¹ Lipati la mapa linge lindjangi okundji, linge liweli iwo ate Pasika, liumali ahue. ² Wiloko wato wawa nganga Mwengéi la walimo wa pui wadjakali oluki ndenge eomoli Yesu, alikambo wadjaki owa wangi wato. ³ Ndjongo Satana alingelia la motema mo Yuda ongo omoweli iwo ate Kaliota, mwesi o watutiani wande liomu la wale. ⁴ Yuda akia okpomesani la wiloko wato wa wanganga Mwengéi ase la wiloko wato wa wamaleli monguta mo Mwengéi nda ndenge ekomokawa inde Yesu la mawo mawu. ⁵ Waumali la mwemu ase wamowunelia omohi wadjenge. ⁶ Yuda andimia, ase apotia oluki engele elamu e omokawi Yesu la mawo mawu, ndjongo wato ngbii watiewete. ⁷ Lisio e mapa edjangi okundi, use oho edjakali iwo ooli kondolo e pasika ewumali. ⁸ Ndjongo Yesu amotomia Petele la Yoani, awaselia kekeni okawongeli wilaka wa lipati la Pasika alikambo lasu. ⁹ Wamohuelia: obali ate tokawongele eni? ¹⁰ Inde awaselia okani! ango okolingela ino la gbata, okogbotononi la moto akpali molugu mo malia. Motutiani ebete enge ekolingela inde. ¹¹ Ase asani la memene monguta, mwalimo akohuelaka ate esuki e monguta edjéi eni ebete ekolaka iso wilaka wa lipati la Pasika ebete eikima la watutiani wa mbai? ¹² Inde akowoiniani ebete esungu la monguta mo likolo, ongonde ekowongelani ino wilaka wa pasika. ¹³ Wakia, ase wagbotia sambo kpàa nda ewaaselali Yesu ase wawongelia wilaka wa lipati la pasika. ¹⁴ Ango eengali engele, Yesu aabatia la mesa ebete kikima la watutiani wande. ¹⁵ Inde awaselia: ibalaki ngbii olaki wilaka wa Pasika ehele mongindi la ino liwoso la mbai woeni wodjidji! ¹⁶ Laate, iyowaselini, itilakakine tee ekoengene eho la okumu o Mwengei. ¹⁷ Ndjongo atotia etotu, a moongia Mwengéi ase asia: totani ehele etutu kawanani ndondo enu. ¹⁸ Alikambo, iyowaselini sikahala itokenga kine Vino alidi te wokoke tee ndjiango wuse wokodja wokumu wo Mwengei. ¹⁹ Mbuse eho, atotia mapa, mbuse eakongi la Mwengei abukia awahekelia aasia: ehele edjei wenge wa mbai ikokawa la likambo lanu; kelakanindjo la omungoi mbai. ²⁰ Mbuse e olaki atotia etutu awahekelia aasia: kopo ehele edjéi wuuma woholi wo Mwengéi ehele edjéi makila ma mbai mango makosuakana alikambo lanu. ²¹ Ase dengani moto okawi mbai atie wanguna adjéi la mbai mongindji ahala la mesa! ²² Meemene, mana o moto akoke nda ndenge etenanate, ase maga la moto ongo omokawi ²³ Wapotia ohuelani ndondo ewu, ndai opoti oluki okeli lungo loyi. ²⁴ Watutiani wapotia okokiani makasi, alikambo la oyewi nda moto ndondo ewu odjéi moto mosungu oleki. ²⁵ Yesu awaselia: makumu ma miki wakokondjaka wato wawu, la wango wakoyinyaka okulu, wawelami wakeli wa lamu. ²⁶ Enge etidje ndjongo etie ino. Ase moto ongo odjéi mosungu oleki ndondo enu ewongi adje nda mana, ewongi moto ongo okohaka mitinda adje nda moto owotomu! ²⁷ Ndai odjéi mosungu oleki, moto owabati la mesa inga moto owotomu? moto owabati la mesa, te ndjongo? wolamu! mbai idjéi ndondo enu nda moto owotomu. ²⁸ Ino wabatigani la mbai mongindji engele elai ndondo ewomekami wo mbai. ²⁹ Ndji ndjongo nda ehekeli wawa mbai wokumu, mbai pe iyohekelini ino. ³⁰ Okolakani alidji okengani la mesa ma mbai ndondo e wokumu wo mbai, okoabatani likolo la ngbelengo dja wokumu alikambo la oteni loi la wiati liomu la wiale wa Isalaele. ³¹ Likumu Yesu, asia Simoni, Simoni oka! Mondjili aongiga owohehi owe nda ekoheheke wato wahehe pukapuka alikambo la odjikawi djaho la wisoki mpamba. ³² Ase iyakongi alikambo la owe ndjongo wondjimi woowe wotilembe; ango ekowongwa owe, waha wamangua woteteli. ³³ Petele asia la inde; Likumu indjimi wolamu la oki la owe la woyogo mongindji, la ogui la owe mongindji. ³⁴ Yesu amowongoselia: Petele, iwaseli kekehele, liwoso ate koko e molome ebekwe okwasa mbala isato ate ondjewiti mbai. ³⁵ Mbuse eho Yesu asia la iwo: ango iyotomeni mbai la opasa te, la saki te ase la sapato te, odjangini nda ema? wawongosia: ema teeti te. ³⁶ Ase inde awaselia: ase sikahala etikine ndjongo, moto