makumu ma wanganga Mwengei la watiesakoli wa mibeko wango wadjakali ango, wadjali omokambi la sambo mbe mbe. ¹¹ Elode la sindjili djande wadjakali omokeli sambo mbe, la omoseki. Mbuse e omokpalesi esindje etanake, wamowongosia Yesu etie Pilato. ¹² Ndji ungo use, Pilato iwo la Elode waumali wa bola, iwo wato wango watonanali iwo wale mbuse e mbula ngbi. ¹³ Pilato awaboliali makumu ma wanganga Mwengei, la watiesakoli wa mibeko, la wato; awaaselia: ¹⁴ Ino odjelelini mbai oholo moto, owasiani ate akowatomaka wato ate wamalele mibeko ma Moize, kasi imohueli liwoso lanu, mpe itimoene la likambo te likikima e sambo djinge emokambini ino. ¹⁵ Te ongo kine etie Elode, laate atowongwesi, dhenda oholo moto atikele ema enge ekoki la inde la logo. ¹⁶ Kasi mbai ikomopumbesa la boloko mbuse e omobingi pimbo ¹⁷ Yenga kpaa edjali mobeko ate wapumbesake moto mwesi la boloko ate wamoole. ¹⁸ Iwo kpaa wahumbali pui: moolesa Yesu, todheela Balanabasi. ¹⁹ Balanabasi alingelate la boloko la loyi e olake wato la djeti sambo mbe mbe. ²⁰ Pilato aasia alidji la iwo laate amodhe Yesu. ²¹ Iwo kpaa wapamia la moli motetelake, wasia: agbe, agbe la ekulusu ²² Pilato awaselia, mbala esato : nda obe okelinde? iyeniti loi ungo oki inde ogbi, ikomodhe mbuse e omobingisi pimbo. ²³ Kasi wapamia la moli motetelake ate agbe, opami owu obolianali la enge e makumu ma wanganga Mwengei. ²⁴ Pilato andjimia owahi enge e ongi iwo. ²⁵ Amopumbesia moto ongo odjakali la boloko la sambo mbe mbe,mooli o wato; awahekelia Yesu la posa ewu. ²⁶ Ango odjaki iwo oki la inde, la mboka, wagbotonia la Simona mo Silene, adjakali owongoyi la ilanga, wamokpalesia ekulusu, late amoikele Yesu ongo mbuse. ²⁷ Edjakali la wato ngbi wango wadjakali omobileyi, wali wadjali oyabingi mikpoto, la ooki magba la tina ende. ²⁸ Yesu ayakukolia asia la wango wali ate: wali wa yelusalema, otileleni la tina e mbai, lelani la tina enu amene la wana wanu. ²⁹ Late la masiyo mango mageleli wakwasa ate : mwemu la wali wango wikomba, mwemu la wali wati la wana, la wango watinungisaka. ³⁰ Wakoyabata oasi la mokoli ate : tokpele, alidji la milindalinda, todhiha! ³¹ Inga wakela dji sambo la mote mowesu, ekodja woni la mote moomake? ³² Wadjakali pe oki la wato wale wango watingakali la iwo laate wawabake ebete ekikima la Yesu la ekulusu. ³³ Ango eumia iwo la enge ebete eweli iwo ate mikwa ma moto wamobakia Yesu la ekulusu ebete ekikima la djinge iwa, mwesi la ewo e lilome odji la ewo e liali. ³⁴ Yesu asali: wawa walimbesa, la loyi wayewiti ema enge ekokelaka iwo. ³⁵ Wato wayamalali lihele wakowadhenda. Watiesakoli wa mibeko, la wango wadjakali ango, wadjakali omoseki Yesu, la oasi ate: awakalesali weeti wato; ayakalese inde amene inga adjei Masiya ongo owononi la Mwengei! ³⁶ Wasodha koto wamosekekeli, wakia ahue ende, wamohiya mana magagake. ³⁷ Wasia la inde ate: inga odjei likumu la wayuda, yakalesa yo owe amene! ³⁸ Edjakali likolo lande madhingo mango madhingali iwo : oholo adjei likumu la wayuda. ³⁹ Moto moesi ongo omobakali iwo la ekulusu ebete ekikima la yesu, amotangia asia ate : te owe nde kilisito? yakalesa yo owe amene, mbuse otokalese! ⁴⁰ Ongo eti amowongoselia : owe otimowangaka Mwengei? iso kpa todjei la odjidji okikima. ⁴¹ Laiso, ekoki ate togbe la loyi tokelali obhe, kasi inde akeliti loyi te lokikima. ⁴² Asia la Yesu: mungolaka mbai ango ekodja owe la okumu wowe. ⁴³ Yesu amowongoselia : iyowaseli meemene ndji keke ehele okodja la mbai ebete ekikima la Paladizo ⁴⁴ Edjakali ango la engele e motoba likolo lilingelia la moki kpa tee la engele e libwa. ⁴⁵ Moi molimanali, esindje e Tepelo esalanali la odja. ⁴⁶ Yesu apamia la moli motetelake aasia: wawa iwongosi molimo mo mbai la mawo ma owe. ⁴⁷ Ango enia sindjili ndjongo, wamodemeiya Mwengei, waasia: oholo moto adjaali sembo. ⁴⁸ Wato kpaa wango wadjakali ango mbuse e oeni djinge sambo, wawongoyia wakoyabinga mokpoto. ⁴⁹ Wango wato kpa wamoewakali Yesu mpe la wali wango walongwali, lainde tee la Galileya, wayamalali maa lihele, wakodhendaka djinge sambo edjakali oyeti. ⁵⁰ Edjakali la moto mwesi ndondo e wahi simbisi, moto osambo ndamu, kombo e inde Edjepu. ⁵¹ Inde atiyawanesali la mungo mobeko, la djinge sambo, adjali moto o moki mo Alimateyo, liwange la wayuda, inde adjaali olambeli okumu wo Mwengei. ⁵² Akeli ogbotoni la Pilato, aongia wenge wa Yesu. ⁵³ AmodjimBali la ekulusu, alingali eho la bolangiti, akeli omolangesi a mbila enge ekelami ndondo e mabhukeli, enge watimolangesaliyo moto tueti. ⁵⁴ Edjakali use elengelake sabata ⁵⁵ wali wango walongwali la Yesu tee la galileya wakia la Edjepu ebete ekikima la omokundji Yesu. ⁵⁶ Ango ewongoyia iwo, wawongelia malasi. Lisiyo e sabata wahomali la ndenge edhingani la mobeko.