¹ Mbuse e mbula liomo la inei itelali alidji la Yelusalema mongindji la Balanabasi mpe la Tito. ² Itelali ongo la tina e saki eeneli mbai, pe iwayinyali mboli ndamu enge edjei mbai otiesakoli ndondo e witondo; itiwayewesali eho la maiso ma wato kpaa, kasi liwoso la wango wadjakali wato wasungu, laate etidje ate adjaki otili obangu te itilali obangu saa pamba. ³ Kaiko, Tito ongo odjakali la mbai, atieneli obe otanani kombeni te ndenge edjakali inde mo Geleki. ⁴ Kasi la wa maangbasu wa moleho wango walingelali la mayele, wango wayalingesali la oyewi lipanda laa su enge edjaki iso la eho la odjei mongindji la Kilisito Yesu, la otowumesi mituke pendja. ⁵ Totiwaokali wango wato, te ma mokeke, laate odjeni la meene e mboli ndamu engele kpaa. ⁶ Kasi wango wayenali ate wadjei wato wa tina edje wadjakali wato wa nda ndenge gala, eho edhenditi mbai, Mwengei atidhendaka elongi e moto, wango wato wasungu atihali te ema ekikima enge eholi. ⁷ Kaiko ango waenali ate itoti mboli ndamu la otiesakoli wango watitenane kombeni, ndenge Petele atotali eho la wato wango watenani kombeni. ⁸ Mwenge, ongo omokeleli Petele toma o watenani kombeni, akeli mbai pe toma e wato wa witondo. ⁹ Ango wadjali oyewi logoo esungu enge Mwengei aeneseleli mbai, Yakobo la Kepa la Yoani, wango wadjakali makule, wahali mbai la Balanabasi ewo e lilome la oenesi ate wandjimi iso toke etie witondo, kasi iwo etie wato wango watenani kombeni. ¹⁰ Watoaselali tosumbwake wato watundake. Pe ikelali ndenge kpaa ate ikele ndenge eho. ¹¹ Kaikonde ango edjia Kepa la Atiokia, omoyamalelali makasi laate aenganakali la okwisami. ¹² Liwoso ate wato wango walongwali atie Yakobo wadje, adjakali olaki mongindji la wato wa witondo; kasi ango edjali iwo, apatali otili pe oguli wenge la owangi wato wango watenani kombeni. ¹³ Weeti Wayuda pe la wango watikalali wamobiliali la ekosako eho. Te Balanabasi pe awabiliali la ekosako ewu. ¹⁴ Ango eeneli mbai watidjakali osombi alima la ookani wo meemene e mboli ndamu, iyasali la Kepa liwoso la wato kpaa ate: Inga owe, Moyuda, odjei la mokalo nda wato wa witotondo, kasi te nda Wayuda, nda ndenge okondjimaka ate wato wa witondo wabiliyi ekaleli e Wayuda la mokalo mo wu? ¹⁵ Iso todjei Wayuda e wotamake, kasi te wakeli mbe e witondo. ¹⁶ Nda eyewi iso ate moto aktangamaka moto molamu, te la tomo dja pui, kasi saa la ondjimi enge amondjimeli Kilisito Yesu, iso pe tomondjimeli Kilisito Yesu, laate totangemate wato walamu la ondjimi enge tomondjimeli Kilisito, kasi te la tomo dja pui, laate moto tueti atitangema moto molamu la tomo dja pui. ¹⁷ Sikala iso, ango edjei iso oluki otangemi wato walamu la mboka e Kilisito, kasi tueneni iso amene pe nda wato wabe, Kilisito akoki okeleli obe? te, te maa keke. ¹⁸ Laate inga sambo enge saa ebukali mbai imayia eho alidji, ikoenesaka ate mbai amene ekobukaka pui. ¹⁹ Kasi mbai , la mboka e pui iguali la sambo dja pui laate iwume moto o mokalo la sambo dja Mwengei. ²⁰ Iyakiamali la ekulusu ebete ekikima la Kilisito. Eti mbai aleeti moto odjei la mokalo, kasi edjei nde Kilisito moto odjei la mokalo la mongidji la mbai. Meemene, mokalo mungo modjei mbai la eho sika la wenge idjei la eho la ondjimi enge emondjimeli mbai mana o Mwengei, ongo obalali mbai pe ayahekelali la loyi e mbai. ²¹ Itilumbaka logoo e sungu e Mwenei; laate inga omeemene ekodjaka la mboka e pui, Kilisito agwali saa pamba.