1 La engele eho, wato ngbi wayaboliali ebete e kikima, wadjaali wato inga mbuka, ase wadjali ohotoni, Yesu apotali owasi liwoso la watutiani ate: huakani la levile e wafalisai wadjei la moleho. 2 Ase edjeiti la ema esi, enge eyisani, edjange oeneni; alidji eti la sekele esi enge etiyewane. 3 La ndjongo, sambo djinge ekowasaka ino la likolo ekopumba la hoho, ase enge wokwasaka ino la moli mo sese la wisuki dja ndondo e monguta, ekwasana a likolo la monguta. 4 Aleeti ikoaselakani ino wino wa mbai: otiwangeni wango wakolaka wenge pe la mbuse wakokiti okeli ema teeti. 5 Ase ikoeneseni ino moto ongo okokini omowangi: wangani moto ongo mbuse e owoli adjei la okumu e olumbi la misa. Ndji ongo nde iyoyewisini ino mowangani ndji ongo moto. 6 Watitambaka susele itano la ladjene iwale e motiyo mokeke, Mwengei atiwosanaka te mwesi a tina eho. 7 Ase te swee kpaa dja mito manu etangani. otiwangeni; ino oyetini wa susele la motiyo. 8 Ndjongo ikwaselakani ongo akwasa la hoho liwoso la wato ate mbai la inde todjei la oyokani, mana o moto pe akwasa la hoho liwoso e wahumbua e Mwengei ate adjei la oyokani la inde. 9 Ase moto ongo owungani mbai liwoso la wato, wakomowungana inde liwoso e wahumbwa wa Mwengei. 10 Ase moto ongo owasi loi la oyamaleli mana o moto, wakomolimbesa ; ase moto ongo otangi elimo santu wata molimbese. 11 Ango ekookpalani ino la wasinagoga, te liwoso e wadjodji, la makumu, otiasumbweni la ndenge ekwasani ino, te la djinge ekopumbisani ino. 12 Laate elimo santu ekotiesakolani ino ndji enge engele enge ekokini ino owasi. 13 Moto mwesi ndondo ebiba e wato aasali la Yesu ate: Motiesakili, moyewesa manima o mbai akawole wiho wasu wa uma. 14 Yesu amowongweselia: owe ndai obati mbai djodji te mokawoli wa wiho wanu? 15 Ndjongo aasali la iwo ate: angatalani olamu la posa e okondji wiho, laate mokalo mo moto motidje sa la wiho, ingate adjei la wio ngbi. 16 Awahali ehele lisekpe: mbume dja moto ogumake mwesi ewotali olamu. 17 Ndjongo abandali omungoli la motema monde ate: ikokela nde sikalandjo nda eti mbai la ebete la obolei mogono mo mbai? 18 Ndjongo aasali: ikokelaka ndjo. Ikobukolaka minguta ma mbai ma isake la wiho pe ikomaa minge misungu oeti, pe ongo ikobolea pukapuka kpaa pe wihoo ndamu kpaa; 19 Ase ikwasa la molimo mo mbai ate: molimo mo mbai odjei la wihoo wilamu ngbii enge eyisami laate la mbula ngbii. Homa, laka kenga alidji hemela. 20 Mwengei amwaselia ate: ekete! la likolo lili wakowongo molimo mo owe ndjongo ndai akotota wiho wiwi obondji? 21 Edjei ndjongo laate ongo oyayiseli wihoo wa wotio ase ati mogumake la maiso ma Mwengei. 22 Yesu aasia la watutiani wande ate: eho lenge ikwaselaka ino ate: dheni oyasumboyi la tina e mokalo monu la enge ekolaka te la enge ekokpala la tina e wenge wanu. 23 Laate molimo eeti wilaka alidji wenge eeti wisindje. 24 Wadhendani wayanganga, wationaka, watibukaka, wati la ebete eyisake te monguta moisake wiho, Mwengei akowaalakisaka. 25 Ndai ndondo enu la oyasumboyi wonde, akoki obakesi te engele eikima la bomoi onde? 26 Eho enge inga okokiti okeli loyi enge eeti maakeke, ndandenge okoyasumbwakani la djenge sambo? 27 Denga olamu nda ekoumaka fulele ndamu: itikelaka otomu, etisonaka esindje, etitongaka esindje; ase ikwaselakani ino: te Salomo inde amene la kembo ende kpaa, atikpalali akpaali nda mwesi le eho te. 28 Ndjongo inga Mwengei akokpalisate isoki keke wala wilanga enge ekundu wakolumba la misa, akookpalisani ino oeti, ino wato wa ogemei wokeke. 29 Eho lenge dheni obundoi enge ekolakani ino la enge ekokengani ino, ase dheni oyasumboyi. 