¹ Ndjongo asia la watutiani wande ate, sambo djinge ikobingesaka ekikimi itodjangaka te. Ase magba la moto ongo okodjaka la djaho. ² Ewongi wolamu wa monange libukeli la nkingo linge likokpotokolaka iwo la pukapuka, ase wamolumbe la ebale, la ebete ate amobingese mwesi o wato wakeke ekikimi. ³ Huakani inga mangua akela lisumu mopamela ase inga ahengese motema, molimbesa. ⁴ Te inga aokelela obe mbala nsambo la wuse wesi ase adjia atie owe mbala nsambo asia ate ihengesiga motema ewongi omolimbese. ⁵ Watutiani wasali la Likumu ate totaliela iso wondimi. ⁶ Ndjongo Likumu asia ate inga odjakini la wondimi wosungu nda pukapuka e Motalade, nda owasini la mote ate abukola ase keke oyawoni la ebale, mote mokootosani. ⁷ Ndai ndondo eenu ongo odjéi la motuke ongo okobukaka mbume, te ongo okokengeleke nama akoasa la inde engele ewongoiya inde la elanga ate djaka ahala galagala abata la mesa? ⁸ Akwasa ndji ate: wongele mbai ilaka, kpala esindje, hekele mbai ilaka tee ekolaka mbai alidji e e kokenga mbai, mbuse eho, owe okolaka alidji okokenga? ⁹ Akomoemele nde mungo motuke alikambo akeli sambo djinge imotomi iwo ate akele? ¹⁰ Ndji ndjongo ino koto ango okosesela ino okeli sambo djinge eyotomini iwo ate okeleni, asani ate todjéi mituke mpamba wungo wokeli iso ewongi tokele. ¹¹ Ase ango ekeli inde la Yelusalema alekia ndondo e Samalia la Galilea. ¹² Ase ango elingelali inde la moki mwesi ndjongo wato wapele liomu wango wadjakali la ekoni e mbala wagbotononia lainde ase wamalali lihele. ¹³ Wapotali omowaseli: Yesu mwalimo, ndjokela iso magba. ¹⁴ Ase ango ewaeneli inde asi ala iwo ate: kekeni okayainiani atie wanganga Mwengéi. Ndjongo ango edjakali iwo oki, wakalali ndji la mboka. ¹⁵ Ango weneli mwesi owu ate akaliga, akawongoya akomoemeleke Mwengéi la moli mopamake. ¹⁶ Ase akuiya panda la sese e makolo ma Yesu ase amohekelia keke dhinge; kaikonde adjali Mosamalia. ¹⁷ Yesu awongosia ate: te wato liomu nde wakali? ndjongo wango wadji libwa wadjéi eni? ¹⁸ Moto tweti te atiwongwali omotemei Mwengéi, ndji moto ongo o etondo edji? ¹⁹ Ase asia la inde ate, Amala, keke, wondimi wo owe e okalesi. ²⁰ Ase wa Falizeyo wamohuelia, nda engele ekodja okumu wo Mwengéi, Yesu awawongoselia: okumu wo Mwengéi wotidja la ndenge enge wato kpàa wakoki oyewi. ²¹ Etiyasana ate: adjei ala, inga: adjei ongo, laate dhenda, okumu wo Mwengei wodjei mongindji la ino. ²² Ndjongo asia la watutiani: masio mageleli ango ekodja ino la ehoha e woeni wuse wesi wo mana o moto ase otieneni. ²³ Ase wato wakwasa la ino ate dhendani ongo! te dhendani ahala! otiumakeni te otiwatutiakeni. ²⁴ Aloyi ate, ndji nda ndenge ekobalimaka mokalikali ango ekongengaka muho mokoumaka opoti la ebete esi ongo likolo weneni e Mana omoto ekodja ndji ndjongo. ²⁵ Ase awongi liwoso aene yo odjidji ngbii la wolie wungo wokomotona inde. ²⁶ Alidi, ndenge edjakali la masio ma Noa, ekodjaa ndji ndjongo la wuse wo mana omoto. ²⁷ Wadjakali olaki, la okengi, pele idjakali woiki wali, wadjakali woikesani tee ndji wungo wuse wo Noa alingelali la masua, ase mpela ekadjia, ase ewaolia iwo kpaa. ²⁸ Ekodjaa koto ndenge edjali eho la masio ma Lota wadjakali olaki la okengi osombi la otambi, oni, omai minguta. ²⁹ Ase wungo wuse wopumbali Lota la Sodoma, misa misungu milongwali ongo likolo miluya ase miwaolia iwo kpaa. ³⁰ Ekodjaa ndji ndjongo wuse wungo wokoenene mana omoto. ³¹ Wungo wuse ndjongo, moto ongo okodjaa likolo la monguta, ase wiho wande widjéi la monguta atiadjimba ototi, te la moto ongo odjéi la ilanga, inde atikawongwa ototi wiho wande. ³² Momungwani moli o Lota. ³³ Moto kpàa ongo okolukaka okalesi wenge wande akowiwungesa waho, ase ongo owungesi waho akobania mokalo. ³⁴ Ikowaselakani ino la linge lisio, wato wale wakolangala la epe, mwesi akokee mwesi akotikala. ³⁵ Wali wale wakotanga la eboka eikima mwesi akokee, mwesi akotikala. ³⁶ Wato wale wakodja la elanga Mwengéi akomotota moesi, akomotika mwesi. ³⁷ Ndjongo wamowongoselia ate: nda ebete likumu? awaaselia ate: ebete elangali molonda, koka koto ikwabolia.