ongo odjéi la opasa, ewongi alitote, ndindjongo moto odjéi la saki ase moto ongo oti la lipata ewongi atambe kasaka ende alikambo ate asombe lipata. ³⁷ Alikambo ate, yasi la ino ewongi loi luhulu wodhingama la gbondo embai wokokisame, ate inde atangemaate ndondo e wato wabe. La meemene loi wungo wodhingama la gbondo e mbai okokisame. ³⁸ Watutiani wasia Likumu mapata male madjéi ahala inde asia wungo wokoki. ³⁹ Apumbia, akia nda ndenge emeseni inde la mokoli mo Olive,watutiani wande wamotuteya. ⁴⁰ Ango oumia inde la ebete eho, inde awaselia yakongoni alikambo ate otikweni ndondo eomekami. ⁴¹ Mbuse eho inde ayandongbia ma lihiele la iwo, akwa la mauli ase abandali oyakongi. ⁴² Wawa, inga obali longose etotu e wodidi ehele atie mbai ase atikelame nda ebali mbai ase nda ebali owe. ⁴³ Ndjongo ahumbwa mwesi olikolo aumia alikambo la omohi wokulu. ⁴⁴ Yesu aokia magba ayakongia alidji makasi oleki. Malia ma wenge mande maumia nda makila mango madokakania la mbume. ⁴⁵ Mbuse eoyakongi inde alongoya ongo likolo, akawongoya atie watutiani, ase awagbotia walali wilo alikambo walembali la magba. ⁴⁶ Inde asia la iwo: alikambo lande ekolalaka ino wilo? Amalani likolo, oyakongeni, alikambo ate otikweni ndondo e womekami. ⁴⁷ Yesu adjali wasi engele eumali wato ngbii, Yuda, mwesi o watutiani wande liomu la wale, adjali oleki liwoso inde aumia ahue e Yesu alikambo la omohi mobale mowalingi la inde. ⁴⁸ Ase Yesu amwaselia: Yuda, okohaka mobale mowalingi la likambo la omohi mana o moto la mawo ma watonani? ⁴⁹ Ango wato wango wadjali la Yesu mongindji iwaenia wungo loi wopotia oumi wamohulia: Likumu, ewongi tosane la mapata masu? ⁵⁰ Mwesi owu amokotia moto owotomu onganga Mwengéi mosungu, ase amotenia litoi. ⁵¹ Ase Yesu asia: Otkeleni ndjongo dheni. Atotia litoi e moto oho, ase awngosia. ⁵² Mbuse eho, Yesu asia la wiloko wato wa wanganga-Mwengéi, ase la wiloko wato wawadendji wa monguta mo Mwengéi ase la wiloko wato wango wadji omoheli inde: Ogelelini la mapata, la mite nda idjéi iwa? ⁵³ Masio kpàa idjaki la ino mongindJi ebete eikima la monguta mo Mwengéi ase otipotalini oheli mbai, ase ehele edjéi engele enu la engele ewokumu wo likolo. ⁵⁴ Wamohelia yesu wakia la inde wakamotikia la monguta monganga Mwengéi mosungu. Petele amotuteya, ma lihele mbuse. ⁵⁵ Ase ndondo egbingi waloliali misa, ase Petele ayabatia ndondo e wato wango wakotoko misa. ⁵⁶ Moto owotomu mwesi omoli amwenia Petele ayabati kelekele emisa, inde amodendjia Petele makasi, ase asia: oholo moto koto adjaki la Yesu mongindji! ⁵⁷ Petele amokokiali, aasiali: moli, imwewiti. ⁵⁸ Mbuse eho moto odi amoenia ase asia: owe koto odjéi mwesi owu.” Ase Petele asia la moto oho ate; iti inde te. ⁵⁹ Pene la engele esi mbuse, moto odji asia makasi: memene oholo koto adjaki mongindji la inde alikambo ate inde adjéi moto o Galilaya. ⁶⁰ Ase Petele asia la moto oho yewiti wungo loi wokwasaka owe. La engele eho ango edjakali inde wasi koko e molome ebekoiya. ⁶¹ Likumu ayakukolia, ase amodendia Petele makasi ndjongo Petele amungolia loi wungo wasali Likumu lainde: Liwoso koko e molome ebekwe okowungana mbai mbala isato ate ondjewiti mbai. ⁶² Petele apumbia ase alelia la magba. ⁶³ Wato wango wamosekeli Yesu, ase wamobingia. ⁶⁴ Wamodhihia maiso ase wamohuelia: towasela inso inga ndai oobingi? ⁶⁵ Ase wasia lainde sambo ngbii dja wiliko. ⁶⁶ Wuse wotania wiloko wato wa wa Yuda, wiloko wato wawanganga Mwengéi la walimo wa pui wagbotononia wakadjia la Yesu liwoso la wabolei wou wosungu. ⁶⁷ Ase wamohuelia towasela iso odjéi Masiya? inde asia la iwo inga iyasa laino, otondjimani mbai. ⁶⁸ La inga yohuelani poopoo otowongoselani mbai ema. ⁶⁹ Obandji ndji keke, mana o moto ekoabata la ewo e lilome e Mwengéi eowokulu. ⁷⁰ Ndjongo wato kpàa wahuelia odjéi inde mana o Mwengéi? inde awawongoselia iwo: Owasigani, idjéi inde. ⁷¹ Ndjongo wasia: Todjeikineni la posa e wadhemei? Tooki isoamene la monoko monde.