¹ Ndondo e lingomba linge la atiokia edjakali la watiekoli la wayinei. Iwo waawa, Balanabasi la Simeona ongo edjaakali iwo o moweli Nigela, koto Manaena ongo otangali kelasi mongindji la Elode likumu o moki, la Saulo. ² Ango edjaaki iwo oyakongi la Likumu la okili wilaka, elimo satu aasali ate, ''Batelani mbai Balanabasi la Saulo la otomo wungo ewaweli mbai la kole eho. ³ La mbuse wakilali wilaka, wayakongali koto wawabatelali mawo, wawadheeli ate wake. ⁴ Balanabasi la Saulo, watomanali la elimo satu, wayadjimbali la Selukia, walongwali koto ongo wasombali la andondoli la oki ongo la Sipele. ⁵ Ango eumali iwo la Salamisi, wapotali otiesakoli engbundu e Mwengei la wasinagoga e Wayuda. Yoani adjaakali la iwo nda mogamesi. ⁶ Ango esisali iwo okpandji esii eho kpaa tee la Paposi, wagbotonoli la moto opele mwesi, ongo odjaakali lilando, motiesakoli mo moleho, Moyuda mwesi la kombo Bala-Yesu. ⁷ Adjaakali mwesi e wato wa memene esii, selegisi Paulosi, moto opele mwesi o lokenge. Amowelali Balanabasi la Saulo atie inde, adjaakali koto la ehoha eokake engbundu e Mwengei. ⁸ ASe lilando Elimasi ( kombo ende ekukolani ndjongo) awamalelali iwo, apotali oluki omowungesi memene esi la ogemei. ⁹ Ase Saulo ongo odjei koto Polo nda etumali inde la elimo satu, amodhengali olamu ¹⁰ aasali ate, moto otumi la moleho e ndenge kpaa koto ekaleli mbe e ndenge kpaa, owe mana o etota, owe motone mo sambo ndamu, otidhee obitesi mboka dja Likumu djinge inanolani? ¹¹ Sikandjo dhenga, ewo e Mwengei edjei likolo la owe, maiso ma owe koto makogba, otiene kine ngbai e wuse la ma engele. Ndji la enge engele ligite la molili momokwelali, apotali otatelitateli la oluki wato wamohele ewo. ¹² Memene esii, ango eeneli inde wungo loyi wokelania, aumali mogemei laate akamwali la matiesakoli ma Lkumu. ¹³ Wato waho mongindji la Polo watotali okendo o ewale opoti la Paposi waumali la Pelega ndondo e Pamipulia. Ase Yoani awadheeli, awongwali la Yelusalema. ¹⁴ Iwo walongwali ongo la Pelega, waumali la Atiokia e Pisidia. Walingelali la sinagoga la lisio la Sabata, wayabatali. ¹⁵ Mbuse eotangi pui, watiesakolali liwoso la wato kpaa, makumu ma sinagoga wawatomeleli wato, waasia: ''Wamangbasu, inga odjeini la loyi wungo woengi ogamesi wato asani eho. ¹⁶ Polo ayamalali, awahahelia ewo; aasali, ''Pele dja Isalayele la ino wato kpaa wango wakomowangaka Mwengei, okani. ¹⁷ Mwengei e wa wato Isalayele, aonoli watata wasu, abekisali wato waho ango eyabatali iwo wadjidji la moki mo Ezipeto, awapumbesali koto ongo la ewo etetelake. ¹⁸ Koto la engele e wilanga tuku inei ahelali motema la esombeli ewu la esobe. ¹⁹ Mbuse e inde ooli miki sambo la moki mo Kanana, akawolali moki la iwo la olumbi djege. ²⁰ Kpaa enge la owumoyi e wilanga kama inei la tuku itano. Mbuse e sambo djaho awahali wasambesi tee la motiesakoli Samuele. ²¹ Opoti la enge engele wamoongoli likumu, Mwengei awahali Saulo mana o Kisi, moto opele e oliye e Benyamina, wilanga tuku inei. ²² Mbuse e omolongosi, awamaleselali Davidi nda likumu. Ongo inde ahali litotoli la loyi londe , aasali koto ate: Imooni Davidi mana o Yesa, moto opele ongo nda motema mo mbai, ongo okokela sambo kpaa djinge widjei mbai la posa eho. ²³ Tee la wana e moto oho la otutei liwuna lande, Mwengei adjeleli Isalayele mokalesi, Yesu. ²⁴ Liwoso ate Yesu aume, Yoani atiesakolali la hoho atie wato kpaa wa Isalayele patisa enge edjei elembo ekukolake motema. ²⁵ Ango eumali Yoani ahue e gboo e mboka ende, adjakali oasi ate, ''Ino omongoini ate mbai idjei ndai? Mbai