¹ Kaikoase moto pele mwesi adjakali la Kaisalia, kombo ende Koloneli, likumu e liboleani e wasoda wa Italia. ² Inde adjakali moto ongo oyahi la oyakongi koto ongo okomowangaka Mwengei mongindji la wato kpaa wa monguta monde, adjakali ohekeli wato makao e motema magba koto engele kpaa okeli iyongolo atie Mwengei. ³ Ahue e engele e libwa e wuse, aeneli ngbai la saki, ahumbwa mwesi o Mwengei alingelia atie inde, aasia la inde ate: ''Koloneli!'' ⁴ Koloneli amodhendali ahumbwa, ndenge eumali inde owangi, aasali ate: ''Nda loyi, Likumu?'' Ahumbwa amwaselali ate: ''Oyakongi wo owe koto makao ma owe e motema magba eteli liwoso la Mwengei, koto aosumboyi owe. ⁵ Sikandjo watoma wato ongo la Yopa koto mowela Simoni, ongo omoweli iwo Petele. ⁶ Moto oho ayabati modjidji atie Simoni mwesi ndjo, mowongeli ekombaka e nama, monguta monde mosukiani la ewale. ⁷ Ango ahumbwa ongo odjakali oasi alongoiya, Koloneli awelali pele e wato wande wa otomo e monguta la soda mwesi ongo oyahali la oyakongi ndondo e wato wango wakomokelelaka engele kpaa. ⁸ Koloneli awasumbelali mboli kpaa, awatomali la Yopa. ⁹ Ekundu eho, ango edjakali iwo la okendo owu, wadjakali koto oyandongbi la gbata, Petele atelali likolo la monguta ahue e engele e motoba laata ayakonge. ¹⁰ Aokali ndjala, alukali olaki, ndji wakomowongelekeyo ema ndakake, akwali la ehei, ¹¹ aenali likolo lidhuhania, ema esi eyadjimbia nda esindje esungu ekandani songo kpaa inei, edjali oyadjimbi la mbume. ¹² Ndondo eho nama ndenge kpaa e makolo manei, nama djinge ikogulumaka la mbume la mbulu dja likolo. ¹³ Moli mwesi emodjeleli ate: ''Yamala, Petele, wola koto laka.'' ¹⁴ Ase Petele aasai ate: ''Te ndjongo Likumu, laate ilakakiyo ema te esi e osoto inga koto e gbomoko.'' ¹⁵ Moli muho mwasali la inde alidji, la mbala e wale ate: ''Owe dhee oweli osoto wihoo winge wilangesi Mwengei.'' ¹⁶ Ekelanali ndjongo mbala esato, la mbuse eho enge esindje ewongwali likolo. ¹⁷ Kaikoase, ango adjaakali oyahueli inga ungo oeni inde la saki edjei la nda kole, dhenga! pele wango wawatomali Koloneli wadjakali ohueli monguta mungo moyabati Petele, wayamalali la moluhe. ¹⁸ Wahuelali poopo inga Simoni ongo omoweli iwo Petele akoabataka ango. ¹⁹ Ango edjaaki Petele oyahueli la loyi e saki eho, elimo easali la inde ate: Dhenga! Pele isato wakoolukanaka.'' ²⁰ Yamala koto yadjimba sese, keke mongindji la iwo, otikokeye, laate mbai moto iwatomi. ²¹ Petele ayadjimbali sese atie pele djaho, aasali ate: ''Dhenge! mbai nde moto okomolukakani ino. Odjini ahala la nda kole? ²² Waasali ate: Koloneli Likumu mwesi o wasoda, moto o sambo ndamu koto moto ongo okomowangaka Mwengei, moto ongo moki kpaa mo Wayuda ekoaselaka la ndenge ndamu, inde ainyani la ahumbwa mwesi mosatu, la oowelesi owe ongo la monguta laate aoke sambo djinge widjei owe la eho la omoaseli. ²³ La ndjongo, Petele awalingesali koto awabatesali. La ekundu eho, ayamalali, akeeli la iwo mongindji, koto wamanima wadji wango walongwali la Yopa wakeeli mongindji la inde. ²⁴ La ekundu eho, walingelali la Kaisalia. Koloneli adjakali owalambeli, agbotonesali wato wa oliye wonde, koto wiino wande wa otomo. ²⁵ Ango elingelali Petele, Koloneli adjaali