30 Laate djinge wiho kpa, edjei wato wa ekaleli mbe wa moki nde wakolukaka. Sangbanu ayewi ate odjeini la posa eho. 31 Lukaniyo okumu wo Mwengei, djeeti wiho wikoohekelemeni oyeti. 32 Otiwangeni oliye eokeke, laate sangbanu aeni olamu oohi okumu. 33 Tambani wiho wanu ase hekeleni likawo e motema magba. Kelelani molambola enge eigbaka, likondja linge litisilaka ongo likolo enge iwa etiwumaka aliddji te ekese etibitisaka. 34 Ase ebete wihoo wamotiyo midjei motema mo owe mokodja ongo. 35 Awongeleni alidji miinda manu elole. 36 Djani nda ato wango wakolambelaka molome o liwala awongwe, laate wamodhukole modhuhe engele ekouma inde la engele ekobinga inde modhuhe. 37 Mwemu la watuke wango engele ekouma molome, akowagboto wasusoi! Iyowaselini meemene, akobata mokaba monde, akowaha ibete eyabatake, akoyandongbala owakeleli. 38 Awume te ndondo e likolo te gboo e likolo, mwemu la watuke wango inga akowagboto wa susoi. 39 Oyewini olamu ate inga memene monguta ayewake engele enge moto oyiwa akoki odji, akokaki oyabati angbilia, atikokake odhei wabuke etutu e monguta monde. 40 Ino pe yawongeleni la loyi mana o moto akodja la engele enge otiyewani. 41 Petele amowongoselia: iso nde okotowaselaka li lisekpe, inga edjei e wato kpa. 42 Yesu aasia: nda kapita ongo molamu alidji okandela, ongo likumu lande akomobata la osindjili watuke wande kpa ate awahake mawuna minge mibali iwo la engele enge ewongi? 43 Mwemu la motuke mungo likumu lande, ango ekowuma inde akomogboto ndji akokela otomo. 44 Iyowaselini meemene, akomobata ate adje sindjili e wiho kpa. 45 Kaiko nde inga ongo motuke ayaasela ate: likumu la mbai akowumwaka la odji, inga ayabata la weeti watuke wapele la wawali, la olaki, la okengi alidji la olangwi. 46 Likumu e ongo motuke akodja lisio linge inde atimolambela, la engele enge inde atiyewa. Akomoha etumbu e tetelake, akomobata eholo e kikima la wato wati la omeemene. 47 Motuke mungo ayewali posa e likumu lande kaiko atiyawongelali, alidji atikelelali posa ende te, wakomobhinga pimbo ngbi. 48 Kaikonde ongo atiyewali gbondo, kasi akelia sambo ndjinge ewongi laobingami, akobingama pimbo keeke. Moto kpa wamohi ngbi, wakomoongo ngbi, alidji moto ongo wamohekeli mokpali mosungu, wakomoongo sungu oyeti. 49 Idji ololei misa la mbume ase inga eloliana, ikoluka alidji nda ema? 50 Edjei la patisa enge ekoki la mbai ototi, ikookaka magba tee lisiyo linge ndjinge sambo ikoyengemene. 51 Okomungolakani ate idji obati logo la mbume? te ndjongo, oyowaselini; idji obati okawani. 52 Aloyi, obandji sikalandjo, inga edja la wato watano,la monguta, wasato wako amalela waale, ase waale wako amalela wasato. 53 Wato wakokawana: wawa akomomalela mana onde opele ase mana opele akomomalela sango, ima akomomalela mana o moli aseko mana o moli akomomalela nango; okio o moli akomomalela moli o mana aseko moli o mana okomomalela akio onde o moli. 54 Aasia alidji la iwo: engele enge ekoenekeni ino lipata lilongoiya la elangeli e wuse, okwasakani ate: ewongo egeleli, ekokelamaka ndjongo. 55 Aseko engele ekoenekeni ino ehoho elongoiya la mbole, okwasakani ate ehela etetelake ekodja, ekokelamaka ndjongo. 56 Wato wa moleho,oyewini odhendji olamu ndenge mbume la likolo ekoeneneke ase nda ndenge otiyeweni odhendeli olamu ehele engele? 57 Ndandenge ino amene oyewini ate lu loyi ndjo edjei meemene? 58 Engele enge ekokeke la monguna moowe liwoso la djodji, kela obangu ate ango edjei yo owe la mboka, osilisane la inde, la owangi ate aotube liwoso la djodji, alidji djidji atiohe la mawo ma likumu e wapulusu, mbuse pulusu eolumbe la boloko. 59 Ikowaselakani meemene otipumba; ndji ate opute waadjenge wa wibende e motiyo mokeke enge e gboo