¹ Yesu alingelali use wesi o Sabata, la monguta mo Likumu liesi e wafalizeyo, la olaki ilaka; wa Falizeo wadjali omodendji. ² Moto mwesi wekoni amalali liwoso lande. ³ Yesu atotia maloba asia la watiesakoli wa mibeko alidji la wa Falizeyo; etekesami, to edimisami omokalesi moto use o sabata? ⁴ Iwo kpàa wabatia bii, Yesu amokeeselia ongo moto ewo, amokalesia pe amowongolia. ⁵ Mbuse eho awahueliua: ndai ndondo enu inga mana onde te ngombe ende ekpa la liwela, atibumbesa huse o Sabbata? ⁶ Waedjali la eyano ewongolake. ⁷ Mbuse eho awahekelia lisekpe liesi etie wango wato wadjakali ango, awaenia wolukaka oyabati ebete e liwoso. awaselia: ⁸ Inga moto aowela la lipati otiyabatake ebete e liwoso laate ekodja la moto mwesi o lokumu okoki odji mbuse. ⁹ Laate ongo oweli ino atidje oowaseli: dhee ehele nbgelengo la oholo moto. Okotota soni oki okaabati eholo e gboo. ¹⁰ Kasi inga waowela la lipati balaka okabati la ngbelengo e e gbo, laate ongo moto ooweli inga adja akoowasela owe ate keke okabate la ngbelengo e liwoso, djongo ekookela mwemu liwoso la wato wango waya bati la owe la mesa kikima. ¹¹ Laate moto ongo okoyadjamba, wakomodjimbisa, mpe moto ongo okoyadjimbisa, wakomodjamba. ¹² Asia mpe la moto ongo owaweli wato: tango enge okowahekeleke owe wato ilaka wa midji te wa pokwa, otiwawelake wino wowe, te wamangwa, te pe sangwa la ngwa, te wato wasukani la owe la ogumake laate iwope watiowele eeti huse, waokelele nda owakelelali. ¹³ Inga owongele lipati wawela: watundake, watowabukei makolo, wato wango wo tengulaka alidji la wango wagbi maiso. ¹⁴ Okodja la mwemu late iwo watio wongosela owe ema laate okofutama lisiyo e lisekwa la wato walamu. ¹⁵ Mwesi ewato wango wadjakali la mesa, mbuse ooki mango maloba asia la Yesu: mwemu la moto okolaka ilaka la okumu wo Mwengei! ¹⁶ Yesu amowongoselia, asia ate: moto mwesi alambesali ilaka ngbi pe awawelia wato ngbi. ¹⁷ La engele eho e ilaka amotomia motuke monde ate akawawela wato, late ilaka iweliga. ¹⁸ Wato kpàa waongia bolimbisi ate wakokiti odji. Ongo oliwose asia te mbai isombali elanga, djongo iyokeke ndji keke ehele Ndjo late ikahene, limbesa mbai. ¹⁹ Ongo weti asia mbai isombali ngombe liomi, keke nde okeke mbai okawalakesi. ²⁰ Ongo weti asia ate mbai iyikia moli ndji sikasika ndjo ilongiti oki. ²¹ Motuke monde awongoyia amwaselia Likumu, la limemu amwaselia motuke monde ate keke obangu la mboka owawele wato ongo la liwange, odje pe la watundake, wato wabukei makolo, wato wagbi maiso, pe watengumi. ²² Motuke monde amowongoselia: enge etomi owe, ekelami, kasi iholo widjeiyo. ²³ Likumu amwaselia keke la mboka wato kpaa wango wakowene owe djaka la iho, late monguta mo mbai motume ²⁴ Mbai iyasi ndjo ndondo e wato wango djongo wawelali mbai watilaka ilaka wa mbai. ²⁵ Wato ngbi wamobilakali Yesu la mboka, ayakukolia pe awadhendjia pe awaaselia. ²⁶ Inga moto abila mbai, ewongi amotone Sango, nango, moli onde wana wande, wamango wawali la wapele, ayatone pe inde amene ase akoke odjéi motiesakoli mo mbai. ²⁷ Moto ongo atikpala ekulusu ende amene, aebilake mbai, ata koke odjéi motiesakoli mombai. ²⁸ La ewo ndondo enu inga aenga omai monguta, ewongiyo abundole olamu odengi inga ekomongo Wadjenge woni. ²⁹ Late engele enge ekobanda inde omai esile, late inga atisésé wato wako moseke. ³⁰ Wakwasa la inde ate: oholo moto abandji omayi, akokiti osilisi. ³¹ Ndji la enge engele, inga Likumu liesi inga aluka ate asanese wita la oeti likumu, akoyabatayo la odhendji inga akoki, la wato koto liomu, tango eti, enge ngambo wadjei la wato koto tuku iwale. ³² Tango enge enika inde ate aekoka akoki o watomi wato ate waokane la kimia. ³³ Inga etidje ndjongo, ndjiyo ongo eti likumu adjei yo lihele, akomotoma moto la oongi logoo. ³⁴ Mokpa modjéi olamu ngbi , kasi inga mosila oleli oho mokodja kine la tina? ³⁵ Eti olamu la mbume, pe la miutu. Late walumbe saa. Ongo odjéi la matoi maokake, awoke.