¹ Ikoasaka ate ango mototi o libola adjei yo mana mokeke atikesene la motuke, te ndenge edjei inde memene wiho kpaa. ² Adjei la mawo ma wakapita pe la wato wa otomu, tee lisio linge sango awonate gala ate apote. ³ Ndenge kikima pe la iso ahala, ango edjaki iso wana wakeke, tonanganali la wotuke jda sambo keke dja moki. ⁴ Kasi ango angele eho eengali, Mwengei amotomali mana onde, ongo moli mwesi amowotali, pe ongo odjakali sese e pui ⁵ laate awalongose wango wadjakali sese e pui, pe awakalese, ndjongo iso pe Mwengei atotote pe atowumese wana wande. ⁶ Kaiko nde nda edjei ino wana, Mwengei atomi elimo e mana onde la mitema masu pe ekopamaka ate: Abba, Wawa. ⁷ Eho enge, oti alidji motuke kasi mana; pe inga odja mana, odjei pe mototi e libula la ligamesi e Mwengei. ⁸ Kaiko nde, ango etimoyewalini ino Mwengei, la engele eho odjakalini watuke la wango wati pendja wamweingei. ⁹ Kasi sikalandjo nda emoyewi ino Mwengei, te sikala nda Mwengei owoyewini, nda ndenge alidji okowongwelakani sambo keke keke dja pamba pe enge edjangi gbondo pe obalini alidji edjei watuke waho?. ¹⁰ Okotemeiyaka masio la ndebo pe wiengele pe la wilanga! ¹¹ Ikoyangelaka ino, laate edjei nda iyowenelini odjidji saa pamba. ¹² Wamanaima, iyakongini la ino, owume ndenge edjei mbai pe mbai idjakali nda ndenge edjei ino. ¹³ Oyewini ate edjei ndenge edjakali mbai la ekoni la wenge nde oyotiesakolalini mbala e liwoso mboli ndamu. ¹⁴ Te ekoni enge edjakali la wenge wa mbai, eomekalini, otitonani eho, otilumbalini te soi pe otiwokalini mbai ndowu, kasi oyambalini mbai nda ahumbwa e Mwengei, nda Kilisito Yesu inde amene. ¹⁵ Ndjongo eni olamu enge edjei ino la eho? Laate ikoohekelekeni eyaseli ate, inga eho ekoki odjei olamu, okokini olongosi maiso manu ohekeleni mbai. ¹⁶ Pe sikalandjo, iwumi monguna monu la ndenge ikoowaselakani ino meemene? ¹⁷ Wakoolukakani la egalela, eti ndenge elemu, kasi wabali ate wakawole mbai la ino, laate owalukeni la egalela. ¹⁸ Kaikonde, eti olamu engele kpaa waolukeni la egalela la gbondo eesi elamu, kasi te ndji engele enge edjei mbai la ino. ¹⁹ 19 Wana wa mbai, wango idjei alidji la ekoni e wotake tee engele Kilisito akokelama ndondo e ino. ²⁰ Kasi idjaki la posa ate edje la ino mongindji sikala pe osololi la ino ndenge eeti, laate mayele masili mbai la tina enu. ²¹ Ndjaselani mbai, ino wango obali odjei sese e pui, otiokakani pui? ²² La eho, edhingamate ate, Abalayama adjakali la wana wapele waale, mwesi la mana o moli motuke pe mwesi la moli moikake. ²³ Kasi mana o moli motuke awotamate ndenge wato wakowotamaka, ongo o moli moikake la mboka e liwuna. ²⁴ Sambo djaho edjei nda elima, laate wali waho wainei libalano liwale, eesi e mokoli mo Siona, eho edjei owoti wana wadje watuke, pe eho nde Agai. ²⁵ Kaikonde Agai oho einei Siona, mokoli mwesi mo Alabia, pe aengi la Yelusalema maamasio, laate adjei motuke mongidji la wana wande. ²⁶ Kasi Yelusalema mboka e likolo edjei la lipanda, pe adjei ngbasu. ²⁷ Laate edhingama ate: Yemele, owe moli ekomba ongo otiwotaka, pama pe humba pui, owe moli ongo otiokaka ekoni e wotake, laate wana wa moli ongo omotonali iwo wadjei ngbii oleki wana wa ongo odjei la molome. ²⁸ Kaikonde iso, wamanaima, todjei wana wa liwuna ndenge edjakali Yisaka. ²⁹ Kasi edjei saa ndenge eho, ongo awotamali ndenge wato wakowotamaka, apotali oenesi odjidji ongo owotamali la ndenge e elimo la engele eho, sikala ndjo pe ndenge kikima. ³⁰ Kaikonde lidhingeli liasi wono? Umba la moli motuke la mana onde laate mana o moli motuke atitota te maa keke libula mongindji la mana o moli odjei la liwala. ³¹ Eho enge, wamanaima, iso totidje wana wa moli motuke, kasi o moli ongo odjei la liwala.