¹ Watutiani la wa maanango wango wadjali la Yudea waokali ate wapagano koto wayambali engbundu e Mwengei. ² Ango etelali Petele la Yelusalema, wagemei wango watenani kombeni wapotali okokeyani la inde; ³ Wadjaali oasi ate: ''Akeeli la monguta e wato wango watenaniti kombeni, alakali koto mongindji la iwo!'' ⁴ Ase Petele apotali oasi koto owalumboleli loyi leesi liesi, aasia, ⁵ idjakali oyakongi ongo la gbata e Yopa, ndondo e ehei, ieneli saki, ema esi eengemeni la esindje ebubake enangani la wisuki waho ineii, edjali oyandjimbi likolo, epotali odji atie mbai. ⁶ Ango edjakali mbai odhendji olamu, ieneli nama djinge ikosombaka la makolo manei, la nama e motulu, la wandjoo, la wambulu wa likolo. ⁷ Iokali koto moli mwesi mokoaselaka mbai ate: Amala, Petele, ola koto laka! ⁸ Ase iyaasali: Te lisio, Likumu; laate ema e osoto te enge egbomoko etilingela la monoko mo mbai. ⁹ La mbala e wale enge moli eokanali alidji likolo easali ate, enge Mwengei alangesi, owe otidhende ate edjei osoto. ¹⁰ Moli moho mowongosali mbala esato, Mbuse eho wihoo waho kpaa wiwongwali likolo. ¹¹ Denga, ndji la enge engele, pele isato wayamalali liwoso la monguta mungo modjaakali iso, walongwali la Kaisalia, wawatomali atie mbai. ¹² Elimo easali la mbai ate keke mongindji la iwo, itikokeye te okeke. Ase wa wamanima koto motoba wakeeli mongindji la mbai, tolingelali la monguta e moto opele oho. ¹³ Atoaselali ndenge emoeneli inde ahumbwa ayamali la monguta monde koto ndenge emoaselali inde ate, toma wato la Yopa, mowela Simoni, ongo okomowelaka iwo Petele. ¹⁴ Akoasela sambo djiinge ekokalesa owe la wato kpaa wa monguta mo owe. ¹⁵ Ango adjali mbai oasi, elimo satu ewadjimbelali , nda ndenge etoyadjimbelali la lipotele. ¹⁶ Eho lenge imungolali alidji engbundu e Likumu, ndenge edjaaki inde oasi ate: Yoani apatesali la malia, ase ino okopatesanani la elimo satu. ¹⁷ Eho lenge, inga Mwengei awahekeli likao ndenge ahali koto iso wango tomogemeiyali Likumu Yesu Kilisito, mbai ndai laate ienge omotekesi Mwengei? ¹⁸ Mbuse e iwo ooki ndjongo, wagemeiyali, wamohali koto Mwengei otwa, waasia: ''Meemene, Mwengei ahekeli koto wapagano nano e okukoli motema la loyi e mokalo. ¹⁹ Wango wayandjali la odjidji wungu epumbali likolo e Setepano, wakpandali tee la Penisia koto la Sipele, koto la Antiokia, ase watidjakali oasi loyi atie moto te moikima, ndji atie Wayuda. ²⁰ Ase ndondo ewu edjaakali la wato wadji wa Sipele koto wa Silena wango walongwali la Antiokia, wapotali osololi la wato wango wakoasaka monoko mo Geleki, wadjaakali otiesakoli mboli ndamu e Likumu Yesu ²¹ Ewo e Likumu edjali la iwo, aleeti wato ngbii wango waumali wagemei, wayakukolali ngambo e Likumu. ²² Mboli enge ewadhengi eumali la matoyi e lingomba linge lidjaakali la Yelusalema, wamotomali Balanabasi tee ongo la Atiokia. ²³ Ango ewumali inde, aleeti aeneli magba ma Mwengei, aemelali, apotali owahekeli iwo kpaa mogalia ate, wanangane la Likumu la motema moikima. ²⁴ Laate adjali moto molamu, atumi la elimo satu koto la oyambi. Ngbii e wato wadjaali atie Likumu. ²⁵ Balanabasi akeeli la Talasisi, la omoluki Saulo wiholo kpaa. ²⁶ Ango emobgotoli inde, adjaali la inde la Atiokia. Eho lenge ekelanali ate elanga kpaa wadjakali oboleyani mongidji la iwo la lingomba koto watiesakolali ngbii e wato, koto edjaali la Atiokia nde watutiani wawelanali mbala e poo wakilisito. ²⁷ La masio maho watiesakoli walongwali la Yelusalema, wayadjimbia la Atiokia. ²⁸ Mwesi la iwo, kombo ende Agabusu, ayamalali, apotali otiesakoli la mboka e elimo ate ndjala esungu ekokwele mbume kpaa enge eyabati wato. Ehele ndjala ekwali la engele e Kolode. ²⁹ Watutiani watotali mwano, moto la moto la oengemeni la enge edjei inde la eho, la owatomeli wamangbawu wango wayabati la Yudea. ³⁰ Wakelali ndjongo; watomali eho atie wikolo la ewo e Balanabasi la Saulo.