¹ La lipanda e ndenge eho nde Kilisito atokalesali. Eho nde, amalani la otetelake, pe otidheeni ate waobateni alidji la ohianesi la enanganeli enge e otuke. ² Dhenda! mbai Polo, ikoasaka la ino ate inga otenanani kombeni, Kilisito atidja la tina atie inu. ³ Alidji, ikoaselaka moto kpaa ongo okotenaka kombeni ate akoki oengesi pui kpaa. ⁴ Okawani la Kilisito ino kpaa wango wakolukaka otangemi wato walamu la sambo dja pui; olongoini la logoo e sungu e inde. ⁵ Nde iso, la mboka e elimo tokolambelaka la motema mo misa olamu wungu tokobatelaka motema enge elongoyi la kondjima. ⁶ Laate, la sambo e Kilisito Yesu, otenani kombeni eti la tina, edje te inga otitenane kombeni, kasi ondjimi enge ekokelamaka la mboka e libalano ehonde edjei la tina. ⁷ Odjakali otili obangu. Ndai ootekesalini otosi meemene? ⁸ Mamunguene e ndenge eho elongoyiti atie moto ongo aowelalini ino. ⁹ Ma levile ekokundjisaka mogbuku mo moteke. ¹⁰ Indjimi pendja ate ino wango waboliani la likumu otibunduaka ndenge eeti. Kasi moto ongo akoobatakani la ewedje akosambisama, edje te ndai. ¹¹ Kasi mbai, wamanaima, inga idjeiyo otiesakoli otenani kombeni, nda ndenge idjeiyo oeni odjidji? ¹² Ikoki oemeli ate wato wango wakolukaka oolingeseli ewedje, wayawumese te mituke. ¹³ Wamanaima wa pele la wango wa wali owelanini la lipanda. Kasi otikelelakani lipanda laho nda mboko o oyengesi posa dja wenge, kasi la mwemu kelanani nda watuke . ¹⁴ Laate pui kpaa eengeisani la liloba li liloba: Okoki omobali miino owe nda owe amene. ¹⁵ Kaikonde, inga odjeiniyo ndji otuani maino la olakani, huakani ate otisilisaneni. ¹⁶ Kasi ikoasaka ate: Sombani la elimo pe otikokeseni posa te esi e wenge. ¹⁷ Laate wenge, la posa eho, ekoaamalelaka elimo, elimo pe ekoaamalelaka wenge; laate eho iale etiokanaka, eho enge sambo djinge ekobalakani ino okeli, otikelakani eho. ¹⁸ Alidji, inga okosombisamakani la elimo, otini sese e pui. ¹⁹ Sambo dja wenge ekoeneneke ohola: Eteba, pite, osoto, esombeli e soni. ²⁰ Mangomba ma wikeko, lilando, mohela, oswi, zua, limemu, oswameli, okawani, maa masambo. ²¹ Oluli, olangoi maana, maigo ma litema, pe la sambo djinge eengani la djidji. La sambo djaho, ikookebisakani nda ndenge iyokebisalini liwoso, ate wango wakokelaka sambo dja ndenge eho watitota libula e okumu e Mwengei. ²² Kaikonde, pukapuka dja elimo edjei libalano, mwemu, logoo, motema molai, olamu, ondjimi, ²³ motema molamu, owatekesi. Eti la pui eesi enge ekwamalelaka sambo djaho. ²⁴ Alidji, wango wadjei wato wa Kilisito Yesu omoakia la ekulusu wenge la ononi eho pe la posa eho. ²⁵ Inga todja amokalo la elimo, todjake pe osombi mongindji la elimo. ²⁶ Totilukake oaenesi ate toayeti wadji.