¹ Ino wagalatia wato wadjangi lokenge, ndai aokpalini la mboka mbe? Ino waa wato, la maiso manu, Yesu Kilisito aasame ohola ate aakamali la ekulusu. ² Dengayo dji sambo idjui mbai etie ino: Ototalini elimo nde la tomo dja pui inga la ndenge endjimali ino sambo djinge eokali ino? ³ Odjeini nde wikete ndjo? Opotini yo obateli sambo dja elimo motema, sikala osukiani obateli motema sambo dja wenge? ⁴ Oenelini odjidji ngbii saa pamba? Inga ekodjaka saa pamba. ⁵ Moto ongo akohakani ino elimo pe akokelaka sambo dja okulu ndondo enu, akokelaka eho nde la smbo dja pui inga laate ondimalini sambo djinge eokalini ino? ⁶ Saa ndenge Abalayama amondjimali Mwengei, wamowelali moto molamu. ⁷ Oyewini ate wango wakonanganaka la ondjimi nde wadjei wana wa Abalayama. ⁸ Kaikonde edhingo, nda ndenge eenanali liwoso ate Mwengei atanga wato wa weeti witondo wato walamu la loyi e ondjimi, etiesamakolali mboli ndamu etie Abalayama ate: La mboka e owe witondo kpaa wikopambwama. ⁹ Eho nde, wakonanganaka la ondjimi wakopambwamaka mongindji la Abalayama moto molamu. ¹⁰ Wango kpaa wakobataka motema la sambo dja pui, walakelami obe; laate edhingama ate: moto kpaa ongo odjei okeli sambo djinge kpaa etidhingame la buku dja pui alakelame obe. ¹¹ Alidji toeni la hoho ate Mwengei atitangaka moto toeti moto molamu la loyi e pui, laate moto molamu akodja la mokalo la ondjimi. ¹² Kaikonde pui etioongoko odjei la ondjimi, kasi moto ongo okotosaka eho akodja la mokalo la mboka eho. ¹³ Kilisito atosombali pe atolongosali la elakeli mbe e pui la ndenge aumali elakeli mbe la eholo esu, laate edhingama ate: moto kpaa ongo aakami la ekulusu alakelame obe. ¹⁴ Gbondo eho edjei ate lipamboli la Abalayama edje la mboka e Yesu Kilisito la loyi e witondo, po la mboka e ondjimi esu, totote elimo enge ewunanate. ¹⁵ Wamana ima wa pele pe wa wali, ikwasaka ahala nda ndenge e wato. Ondjimani enge endjimani, ingate edjei e moto, moto tueti atilumba eho te ate asumbeliye djeeti sambo likolo laho. ¹⁶ Kaiko nde mawuna mango, wamoyewisali eho Abalayama pe liwota lande. Etiase ate: Etie moto, nda ndenge edjakali ngbi, kasi nde etie moto saa mwesi ate: Etie wana wa owe, enge edjei Kilisito. ¹⁷ Ikwasaka ndjo: Ondjimani enge Mwengei andjimaate gala, pui enge edjate mbula kama inei la ntuku isato mbuse etidje olongosi eho pe liwuna laho etiolame. ¹⁸ Inga libula ekototama la pui, etikine la tina e liwuna, kaikonde Mwengei ahali eho Abalayama la logoo la mboka e liwuna. ¹⁹ Gbondo e pui edjei nde? Eho eboliamate la oenesi la hoho sambo e obuki pui, tee ango liwota eho wamohali liwuna akodja, pe ahamali la mboka e waahumbwa la ewo e moto ongo odjei nda polongo. ²⁰ Kaikonde moto ongo odjei nda polongo atidjaka la ebete enge moto adjei saa inde amene, kasi Mwengei adjei saa inde amene. ²¹ Pui edjeinde owamaleli mawuna ma Mwengei? Te te ma okeke! Inga wakohaka pui eesi ndjo enge eengi ohi mokalo, nda moto atangami moto molamu la gbondo e pui. ²² Kasi edhingo enangali wiho kpaa la boloko e lisumu, laate liwuna enge elongoyi la omondjimeli Yesu Kilisito ehekelame la wango wandjimate. ²³ Kaikonde liwoso ate ondjimi edje, pui edjakali otobanei, etonangali iso la boloko, todjakali olambeli ondjimi enge e ongoli oeneni. ²⁴ Eho enge, pui ewumali moinei mosu ongo odjakali ototiesakoli etie Kilisito, laate totangeme wato walamu la ondjimi. ²⁵ Kasi sikalandjo nda ndenge ondjimi edji, totitiesamaka kine la moinei. ²⁶ Meemene, odjeini ino kpaa wana wa Mwengei la mboka e ondjimi enge e mondjimelalini ino Kilisito Yesu. ²⁷ Wato wango kpaa wapatali la malia la tina e kilisito wamokpaliga kilisito. ²⁸ Moyuda ati kine te Mogeleki, motuke atikine, moto ootwa pe te, molome atikine, moli pe te; laate odjeini ino kpaa moto mokikima ndondo e Kilisito Yesu. ²⁹ Inga odjani wato wa Kilisito, odjeini pendja litoto la Abalayama, watoti wa libola owunanake.