¹ Wamanima wa mbai, otilukeni odje inokpaa watiesakoli, laate, oyewini ate iso tokodjaa la osambesami ungo otetelake. ² Laate iso kpaa tokosakelaka la sambo ngbii. inga moto atisakelaka la luundo londe, inde adjei moto okoki, ongoekesi wenge wande kpaa. ³ Tokobonga witogo la monoko mo wapunda laate watotose ase tokosombisaka wenge wau kpaa. ⁴ Ndegaayoni masuwa, ekodjaka esungu pe wihoho e tetelake ekokpalaka eho, ekosombesama la edolo e keke wiholo kpaa mosombesi aheli edolo abali. ⁵ Ndenge kikima, olemo edjei motunga mokeke ase ekoyatemeaka la sambo sungu. Denga nda maa misa mikeke ekolongosaka motulu mosungu. ⁶ Olemo edjei misa, la wisuki wa wenge wasu olemo edjei moki mungo motumi la sambo djinge edjangi omeemene, laate ekobitesaka wenge, ekobitesaka mokalo kpaa alidji ekolongosaka eho la Lifelo. ⁷ Laate wato wakoki okeli ate mitomani dja mbau e motulu la mbulu pe wiho winge wikoagulaka la solo pe la wikelamu winge wikoabatanga la ewale e watose, pe ekowatosaka. ⁸ Kaasi moto tueti akokiti okeli ate olemo emotose. Eho edjei ema ebe, enge moto akokiti otekisi, etumisami la ngenge e logo. ⁹ La eho tokomotemeaka, sangbasu, ase la eho pe tokowabumakolaka wato wango wakelami la elima e Mwengei. ¹⁰ Ndenge kikima monoko ekopambwaka la ekobumakolaka. Wamanima eengiti eho edje ndjongo. ¹¹ Eliwa ekumesaka malya maleleke la malya madiake ebete e kikima? ¹² Wamanima, mote mo Figi makokiti owoti pukapuka dja Oliva te mote mo vino pukapuka e Figi? Malia ma mokpa ekokiti owumesi malia malamu. ¹³ Ndai ndondo enu adjei la lokenge pe la akili? Aenese tomo djande la esombeli ende elamu la logoo enge ekoeenesaka lokenge. ¹⁴ Kasi inga odjani la ononi e etelake la oswameli la mitema manu, otiatemeakeni alidji otibukeleni meemene moleho. ¹⁵ Eho edjei lokenge enge longoiti likolo kasi malongoi la mokii, lokenge e wenge, enge e etota. ¹⁶ Laate ebete edjei ononi la makaka, ewedje la sambo kpaa mbeembe edjei pe ango. ¹⁷ Ase lokenge enge elongoi likolo edjei yo liwoso olangi ekodja pe la odaki, logoo, otosi, etumi la magba la pukapuka ndamu, etiwonoko mbanda pe eti la ekosako. ¹⁸ Wato wango wakobataka logoo, wakoonaka pukapuka elamu la logoo pe wakobukaka eho.