¹ Wamanima wa mbai, okomondjimelakani Likumu lasu Yesu Kilisito, mwemu la iso, ndjongo okoonokoni wambanda. ² Laate inga moto mwesi akpalia pete e wolo la misei mande la wisindje wilamu alingelia la losambo lanu, ase motundake mwesi ongo okpali widjadje adjia pe alingelia. ³ Kasi ino okoyemela la moto ongo okpali wisindje wilamu pe okoasani ate: Abata ala la ehele ebete elamu. Kasi okoasani la motundake ate: Owe amala ango, te: abata ongo ahue e esuleli e makolo ma mbai. ⁴ Okawoliani wato la mambutu ndondo enu alidji owumiani wa djodji wango wakotenaka sambo la ndenge e obe, te ndjongo? ⁵ Okani, wa manima wa libalano; Mwengei atiwonoli wango wadjei watundake la moki laate wadje wakumi ndondo e ondjimi pe watote libula e okumu, enge awunelate wango wakomobalaka? ⁶ Kaasi ino, okodhendiakani motundake! eti wangumi nde wakoenesakani odjidji la wakookulakani la witenelo? ⁷ Eti iwonde, wakotangakolaka kombo elamu enge ekpalini ino? ⁸ Ase inga weengesani pui dja Okumu asakate okelini olamu, nda easi madhingo: Okomobala maangwa nda eyabali owe amene. ⁹ Kaasi inga okoonoko mbamda, okokelakani masumu, laate pui e opamelini ate odjeini wato wango wakobukaka pui. ¹⁰ Laate inde ongo okoengesa pui kpaa ase asakeliia la loyi liesi, abukiga pui djaho kpaa. ¹¹ Ase, inde ongo waasi ate: Okokiti okeli eteba, aasi aleeti ate: Otimoole moto. Ndjongo, inga otikelaka eteba, kasi okoolaka wato, owumiga moto ongo obuki pui. ¹² Asani pe kelani nda wato wango wakosambisama la pui e wato walipanda. ¹³ Moto ongo oti la motema magba, atisambisama la motema magba. Motema magba ekolongaka lisambisi. ¹⁴ Wamanima, eni mokalo inga moto aasa ate adjei la ogemei kasi ati la tomo? Ogemei oho ekoki omokalesi? ¹⁵ Inga moto pele te mana o moli adjei lingbengbele ati la ema elakake la lisio. ¹⁶ Moto mwesi laino awaaselia ate: Kekeni logo, alulani la misa pe gbetani, kaikonde owahiti wilaka winge wiengi la wenge wau, gbondo eho edjei eni? ¹⁷ Edjei ndenge kikiima la ogemei: Inga edjanga tomo, egwiga eho amene. ¹⁸ Ase moto mwesi akwasa ate: owe odjei laogemei; mbai moto idjei la tomo.ndjinnya mbai ogamei wowe ungo odjangi tomo, mbai koto la tomo dja mbai ikooyinya ogemei. ¹⁹ Owe ogemei ate Mwengei adjei inde moikima? Okeli olamu, ase milimo mibe wakogemei pe ndjongo la odjadji. ²⁰ Obali ate oyewe, moto odjangi lokenge, ogemei enge edjangi tomo edjei pamba? ²¹ Abalayama, sangbasu, atitangamate moto molamu la tomo djande mbuse e omokawi mana onde Isaka mbeka la etumbelo? ²² Weeni ate ogemei onde ekelali mboka eikima la tomo djande pe la mboka e tomo djande ogemei onde eengali. ²³ Ndjongo, madhingo eengesami linge lyaasi ate: Abalayama a mogemei Mwengei la eho nde motangali moto molamu: Eho ewelami inde ate miino o Mwengei. ²⁴ Weenini ate moto moalmu la tna e tomo djande eti saa la tina e ogemei. ²⁵ Eti ndjongo nde, Lahaba, moli o mpite, atangamali moto molamu la tomo djande, mbuse e waayambi wa sumbi mboli la owayetesi eeti mboka? ²⁶ Eho nde wenge wungo wodjangi elimo egui, ndenge kikima pe ogemei wungo wodjangi tomo wogui.