¹ Yesu, alingelali la Yeliiko, akpandali liwange. ² Edjali la motopele mwesi la kombo Djakayo, adjali Likumu e waputesi mamelo, alidji, adjali moto e ogumake. Alukali oeni Yesu. ³ Ase atikokalii omweni, la tina e ebiba e wato, laate adjali mokwe. ⁴ Atilali liwoso, atelia la mote laate amoene, late Yesu apotali oyeti la enge mboka. ⁵ Sikalandjo ango Yesu awumia la ebete ehoo, adhendali likolo amwaselia: Djakayo, adjimba sese; late keke ikoyabata la monguta mo owe. ⁶ Djakayo ayadjimbali sese, ase amototali la oyemeli. ⁷ Ango eenia iwo ndjongo, iwo kpàa wabandali ondungwani, pe owasi ate: alingelia oyabati atie moto ongo owungu. ⁸ Ase Djakayo, ayamalali liwoso la Likumu omwaaselia: dhenda, Likumu, ndambo dja wihoo wa mbai ekohekele la watundake. Pe ema kpàa epwesali mbai moto, la ohengeli, ikowongola ehoo mbala inéi. ⁹ Yesu amwaselia: la lisio la keke mokalo molingeli la mu moguta, late inde pe adjei mana o Abalayama. ¹⁰ Late mana o moto adjali a tina e oluki la okalesi wato wango ¹¹ Wango wadjali ooki djinge sambo, Yesu ahekeleli alidji eeti ekpangela, late adjali ahue e Yelusaleme, pe wadjali la mamungo ate Okumu e Mwengéi wokoenene ndji enge engele. ¹² Ndongo aasali ate: motopele mwesi la kita a akelali okendo la moki mwesi e lihele laate ayawumese likumu, mbuse awongwe. ¹³ Awelali mituke mande liomu, awahekelia wambele liomo, mbuse awaaselia: kelani milunga tee ekowongwa mbai. ¹⁴ Ase wana wa moki wa motonali, alidji wamotomelali wato mbuse ende, waasia ate: tobaliti ate moto oholo awume Likumu lasu. ¹⁵ Ango ewongwea inde mbuse, e ototi okulu e Likumu, awelali mituke wango awahekeleli iwo wambele, la oyewi nda litomba etoti iwo la milunga. ¹⁶ Ongo poo adjia, aasia: Likumu, wambele wa owe ewoti wambele liomu . ¹⁷ Ndjongo amowaselia ate: Edjéi olamu, motuke molamu, late oenesi ate odjéi la omeemene la sambo keke pendja, okotota Okumu likolo la gbata liomu. ¹⁸ Ongo wale adjia, aasia: Likumu wambele enge owe ebakesi wambele itano. ¹⁹ Aasali la inde: owepe, tota mokpali la gbata itano. ²⁰ Weti adjali, ahasia: Likumu, dhenga wambele dja owe, ihisali ehoo la esindjè. ²¹ Late idjaki oowangi, la loyi odjéi moto o minga; okototaka enge otihisali alidji okobukaka mbuma enge otonali. ²² Amwaaselia ate: ikoosambesa ndji la enge eyasi owe la monoko moowe amene; motuke mobe, oyewaki ate idjéi moto ominga, ikootaka enge ehisiti mbai, alidji ikobukaka mbuma enge eoniti mbai. ²³ Woni otiyisali wambele waa mbai dja wibende la baki laate ango ekowongwa mbai itote la asumbelia? ²⁴ Alidji aasia la wango wadjali ango: mopwesani djinge falanga, mohekeleni moto ongo odjei la wambele liomu. ²⁵ Wamwaaselia: Likumu inde adjéi la wambele liomu. ²⁶ Iyo waselini, moto kpàa ongo odjéi la ema wako mohekele ngbi, ase ongo oti la ema, wakomopwesa te enge edjaki inde la eho. ²⁷ Watonani wa mbai wango watibalali ate iwume Likumu la wu, djaka la iwo ahala, wawolani liwoso la mbai. ²⁸ Mbuse oasi ndjongo, Yesu asombia liwoso la ebiba ewato, late atele la Yelusalema. ²⁹ Ango eyandongbali inde ahue e Betefage la Betania la mokoli wakowelaka mokoli ma oliva, atomali watiesakoli wale. ³⁰ Aasia: kekeni la moki mungo modhendani la ino; mbuse olingeli ndondo, okogbotoni mana opunda wamonangi moliki, moto tueti atelakiyo likolo lande; motokolani djakani la inde. ³¹ Inga moto aohuelani: nda ndenge okomotokolakani? okokini oasi ndjo: Likumu adjéi la posa eho. ³² Wango wawatomali wakeeli, wagbotoli ndji nda ndenge Yesu awaaselali. ³³ Ango wadjali otokoli mana punda wamemene ehoo wawaselali ate: nda ndenge okotokolakani enge mana o punda? ³⁴ Wawawongweselali: Likumu adjei la posa eho. ³⁵ Wakpalali ongo mana o punda atie Yesu, walumbali wisindjè wawu likolo la ongo mana o punda pe wamobatisali Yesu likola laho. ³⁶ Ango edjali inde osombi, wato wadjali owandji wisindjè wawu la mboka. ³⁷ Ango ayandongbia inde la Yelusalema,ngambo eyadjimbeli la mokoli mo oliva, watutiani wapotali oemeli, alidji olembeli Mwengéi la moli likolo la loyi e sambo kpaa kamwake eenali iwo. ³⁸ Wabandali oasi: opambwame owe Likumu ongo okodjaka la kombo e Mwengéi! logoo e likolo pe ekumesame wiholo wieti likolo. ³⁹ Ndondo e wato, weeti Wafalisai waasali la Yesu: Motiesakoli, wapamela watutiani wa owe. ⁴⁰ Yesu awawongoselali ate: ikoyewisakani inga iwo waybata logoo mabukeli ma kopama! ⁴¹ Ango ehumali inde la gbata, Yesu adhengali ateniali la ilelo liko laho, pe aasia. ⁴² Inga owe, ososolali a lisio la keke sambo dja logoo! sikalandjo eho eyayisi la maiso ma owe. ⁴³ Late masio ekodja la tina owe, la tango eho watonani wa owe wakolinga lopango makasi wakokela lisukaka ahue e owe mpe wakonanga owe la lisusuka kpàa. ⁴⁴ Wakoola, owe alidji wana wa owe ndondo e owe, watidhee libukeli teeti likolo la libukeli eeti, la loyi otibalali oyewi engele enge odhendamaate. ⁴⁵ Alingelali la tempelo, ase abandali oumbi la wango wadjali otambi. ⁴⁶ Aasali la iwo: edhingami ate: monguta mo mbai ekodja monguta mo oyatati ase ino, owumesia ehoo ebete e iwa. ⁴⁷ Adjali ohinye masio kpàa la tempelo. La makumu dja mangumba, la wadingeli la wato wasungu wa miki wadjali olukani omowoli. ⁴⁸ Ase watiyewali ndenge ototi, late wato kpoàa wamoyokali la owangi.