¹ Ase Saulo, nda edjakali inde oani koto oluki owaoli watutiani wa Likumu, akeeli atie nganga Mwengei mosungu ² amoongoli wikpata la loyi e wasinagoga winge widjei la Damasi, laate ahele koto akpale la Yelusalema, moto kpaa ongo okomogboto inde, ongo ogemei mango matiesakoli, edje pele inga wali. ³ Ndjongo nda edjakali inde la okendo, aumali ahue la Damasi, la gbutugbu, ngbai esi elongwali likolo, engalali la lisukasuka lande; ⁴ akwali la mbume, aokali moli mwesi eyasia la inde ate: ''Saulo, Saulo lande okoeneseke mbai odjidji? ⁵ Saulo awongosali: ''Owe ndai, Likumu?'' Likumu awongosali: ''Edjei mbai Yesu ongo okomoeneseke owe odjidji. ⁶ Ase yamala, lingela la moki wakoasela enge ewongi la owe okeli. ⁷ Pele djinge wadjakali oki la inde mongindji, wayamalali bii, waokali, la omeemene, modudu mo moli mwesi, ase watimoeneli moto. ⁸ Saulo ayamalali, inga te ate maiso mande maduhuanali matidjakali oeni ema. Wamohelali ewo, wamokpalali la Damasi. ⁹ Ayabatali masio masato odjangi oeni ,olaki, la okengi ¹⁰ Ongo la Damasi motutiani mwesi adjakali ongo, kombo ende Ananiasi. Likumu aasali la inde la mboka e saki ate: ''Ananiasi!'' Ananiasi awongosia: « Mbai ndolo Likumu.'' ¹¹ Likumu aasali la inde: «Yamala, keke la mboka enge ewelani Alima, koto la monguta mo Yudasi, moluka moto mwesi kombo ende Saulo, moto o Talasisi. Laate denga, akoyakongaka. ¹² Aenia la saki moto opele mwesi kombo ende Ananiasi alingelia, amobatelali koto mawo laate awongwanele oeni.» ¹³ Ase Ananiasi awongosali: ''Likumu, ioki atie wato ngbii mboli e ohongo moto pele, sambo ngbii mbembe djinge awakelali wasatu wa owe la Yelusalema. ¹⁴ Koto ango edjei inde la okumu wungo wanganga Mwengei makumu wamohekeli inde ehelake la miliki wango kpaa wakodhumbeyaka kombo e owe.'' ¹⁵ Ase Likumu aasali la inde ate: keke, laate ohongo moto opele adjei teni enge ewoni mbai la okpali kombo e mbai atie wapagano koto atie makumu, koto atie wana wa Isalayele; ¹⁶ Ikomoinya la hoho ngbii e sanbo djinge ekoenele inde odjidji la loyi e kombo e mbai. ¹⁷ Ananiasi akeeli, alingelali la monguta muho, amobatelali mawo, aasali koto ate: ''Saulo, manima, Likumu, Yesu ongo o opumbelali la mboka enge edjaki owe odji, atomi mbai ate owe oene alidji, koto otume la elimo satu.'' ¹⁸ La mbala kikima, wihoo wiesi nda poso dja su elongwali la maiso mande ekwali, apotali koto oeni, ayamalali, apatali koto; ¹⁹ alakali wilaka, oteteli ewongwali la wenge. Saulo aetesali ma masio la watutiani wango wadjakali la Damasi. ²⁰ La mbala kikima inde apotali otiesakoli la wasinagoga ate Yesu adjei mana o Mwengei. ²¹ Wango kpaa wadjakali o mooki, wadjaakali oyahueli, la oasi ate: ''Oholo eti moto opele ongo odjakali oandji wato wango wakodhumbeyaka ehenge kombo la Yelusalema, koto ongo odjaki ahala la kole ehele pendja, awakpale iwo la miliki atie wanganga Mwengei makumu? ²² Ase, Saulo adjakali alidji ndji ototi okulu ngbii, adjakali koto