¹ Ndji la enge engele, likumu Elode atotali mwano e oenesi odjidji wadji ndondo e wato wa lingomba. ² Amoolesali la kpoka Yakobo, manango o Yoani. ³ Nda eeneli inde ate edjaali olamu la maiso ma WaYuda, omohelesali koto Petele. Edjaali lisio e okoke edjangi maana. ⁴ Mbuse e omoheli la omolingesi la woyogo, abanyamali la miduhe manei, modhuhe la modhuhe modjaali la wasoda wanei, laate aanali omopumbesi liwoso la wato mbuse e pasika. ⁵ Petele ayisanali ndondo e woyogo, lingomba edjakali ndji oyakongi la Mwengei la kole ende. ⁶ Ango Elode abalali omopumbesi Petele liwoso la wato, la likolo laho Petele alangalali ilo ndondo e wasoda waale ahelani la miliki miale, wasindjili liwoso la modhuhe wadjakali obanyei woyogo. ⁷ Denda, ahumbwa o Mwengei ayamalali ahue ende, ngbai esi engalali la monguta mo woyogo. Amobingali Petele la mopandji, aasia: Amala galagala! mikulu mikwali la mawo mande. ⁸ Ahumbwa oho amoaselali ate: hela mokaba mo owe koto miliki ma wikpokpo ma owe, akelali ndjongo. Gboo ahumbwa amoaselali: kpala mokoto mo owe, koto bilia mbai. ⁹ Petele apumbia, amobiliali koto. Atiewali ate enge edjakali okelani la mboka e ahumbwa edjali meemene, adjakali oeni ate edjei saki. ¹⁰ Mbuse e oyeti ebiba e wasindjili wa liwoso la wawale, waumali la modhuhe mo libende epumbelake la gbata, eyadhuholali liwoso lawu eho amene. Wapumbali, wayandongbali la mboka, ahumbwa amodheeli. ¹¹ Ango eyawongolia Petele inde amene, aasali: ieni sikandjo ate Likumu amotomali ahumbwa onde, akalesi mbai la mawo ma Elode koto la enge Wayuda wadjali olambeli. ¹² Mbuse e omungoli, akeeli la monguta mo Malia, nango Yoani, ongo omohali iwo kombo Malako, ongo wato wabolianali wadjakali oyakongi. ¹³ Ango ebingia inde modhuhe mo monguta, mana o moli mwesi o otomo, kombo ende Loda, adjaali odhendji inga edjei ndai. ¹⁴ Ango eokali inde moli mo Petele, la mwemu atidhuholali modhuhe, ase alingelali obanu ndondo, ahali mboli ate Petele ayamali liwoso la monoko mo modhuhe. ¹⁵ Waasali la inde: okondji boli. Ase inde agemeiyesali la okulu ate edjei ndjongo. Wapotali oasi ate: Edjei ahumbwa onde. ¹⁶ Ase Petele atikalali ndji ango akobingaka modhuhe, ango odhuholali iwo, wamoenali, wakamwali. ¹⁷ Petele, adjambali ewo laate wayabate logoo, awaaselali ndenge Likumu amopumbesali la woyogo, aasali alidji ate: Moaselani Yakobo la wamangbasu dji sambo. Mbuse eho apumbali, akiya la eeti eholo. ¹⁸ Ango ewumia boo, ewedje edjakali ndondo e wasoda la oewi nde emoumeli Petele. ¹⁹ Elode, amolukali wiholo kpaa, nda etimoenali inde, asambesali sindjili, atomali ate wawahekele etumbu. Alongwali la Yudea ayadjimbali la Kaisalia ayetesali ma masio ongo. ²⁰ Elode adjali la limemu la loyi e wato wa Tila la Sidonia. Wadjali oluki ookani la inde, mbuse e omolongi Balasitusu, ongo odjakali obanei mwange mo likumu, waongoli logoo, laate moki mowu modjali ototi ilaki ongo la moki mo likumu. ²¹ La kolokolo eho, Elode akpalali wisindje e okumu, ayabateli la ngbelengo ende e okumu, adjakali owaaseli sambo. ²² Wato wadhumbeyali: ''Moli mo mwengei, eti e moto!'' ²³ Ndji la enge engele, ahumbwa o Likumu amobingali, la ebili ate atimohali Mwengei otwa. Agwali, kusu emolingelali mbala kikima. ²⁴ Ase engbundu e Mwengei edjakali oteli, koto oyandjani. ²⁵ Balanabasi la Saulo, mbuse e osilisi tomo djawu, wawongwali la Yelusalema, wadjali la Yoani, ongo wamoweli Malako