¹ Wamanima, inga te moto asakela liwoso ate ayewe eho, ino wango wadjei la makoki ma elimo, mekani omonanoli la elimo e logoo. La engele eho owe amene pe awadhende, gala te owe omekame. ² Kpalanani migbali ino la ino, la eho nde eengiani pui e Kilisito. ³ Inga moto abundua ate adjei moto o otwa engele edjei inde moto pamba, akokosaka mamungwene mande amene. ⁴ Moto la moto ameke tomo djande ndjongo nde akotota loyi eyakumisake la eho la inde amene, laate atiaengesaka la oeti moto. ⁵ Laate moto la moto akomeka mogbali monde amene. ⁶ Ewongi moto kpaa okotiesamaka liloba ahakale ndambo e iho djande kpaa la moto ongo okomotiesakolaka. ⁷ Otiakoseni: Mwengei ati moto modendiake. Laate enge moto akoonaka eho nde akobuka. ⁸ Laate moto ongo okoonaka la wenge ende akobuka bumakolo enge elongoyi la wenge wande, kasi moto ongo okoonaka la elimo akobuka mokalo mo libela enge elongoyi la elimo. ⁹ Eho enge, totidhe okeli enge edjei olamu, laate tokobuka la engele enge eengi, inga totilembe. ¹⁰ Inga todja ngonga enge ewongi la eho,towakelele wato kpaa enge edejei olamu, kasi oetesi wango wadjei wamaangasu ndondo e ondjimi. ¹¹ Dhendani ndene edhingi mbai la madhingo masungu masungu la mawo ma mbai amene. ¹² Wango kpaa wakolukaka oeneni olamu la wenge iwo nde wakootomakani otenane kombeni, laatewatiene odjidji la loyi e ekulusu e Kilisito. ¹³ Laate te iwo wango watenani kombeni watitosaka pui, kasi wabali ino otenane kombeni laate watote ema eyakumisake la eho la wenge wanu. ¹⁴ La ngambo e mbai, itiakumesa la ema teeti, olongwesi ndji ekulusu e likumu lasu Yesu Kilisito. La mboka ende moki mwaakiani la ekulusu la gbondo e mbai pe mbai la gbondo ewu. ¹⁵ Laate otenani kombeni eti la tina, ndenge kikima inga otitenane kombeni, kasi odjei mowotami moohola la Yesu eho nde edjei la tina. ¹⁶ Wato kpaa wango wakobilia maa matiesakoli, logoo la motema magba edjei la iwo, la Isalayele e Mwengei ¹⁷ Opoti keke moto tueti atibate mbai la ewedje, laate ekogbalaka la wenge wa mbai wihaleli wa LIkumu Yesu. ¹⁸ Wamanaima, logoo e sungu e Likumu lasu Yesu Kilisito edjei la elimo enge ekoeneseke ino. Amina.