¹ Mwesi la enge masio, Yesu adjia otiesakoli wato ndondo e tepelo, adjali owasumbeli mboli ndamu. Wiloko e wanganga Mwengei la watiesakoli wa mibeko, la wiloko wadjaali. ² Wamwaaselia: towasela nda okumu okokelaka dji sambo, alidji ndai aohi ehele okumu? ³ Awawongoselia: mbai pe ikohuelakani poopo esi, ndjaselani mbai, ⁴ Patisa e Yoani edji la likolo inga la wato? ⁵ Wabandali obundoyi iwo amene: inga towongosa ate: elongoyi likolo, akwasa ate, wonini otimondjimalini? ⁶ Alidji inga towongosa ate: elongoyi la wato, watokpa wakotobinga mabukeli, laate, watokpaa wayewi ate Yoani adjali mwaseli. ⁷ Wamowongoselia: wayewiti inga edji eni. ⁸ Yesu awaaselia: mbai pe itiowaselani nda okumu ikokelaka dji sambo. ⁹ Abandali owaseli wato li lisekpe: Moto mwesi aonali elanga e vino, awahia watuke, akia okendo e masiyo ngbi. ¹⁰ Ango ewumali masiyo mabukake vino, amotomia motuke monde mwesi atie watuke wa elanga e vino, laate wamohekele djinge ebuki iwo la elanga e vino. Watuke wa elanga e vino wamobingia, wamowongosia mawo ohola. ¹¹ Amotomia weeti motuke monde, wamobhingia inde pe, wamotangia alidji wamowongosia maho ohola. ¹² Amotomia ongo osato, wamokotokolia, alidji waumbia la inde. ¹³ Memene elanga e vino aasia: ikokela woni? Ikomotoma mana o mbai o libhalano, eti mbala, ango ekomwene iwo, wakomotosa. ¹⁴ Kasi ango watuke wa elanga e vino wamwenia, wabhundoyia iwo amene, alidji waasia: dhenda ongo okotikalela la ogumake. Tomoole, laate ogumake eume esu. ¹⁵ Wamulumbia saa e elanga e vino, alidji wamoolia. Sikalandjo memene elanga e vino akowakela woni? ¹⁶ Akodja, akoola wango watuke kpa wa elanga e vino, akoha elanga e vino la weeti wato. Ango eokia iwo ndjongo, waasia: ekokiti odjei ndjongo. ¹⁷ Kasi Yesu awadhendali, aasia: eyinei woni enge edhingami ate: Libukeli enge elumbali wamai, ewumali likule la monguta? ¹⁸ Ongo moto okokwa likolo la enge libukeli, akokondjoa, alidji ongo moto enge libukeli ekomokwela, ekomwandjakola. ¹⁹ Wiloko e wanganga Mwengei, la wiloko e watiesakoli wa mibeko, walukali ate wamohele ndji enge engele, kasi wadjali owangi wato. Wayewali ate edjei loyi ewu nde Yesu ahali linge lisekpe. ²⁰ Wabandali omodhendji Yesu, alidji watomali wato wayakele ate wadjei wato walamu laate wamohele la eyaseli e inde amene, ase wamohe la okulu alidji la okumu e likumu e moki. ²¹ Wamohuelali ehele poopo: Mwalimo, toyewi ate okwasaka alidji okotiesakolaka la meemene, alidji otidhenaka elongi, kasi okotiesakolaka mboka e Mwengei la meemenekpa. ²² Endjimami, inga etindjimane ate toputa limelo e Sezale? ²³ Yesu ayewali mamungo mau mbe, awawongoselia: woni okwalelekani mbai lisala? ²⁴ Inyani mbai enge adjenge. Ehele edjei elongi e ndai alidji madhingo ma ndai? Wawongosia: e Sezale. ²⁵ Awaaselia: hani Sezale enge e Sezale, enge e Mwengei la Mwengei. ²⁶ Watimohelali la ema teeti e obe la enge edjali inde oasi liwoso la wato, wakamwali la ewongweseli ende, wayabatali bi. ²⁷ Weeti Wasadukayo, wango wakwasaka ate obasi la logo oti, wayandongbali, wamohuelia Yesu ehele poopo: ²⁸ Mwalimo, dhenda ehele Moize atodhingelali: inga moto opele ongo oyiki agwa, atikiti wana, maananga akomoyika moli ongo omotiki inde, laate awotele maanango wana. ²⁹ Kaikonde, edjali la wana wapele sambo. ongo oliwoso ayikali, agwiyia te otiki wana. ³⁰ Ongo o wale ayikia ongo moli ogweli, inde pe agwiyia te otiki wana. ³¹ Tee ongo osato amoyikia; ekeli ndenge kikima la iwokpa sambo watikiti wana. ³² Mbuse moli pe agwiyia. ³³ La obasi e logo, akodja moli ondai? laate iwokpaa wamoyikali. ³⁴ Yesu awawongoselia: pele la wali wa mu moki wakoyikanaka; ³⁵ Kasi wango wakoenene olamu olingeli la moki mungo mokodja, mbuse e obasi e logo, watiyikana alidji. ³⁶ Watigwa kine alidji, laate wakouma nda wahumbua, alidji wakodja wana wa Mwengei nda wana wabasi la logo. ³⁷ Wango wagwi, wabase a logo, ndjongo nde Moize ayenyali engele e maa mote mokeke mungu modjali ololeyi, engele akowelaka likumu, Mwengei o Abalayama, Mwengei o Isaka, alidji Mwengei o Yakobo. ³⁸ Kaiko Mwengei ati Mwengei e wato wagwake, kasi wango wakalake, laate iwokpaa wadjei la mokalo la loyi e inde. ³⁹ Weeti wiloko e watiesakoli mibeko, watotali liloba, waasia: Mwalimo oasi olamu. ⁴⁰ Watikokali kine omohueli te poopo esi. ⁴¹ Yesu awaaselia: woni okokokani oasini ate Masiya adjei mana o Davidi? ⁴² Davidi inde amene aasi ndondo e buku ende e lembo: Likumu amwaseli Likumu la mbai: Abata la ewo e mbai e lilome, ⁴³ Tee ikowumisa watonani wa owe wisuleli e makolo ma owe. ⁴⁴ Davidi akomowelaka likumu. Ndandenge akoki odjei mana onde? ⁴⁵ Ango edjakali wato omooki, aasia la watutiani wande. ⁴⁶ Otuandjimeni wiloko wawatiesakoli wa mibeko; wakokpalaka walobe ilai ilai alidji owahi mibele wiholo wisungu, wakolukaka owabati la wangbeleno e liwoso la wasinagoga, la wiholo wilamu la wafeti. ⁴⁷ Wakopwesaka wali wagweli milome wiho wau, la okeli maongi malayi malayi la tina oyayisi. Wakosambisama makasi.