owasukesi Wayuda wango wadjakali oyabati la Damasi ango edjakali inde oenesi ate Yesu adjei Kilisito. ²³ Mbuse e masio ngbii Wayuda walingeli likita laate wamoole. ²⁴ Mwano mowu modjali oewani atie Saulo. Wadjakali olambeyanali la moluhe use la likolo, laate wamoole. ²⁵ Watutiani wande wamototali, wamodjimbali la likolo la mboka e ngungu esi enge edjaakali la etutu, wamodjimbali ndondo e modjangi. ²⁶ Ango ewumali inde la Yelusalema, Saulo akeli oyakokei la watutiani, ase iwo kpaa wadjakali omowangi, laate watigemeiyali ate adjei motutiani. ²⁷ Aseko Balanabasi adjaali omogamesi, akeli la inde atie watoma, Saulo awasumbelali mboli ndenge emoenali inde Likumu la mboka koto ate inde asololali la inde, koto ndenge eyaselali inde la mogalia la kombo e Yesu ndondo e Damasi. ²⁸ Ayabatali mongindji la iwo, adjakali olingeli koto opumbi la Yelusalema. Adjakali oasi la mogalia la kombo e Likumu Yesu ²⁹ adjakali osololi la obatelani kokia la Wayuda wa monoko mo Geleki. Ase iwo wadjakali olukani wa moole. ³⁰ Ango wamanima wayewali loyi luho, wamodjimbali la Kaisalia, wamotomali la Talasisi. ³¹ Lingomba e Yudea kpaa, e Galilea la e Samalia elingelali la engele esi e logoo, edjakali omaani; koto nda edjakali eho osombi la omowangi Likumu la ligamesi e elimo satu edjakali obeki. ³² Petele abengeyali la meki maho kpaa, ayadjimbali koto atie wasatu wango wadjakali oyabati la Lida. ³³ Ongo amogbotoli moto mwesi kombo ende Eneasi, ongo olangalali la epee wilanga mwambi laate aguali makolo. ³⁴ Petele aasia la inde: Eneasi, Yesu Kilisito akookalesaka. Yamala, wongela koto epee e owe. Ayamalali la mbala kikima. ³⁵ Wato kpaa wa Lida la wango wa Salona, wamweneli inde, wayakukolali atie Likumu. ³⁶ Ase la Yope edjakali la motutiani mwesi kombo ende Tabita, ongo, inga wakukola einyei ate Dolokasi. Inde atumali la sambo ndamu koto la makao e motema magba enge edjakali inde ohekeli. ³⁷ La masio maho akwali la ekoni, agwali. Wamokpololi, wamolangeyali la mwange mo likolo. ³⁸ Nda Lida esukiani la Yopa, ango eokali watutiani ate Petele adjei la moki moho, wamotomelali pele iwale la oyakongi la inde ate: ''Toongi la owe, otiene minga odji atie iso.'' ³⁹ Petele ayamalali, akeli mongindji la iwo. Ango eumali inde ongo, wakeeli la inde la mwange mo likolo, wali kpaa wango wagweli pele wadjali atie inde, wadjakali oleli la oinyei wisindji wa sese koto wa likolo winge Dolokasi awasonelali ango edjakali inde mongindji la iwo. ⁴⁰ Petele apumbesali moto kpaa saa, amaali mawuli, ayakongali, ayakukolali ongo edjaaki wenge, aasia: ''Tabita, amala! Adhuholali maiso, ango emwenia inde Petele, ayabatali. ⁴¹ Petele amohali ewo, amoyamalesali, awelali wasatu la wali wango wagueli pele, awainyali iwo inde la mokalo. ⁴² Loyi luho, eyewanali la Yopa kpaa, wato ngbii waumali wagemei wa Likumu. ⁴³ Petele aumwali la moki mo Yopa masio ngbii, ayabatali la monguta mo Simoni mowongeli mo ekombaka e nama.