¹ Ndjongo Yesu awahali ekpangele esi alikambo la owaenesi gbondo ewakongi wiengele kpàa te olembi . ² Asia: la djodji mwesi ndjo atidjakali omowangi Mwesi ongo odjakali omowangi Mwengéi la omodemei moto tweti. ³ Ase la moki moho, edjakali la moli mwesi ongo ogueleli la molome ase adjakali oki mbala la mbala atie inde la omowaseli ate: kela ate imolonge moto ongo okosambaka mbai la inde. ⁴ La woumoi wo engele esindjo, adjakali okili. Ase mbuse asia lamotema monde ate: te ndenge itimowangaka Mwengéi, te itimodemiaka moto. ⁵ Ase nda moli oholo ogueli molome adjéi wiengele kpàa ondembesi mbai, ikokela ate alonge, laate atidje masio kpa ondembesi mbai. ⁶ Ndjongo Likumu abakesia: okani nda easi ohongodjodji mobe. ⁷ Ndjongo Mwengéi atikela ate loi lo wato wande wango awawonoli inde, wango waomowelakolaka likolo la moi lititenie la womemene nda ekowaeneseke inde motema molai? ⁸ Iyowaselini, akowakelela galagala meemene. Ase ango ekodja mana omoto akogboto alidji wondimi ahala la mbume? ⁹ Awaaselali leeti ekpangele la loyi ewango wadjali owayewi ate wadjei wato walamu, wadjali owatoni weeti wato. ¹⁰ Wato waale watelali la tepelo oyakongi; mwesi mofalizeo, ongodji moputesi pako. ¹¹ Mofalizeo ayamalali apotia oyakongi la owasi sambo dja motema monde ate ee Mwengéi, iyodemei alikambo iti nda wato wadji te, wapuesi, wato wadjangi womemene wato wa eteba te koto nda moputesi mamelo oholo. ¹² IKokilaka wilaka mbala la iwale la poso esi, ikohekeleke esi eesuki e liomu e wiho kpàa wikokondjaka mbai. ¹³ Ase moputesi mamelo, amalia lihiele atibalakali te odendesi maiso mande likolo, ase adjakali waabingakoli la mokpoto monde la owasi ate ee Mwengéi ndjokela mbai magba mbai moto mobe. ¹⁴ Iyowaselini ango oholo moto awongwali la monguta monde, aeneneli nda moto molamu; kasi te Mofalizeo. Eho, moto ongo okowatelesa, akoadjimba, kasi ongo okoadjimbesa, akotela. ¹⁵ Kaikonde wato wapotali omodjeli la wana wau wakeke wakeke alikambo awapote pote, ase ango weneli wa tutiani ndjongo, wapotia owapameli. ¹⁶ Kasi Yesu awawelali wana waho wakeke wakeke wadje atie nde; ase asia ate: wadheni wana wakeke wakeke wadjee atie mbai otiwatekeseni, laate okumu o Mwengei wodjei e wato wango waengeni la iwo. ¹⁷ La meemene ikowaselakani ino ate moto kpàa ongo ondjimi wokumu wo Mwengéi nda mana mokeke te atolingela la wuho te okeke. ¹⁸ Ase moto mwesi amohuelali poopoo,asia: mwalimo molamu, ikele woni alikambo ikondje liwongoseli la mokalo mo libela? ¹⁹ Yesu amwaselia ate: lalikambo lande okowelaka owe mbai molamu? moto molamu ati te, longosa sa mwesi Mwengéi. ²⁰ Woewi pui, otikelake eteba, otiasake moleho, otiolake moto, otiwake, modemia sangua la ngua. ²¹ Ndjongo ongo moto asia ate: idemei djinge kpàa tee opoti wo lenge wo mbai. ²² Mbuse ewoki ndjongo, Yesu amwaselia ate: edjéi la ema esi enge edjangi owe tamba wiho kpàa winge widjéi owe la waho ase wakawela watundake ase okokondja ema e motio ongo likolo ase djaka tutia mbai. ²³ Ango okia inde ndjongo aokia magba ngbii alikambo adjali la ogumake. ²⁴ Yesu amodendia ase asia ate: ekodja loi womonga amene alikambo la wango wadjéi la wadjenge walingele la wokumu wo Mwengéi! ²⁵ La memene, olingeli wokamela la bu etonga edjéi petee oleki olingeli wo moto mogumake la wokumu wo mwengei. ²⁶ Wango wadjali omooki waasali: ndai okoki okali? ²⁷ Awaaselia ate: sambo djinge iyengiti okelami, la likkambo la wato, iyengi okelami la likambo la mwengei. ²⁸ Ase Petele asia ate denda! iso todhei wiho wasu amene ase totuteya owe. ²⁹ Asia la iwo ate: lamemene iyasi la ino ate eti la moto tweti ongo odhei monguta monde te moli onde, te wamanango wa pele te wamanango wa wali te wawoti te wana alikambo la wokumu wo Mwengéi. ³⁰ Ongo okodjanga okondji ngbi la ehele engele, la moki mogeleli, te la mokalo mo libela. ³¹ Ndjongo awawelia watutiani liomi la wale kelekele, ase asia la iwo ate denda! tokotelaka la Yelusaleme ase sambo djinge kpàa idhingamali la waseli alikambo la mana omoto yengesame. ³² La ekpangele wakomokawa, la mawo ma wato wa miki ase wakomoseke, ase wakomosambwesa wobe, la wakomosuele nsoi. ³³ Ase mbuse e omobingi inde pimbo wakomola ase wuse wo misato akosusua. ³⁴ Kaikonde watihelali gbondo e djihinge sambo djaho, la eyaseli enge watiyewali olimboli. ³⁵ Ango edjakali inde oumi ahue la Yeliho, moto mwesi ogui maiso ayaabatali kelekele e mboka wongongi wiho. ³⁶ Nda eokali inde wato ngbii wakolekaka, apotali ohuela hueli inga edjéi nde. ³⁷ Wamoewsia ate Yesu o Nazaleta indongo okolekaka. ³⁸ Ndjongo apamia ase asia ate Yesu, mana o Dawidi ndjokela mbai magba! ³⁹ Ase wato wango wadjakali osombi liwoso wapotia omopameli ate anange monoko, ase adjakali ndji opami abolo alidji oleki ate: mana o Dawidi ndjokela mbai magba. ⁴⁰ Ndjongo Yesu amalia ase atomia wamodjele la moto oho. Mbuse eho ango oumali inde ahue, Yesu amohuelia ate: ⁴¹ Obali iyokele nde? inde asia ate Likumu ipote oeni. ⁴² Ndjongo Yesu asia la inde ate pota eni, wondimi wo owe wokalesi. ⁴³ Ndji la engele eho apotia oeni ase apotia omotutei inde ase omodemei Mwengéi, alidji ango weneli wato kpàa ndjongo wamodemiali Mwengei.