¹ Lisiyo la yenga ,wakeli la hilihili ongo la mbila,wakpali isokisoki elumba elamu enge ewngelali iyo. ² Wagbotoli libukeli lilongoyi liwoso la mbila. ³ Walingelia, watigbotoli wenge e likumu Yesu. ⁴ Ango etidjake iwo oyewi inga enge sambo eyinyei woni,denda walome wale wawapumbelali,wakpali wisinje wingalake. ⁵ Watumali la owangi, wayimali wilongi wawu la mbume. Wango pele wawaselia: woni okolukakani moto omokalo ono wato wagwi? ⁶ Ati ala, abasi. Sumbwani enge awowaselate ino,engele edjaki inde la Galileya. ⁷ Ekoki ate mana o moto wa mokawe la mawo ma wato wabe, wamobake la ekulusu, abase lisiyo la misato. ⁸ Ango wadjaali alidi obundoyi maloba ma Yesu. ⁹ Tango ewongoiya iwo la mbila, wasumbia djinge sambo kpa la watutiani wande liomu la esi alidji la wato kpa. ¹⁰ Waango wadjali osumbi enge mboli la wa posotolu, edjali Malia magadala, Yoana, Malia nango Yakobo alidji la weeti wali wango wadjaali la iwo. ¹¹ Kasi waokali djinge sambo nda pamba, watidjali owandjimeli wango wali. v 12 Ase Petelo ayamalalia, akia obangu ongo la mbila. Ayayimbia , ahenia ndji isuki dja isindje ekwi la mbume, mbuse awongoiya atiende, akobunduaka la djinge sambo ewumi. ¹³ Ndji enge lisiyo, watutiani wale wakeli la moki mwesi moweli iwo Emawusu lihele la Yelusaleme inga wakilometele liomu la iwale. ¹⁴ Wadjali owasi iyo kpa djinge sambo iyeti. ¹⁵ Tango edaki iyo okpomi la owasani, Yesu ayandokpia inde amene, akia la iwo mongindji. ¹⁶ Kasi maiso mawu mawatekisali ate watimoyewe. ¹⁷ Yesu awaaselia: okowasakani nde la okosombakani, alidji odjeini la ilongi emagba? ¹⁸ Mwesi la ewu kombo ende Kelopasa, amowongoselia: odjei owe amene maamasiyo ala la Yelusaleme ongo oyewiti djinge sambo eeti maamasio? ¹⁹ Woni? awahuelia. Wamowongoselia: enge e mowumeli Yesu o Nazaleta,ongo odjakali mwaseli ookulu la sambo la oasi liwoso la Mwengei la liwoso la wato, ²⁰ Ndenge wiloko wa wakanga Mwengei la wa zuzi wa su wa moheli laate wamowole wamobake alidji la ekulusu. ²¹ Todjaki oyewi ate inde moto akokaki okalesi Isalayele, kaiko la djinge kpaa,denda keke ehele masiyo masato djinge sambo ikelani. ²² Wali wesi la mongindji mosu watokamwesi. Waki la hilihili ongo la mbila. ²³ Kasi watigbote wenge wande ; wadji oasi ate waahumbwa wawawimeli, wawaaseli te adjei la bomoyi. ²⁴ Aseko weeti la ndondo e wato wango wadjaakali mongindji la iso wakeli la mbila eho, ase wagboti ndji ndjongo nda ndenge wango wali waasi kasi wati moene. ²⁵ Ndjongo Yesu awaaselia ate: wato wandjangi mayele, wango mitema mawu militi la ondjimi djinge ehasemate la waaseli! ²⁶ Etihongoli ate Masia aene odidi la dji sambo laate alingele la elolo ende? ²⁷ Obandi la madhingami ma Moize, oki la waaseli kpaa, awaaselia ndondo e madhingami kpaa djinge sambo ewadhendali. ²⁸ Ango eyandongbali iwo la moki modjali iwo oki,Yesu alukali oki nda ma lihele. ²⁹ Wamotekisali la oyakongi, waasia: tikala la iso laate likolo lipotia oli. Alingelia la iwo. ³⁰ Aseko ango eyabatali inde la iwo la mesa, atotia okoke eowasi yongolo eopamboli, abokia eho, awahia. ³¹ Ndjongo maiso mawu madukwania, wamoyewia, a salamatia liwoso la wu . ³² Ase wayaaselia ate: mitema masu mitidjali obingi ango edjakali inde otowaseli a mboka la otoyignei madhingami. ³³ Wayamalali ndji enge ngonga, wawongwali la Yelusalema, ongo wawagbotoli wango liomu la esi la weeti ongo eyabondali iwo. ³⁴ Wawaaselia ate: likumu abasi meemene, ayeneni pe la Simoni. ³⁵ Asa watutiani wawaaselia djinge sambo ewawumelali la mboka, la ndenge emoyewali iwo Yesu engele ebuki inde okoke. ³⁶ Ndji edjaki iwo owasi Yesu inde amene awapumbelia liwoso lawu awaaselia: logoo edje la ino. ³⁷ Watumali la owangi wayewali ate waeni etota. ³⁸ Awaaseli: woni ekowangani ino? alidji woni maa mamungo mbe makoyabataka la mitema manu? ³⁹ Denda mawo ma mbai la makolo ma mbai, edjei meemene mbai. Potoni mbai alidji dendani: etota ti la wini la kua, la ndenge ekohenekeni ino, mbai edjei la eho. ⁴⁰ Ango eyasia inde ndjono, awaaenesia maho mande la makolo. ⁴¹ La eho,la oyemeli owu, watidjaali ondimiyo,wadjaali okamwi. Ase awaaselia: odjeni la ema e lakake ahala? ⁴² Aseko wamohekelia esuki e su e ndjomake. ⁴³ Ase atotia ehoo ase alakaki eho la maiso mawu. ⁴⁴ Ase awaaselia ate: edjei ehonde iyoowaselalini ango edjaali yo mbai la ino: ewongoli ekokesame dji sambo kpaa edhingani la tina e mbai ndondo e buku e mibeko e Moize, la waaseli,la ndondo e lembo. ⁴⁵ Ase awadukolia mayele laate wayewe olamu madhingani. ⁴⁶ Ase aasia laiwo ate: ndjongo e dhinganaali ate,ekoki djinge sambo ewume, ate Masia onyokwame; agwe ase asuswe mbuse e masiyo masato. ⁴⁷ laate alikambo la kombo ende okukoli mitema la olimbesi masumu ekoke otiesakolami laa miki kpaa, opoti ala la Yelusaleme ⁴⁸ Ino odjeini watotoli la djii sambo. ⁴⁹ Denda ikootomelani ino enge wawa awunate; la ngambo enu, abatani yo la moki mo Yelusaleme tee ekokpalani ino okulu o likolo. ⁵⁰ Akia la iwo tee ongo la Betania, aseko mbuse atombolia ewo likolo, awa pambolia. ⁵¹ Ango adjali inde owapamboli, akawania laiyo ase abamdia oteli likolo. ⁵² Aseko iyo mbuse eomodemei, wawongoiya la Yelusaleme, watumali la oyemeli. ⁵³ Wadjali engele kpaa ongo la tepelo, odemei la opamboli Mwengei.