ondongbani la inde, akwali sese e makolo mande, ayaimbali. ²⁶ Ase Petele amwamalesali, aasia: ''Yamala! Mbai koto idjei ndji moto.'' ²⁷ Ango edjaalii Petele okpomesani la inde, alingelali, agbotoli wato ngbii wayakokeyi. ²⁸ Aasali la iwo ate, ''Ino oewini ate ewongiti la Moyuda aboleyane inga te oyandongbi ahue e moto e moki modji. Ase Mwengei aenesi mbai ate iengiti omoweli moto te mwesi osoto inga te gbomoko. ²⁹ Eho lenge idji, odjangi obati kokeya ango ewelali ino mbai. Eho lenge ikohuelakani kole enge ewelini ino mbai.'' ³⁰ Koloneli amuaselali ate: ''Ekeliga masio manei, ango edjaki mbai oyakongi ndondo e monguta mo mbai la engele e libwa, dhenga, moto opele mwesi awumalali liwoso la mbai la wisindje wingalake. ³¹ Aasali ate, Koloneli! oyakongi e owe eokani alidji egemeiyani koto, makao ma owe e motema magba emungwani la maiso ma Mwengei. ³² La ndjongo, toma wato la Yopa, mowela Simoni, ongo omohi iwo kombo Petele. Moto oho akoyabataka la monguta mo Simoni, mowongeli ekombaka e nama, ahue e ewale. ³³ La ndjongo, iwatomi wato atie owe, okeli olamu la ndenge edji owe ahala. Ndjongo sikala iso kpaa todjei liwoso la maiso ma Mwengeila la ooki sambo kpaa Mwengei akoumesa atie owe. ³⁴ Petele adhuholali monoko monde, aasali ate: ''Meemene ieni ate Mwengei atiwonoko mbanda. ³⁵ Ase ndondo e maliye kpaa, ongo okomowanga koto okokela sambo ndamu agemeiyani la inde. ³⁶ Awatomelali wana wa Isalayele engbundu la owatiesakoli mboli ndamu e logoo la mboka e Likumu Yesu Kilisito, inde adjei Likumu e wato kpaa. ³⁷ Ino oewini wungo wokoasanaka wiati kpaa ndondo e Yudea, opoti la Galileya mbuse e lipatisa linge litiesakolate Yoani; ³⁸ linge limodhendji Yesu o Nazaleta, ndenge Mwengei amomunolali maita e elimo satu koto la okulu. Akpandali moki moho kpaa, adjakali okeli olamu koto okalesi wango kpaa waeni odjidji la etota, laate Mwengei adjakali mongindji la inde. ³⁹ Iso todjei watatoli e sambo kpaa djinge wikeli inde la moki mo Wayuda koto la Yelusalema. Wamobakali la ekulusu, wamoolali koto. ⁴⁰ Mwengei amobasisali moto oho lisio la misato, amodhendesali la hoho, ⁴¹ te atie wato kpaa, ase atie watotoli wango waonanate la Mwengei liwoso, atie iso, wato wango tolakali koto tokengali mongindji la inde mbuse e obasi wonde ndondo e wagui. ⁴² Atomali totiesakoli wato koto la ohekeli litotoli lilamu ate inde adjei Moto ongo obatani la Mwengei la odjei mosambesi e wato wa mokalo la wango wagui. ⁴³ Watiesakoli kpaa wakohekeleke li litotoli la kole ende, ate moto kpaa akomogemeiya inde, akolimbesana masumu la kombo ende. ⁴⁴ Ndji ango edjaaki Petele oaseli sambo djaho, elimo satu ewadjimbelali wango kpaa wadjakali ooki engbundu eho. ⁴⁵ Wagemei wango wadjaali la Petele mongindji, wango wadjakali weesi la wango watenani kombeni, wakamwali, laate likao e elimo esatu ekosuanaka likolo e wapagano. ⁴⁶ Laate wawaokali wakokpamaka la madji minoko koto wakomogemeiyaka Mwengei. Ndjongo Petele awongosali ate, ⁴⁷ ''Moto aengi nde otonesi malia laate wa wato watienge opatisani iwo wato wakondji elimo satu ndji ndenge iso koto tokondji?'' ⁴⁸ Atomali ate wapatesane la kombo e Yesu Kilisito. Wamoongoli ate ayabate ma masio mongindji la iwo.