iti inde.'' Ase, denga, moto mwesi ageleli mbuse e mbai, ongo iengiti otokoli miliki e wikpokpo djande. ²⁶ Wamanima, wana wa oliye wa Abalayama, la wadji wango wadjei ndondo enu wango wakomowangaka Mwengei, engbundu e mokalo etodjeeli iso. ²⁷ Laate wato wango wayabati la Yelusalema la makumu mau, watimwewali Moto oho, ase, ango edjakali iwo okeli nda wasambesi, waengesali sambo djinge iyasanali la watiesakoli, sambo djinge ikotanganaka la moli mopamake sabata kpaa. ²⁸ Inga te watieneli loyi te loikima ehekelake etumbu e logoo, waongali la la Pilato ate aolane. ²⁹ Ango eseselali iwo oengesi sambo kpaa djinge idhingani la kole ende, wamodjimbali la ekulusu, wamolangeyali la mbila. ³⁰ Ase Mwengei amobasesali ndondo e wagwi. ³¹ Inde aeneni masio ngbii la iwo wango walongwali mongindji la inde tee ongo la Galilea oteli la Yelusalema. Iwo wango wadjei sikandjo watotoli wande atie wato. ³² Iso koto tokoosumbelakani mboli ndamu la liuna enge ehani atie watata wasu, ³³ ate Mwengei aengesi eho atie iso wana, la ndenge amobasesali Yesu, nda edhinganate eho la lembo e wale ate, owe odjei mana o mbai, mbai koto iumiga sangwa. ³⁴ Loyi linge ate amobasesalii ndondo e wagwi laate atiwongo kine ndondo e oholi, aaseli eho ate: ikoohani sambo e motema magba, enge edjei meemene, enge eunali mbai la Davidi. ³⁵ Eho lenge aasi koto la lembo edji ate, 'Otidhee mosatu mo owe ahole.' ³⁶ Laate Davidi akelali mwano mo Mwengei enge eyewanali la engele inde, alangalali ndondo e logoo, wamolangeyali mongindji la watata wande, aholali koto. ³⁷ Kaikoase, moto ongo omobasesi Mwengei inde atihole. ³⁸ Eho lenge, dheeni eyewane la ino, wamanima, ate la mboka e moto oho, olimbesani e masumu etiesakolani atie ino. ³⁹ Ndji la kole ende moto kpaa ongo ogemei alongesani la sambo kpaa, djinge litiengake ino olongi la mboka e pui. ⁴⁰ Eho lenge, okakebeni ate wungo oasani la watiesakoli etikwele ino. ⁴¹ Dengani, ino wadhendeyi, yahuelani koto salamatani! laate mbai ikokelaka otomo oesi la masio manu, otomo ungo otigemyani ino te inga moto akoolumbwelakani ino la hoho. ⁴² Ango edjakali Polo la Balanabasi opumbi, wato wayatatia la iwo laate wawaasele djinge sambo la Sabata e mbuse. ⁴³ Ango eyaandjia liboleyani e sinagoga, ngbii e Wayuda, la wato wa esii wango wadjakali omosambeli Mwengei wamobiliali Polo la Balanabasi, wango wakpomesanali la iwo, wawahali mogalia ate watikale la logoo e Mwengei. ⁴⁴ La Sabata e mbuse, ahue e wato kpaa wa moki wayaboleyali la ooki engbundu e Likumu. ⁴⁵ Ango eenia Wayuda wato ngbii, watumali la zuwa, wapotali oyamaleli, la wiliko, sambo djinge Polo adjakali oasi. ⁴⁶ Ase Polo la Balanabasi waasali la mohandja ate, edjaki olamu ate engbundu e Mwengei etiesakolane liwoso atie ino. Nda ekolumbaka ino eho, okoenekeni koto ate owongitini la mokalo mo libela, denga, toyakukolia atie wapagano. ⁴⁷ Laate Likumu atotomi la ehele engbundu: '' Iyobati nda ngbai e wapagano, laate odjee mokalo tee la gboo e mbume.'' ⁴⁸ Ango eokia wapagano ndjongo, waemelali, la ogani koto engbundu e Likumu. Wango kpaa wadjakali la ekaleli enge ewongi la mokalo mo libela, waumali wagemei. ⁴⁹ Engbundu e Likumu edjaki ndji oyandjani la moki muho kpaa. ⁵⁰ Ase Wayuda wawamemelisali wali wamogano wango wadjakali omosambeli Mwengei la wato wasungu wa gbata, wapumbeselali Polo la Balanabasi minga, wawalumbali saa e milelo e moki mowu. ⁵¹ Ase Polo la Balanabasi wawahuholelali limungele e makolo mawu, wakeeli la moki mo Ikoniumu. ⁵² Watutiani wadjakali otumi la mwemu koto la elimo satu.