¹ Mohela molongoi nda songo pe kindo enge edjei ndondo enu elongoi nda songo? Etilongwaka la posa enu mbe e mwemu e wenge enge ekosanaka la wisuki wa wenge djanu? ² Odjeini la posa kaasi otitotani; okoolakani wato la okononokoni wiho wa wato, kasi otitotakani. Odjeini la kindo la mihela. Otitotakani laate otiongokoni. ³ Inga okoongokoni, otitotani laate okoongokoni obe, laate oyemelese mwemu manu ma wenge. ⁴ Ino wato wa witeba! Oyewini ate odjei mino e moki edjei odjei monguna mo Mwengei? Ongo obali odjei miino e moki aakeliga monguna mo Mwengei. ⁵ Ino omungolini ate elimo ekoasaka la odjangi kole? Edjei la mohela nde Mwengei akobalaka molimo enge eyabati atie iso. ⁶ Ase akotoha nano ungo obeki, eho nde madhingo maasi ate: Mwengei akowamalelaka wato wa ogeno, ase akohekeleke nano la wango watitimi. ⁷ La ndjongo yadjimbisani liwoso la Mwengei, kasi amalelekani etota akotila liwoso lanu. ⁸ Andongbani ahue e Mwengei, pe inde akoandongba ahue enu. Langisani mawo manu, ino wato wa masumu, pe langisani mitema manu, ino wato wa mitema miale. ⁹ Okani magba, lelani pe wumesani po! Oseki wonu wowume ilelo, mwemu monu nda magba. ¹⁰ Yadjimbisani liwoso la Mwengei ase inde akoodjambani. ¹¹ Wamanima,otitonganeni. inde ongo okomotonga miinonde, inga akomosambesa maanango, ndjongo akotongooko pui pe akosambisaka pui. Inga okosambesaaka pui oti motemei, otila o pui, kasi mosambesi. ¹² Mohi mo pui mpe mosambesi adjei ndji moikima; inde ongo okoki okalesi la ooli. Kasi owe odjei ndai la omosambesi miino owe? ¹³ Okani ino wato wakwasaka ate: Keke inga leekundu tokokee la ehele gbata, tokoetesa ongo mbula eesi, tokokela sambo ongo alidji tokouma la adjenge. ¹⁴ Oyewetini ndenge mokalo monu ekodja ekundu. Laate odjeini ligite linge likopumbaka la engele ekeke mbuse esalamatia. ¹⁵ Eengi la ino owaasi ate: Inga Mwengei abala, tokodja la mokalo, mpe tokokela ndjongo. ¹⁶ Ndji sikandjo okoyagumyaka la sambo djanu dja elolo. Oyatemei la ndenge eho kpaa edjei obe. ¹⁷ Eho enge, inga moto ayewa okeli enge edjei olamu, kasi atikelaka eho, akeli lisumu.