¹ Waputesi pako la wato wamasumu wadjali ahue e Yesu la omooki. ² Wafalizeo la wa tiesakoli wa pui wadjali ondungwani la oowasi ate: oholo moto akoyambaka wato wabe pe aolakaka laiwo mongindji. ³ Awaselia li lisekpe: ⁴ Ndai ndondo enu inga adja la kondolo kamakikima, inga aungesa esi, ewongiti atikeyo djinge tuku libwa la libwa la esobe, late ake oluki enge esi ewungi tee ekomwene inde? ⁵ Ango enia inde enge esi akoekpala la mwemu la makookoto. ⁶ Ango ewongoiya inde la monguta, awelia wino wande la wato wango wasukami la inde, aasia la iwo ate: yemeleni mongindji la mbai, laate iyeni kondolo embai ewungi. ⁷ Edjéi ndenge kikima inga mopagano mwesi akukola motema ekodja la mwemu osungu ongo likolo weti wato tuku libwa la libwa wango walamu wango wakokiti kine okukoli ekaleli. ⁸ Alidji inga moli mwesi adjei la wadjenge liomu e wibende, inga awungesa esi, ati lolwa lotambe akpase monguta aluke olamu tee ekoene inde eho? ⁹ Inga aenia, akowawela waino wande la wango wayabati eholo kikima la inde akwasa: yemeleni la mbai mongindji, laate iyeni adjenge enge ewungisi mbai. ¹⁰ Edjéi ndenge kikima ekowaselakani mbai, edjéi la mwemu etie wana wa Mwengéi inga moto mwesi mopagano akukola motema. ¹¹ Asia aleeti ate: moto mwesi adjakali la wana wapele wale. ¹² Ongo elenge amoaselia sango ate: wawa pekele mbai esuki elikondja wungo okoki la mbai pe sangbu awa kawelelia ogumake wonde. ¹³ Mbuse emasio makeke ongo elenge atotia ogumake wonde akia la eeti moki mwesi molihele; ongo abitisali ogumake wonde la ekaleli e witeba. ¹⁴ Ango esesia inde Falanga kpàa djala EWumia la mungo moki, olaki wonde wowumia la minga. ¹⁵ Akalukia otomu etie moto mwesi; ongo Likumu amotomia ate akakengelaka nama dja nde. ¹⁶ Adjali la posa olaki wilakate wangulu, moto tueti adjali omohi te ema. ¹⁷ Inde amene abandia oyaseli la motema: wawa adjéi la watuke ngbi, pe wadjéi la ilaka ngbi mbai iyogbaka ndjala ahala ndjo. ¹⁸ Ikolongwa ahalandjo iwongwe etie wawa, ase ikomwasela ate: wawa mbai ikeli obe. ¹⁹ La maiso ma Mwengéi, alidji la maiso ma owe, wotitotekine mbai nda mana owe, tota mbai nda motuke mowe. ²⁰ Ayamalia ayadjimbia mboka owongoi etié sango, ndji edjaki inde yo lihele, tango emuenia sango magba ma mokelia akia obangu okamokweli la kingo amolingia. ²¹ Mana amwaselia ate: wawa mbai ikeleli likolo obe mpe lowe okokiti kine ototi mbai nda mana owe tota mbai nda motuke mowe. ²² Sango asia la watuke wande, kelani obangu djaka la isindjè ilamu sikasikandjo omokpaleseni; mobongani mpe mopete la mosei mpe omokpaleseni wikpokpo la makolo. ²³ Djakani la mana o ngombe opele omaita omooleni, tomolake, toemele. ²⁴ Laate mana o mbai oholo ogbakali, awongoi la mokalo; awungali, awongoi. Wapotali oemeli. ²⁵ Ndjoka manango eloko adjakali la ilanga, ango ewongoiya inde la moki aokia sa ngungu la mbonda ikobinga. ²⁶ Amowelia mou mwesi a mohoelia tina engungu la mbonda. ²⁷ Motuke moho a moaselia ate mangwa nde owongoi uho wungo oli sangwa mana ongombe opele omatamu, laate amweni wenge olamu. ²⁸ Inde amemelia, atonia o lingeli ongo la lopango lou, sangbau apumbia ayakongia la inde ate alingele. ²⁹ Kasi amohongoselia sango: denda mbula ngbi ikokelaka otomu woowe, itibukaka mibeko moowe ; owe use te okikikima ohala mbai mana ongombe opele ate ikele lipati la wino wa mbai. ³⁰ Ango owumia mana owe ongo olaki Falanga djowe la wali wa ndumba omokelia lipati. ³¹ Sango amowongoselia: ate mana o mbai, owe nde odjéi la mbai ebete ekikima, iho ndjo kpàa wa mbai widjéi wowe. ³² Ewongi tokele lipati, toemele, laate maangua ongo ogwaki awongoi la makolo, awungaki aenania.