¹ La Ikoniumu, Polo la Balanabasi walingelia mongindji la Wayuda la sinagoga, wadjaki oasi olamu, ngbii e Wayuda la Wageleki waumali wagemei. ² Ase Wayuda wango watigemeiyali wawamemelisali, walolisali koto limemu e milimo e wapagano laate wawatone wango wamangbasu. ³ Wayetesali engele ngbii ango, wadjakali oasi la mogalia la okumu wungo wolongoyi atie Likumu, ongo ohali litotoli la loyi e engbundu e magba mande la ndenge ahali mboka ate wilembo la makamwesi eenesake sambo djinge igeleli ekelane la mawo ma Polo la Balanabasi. ⁴ Wato ngbii wa gbata eho wakamwali, ndambo wadjakali ngambo e Wayuda, ase wadji ngambo e watutiani. ⁵ Kaikoase, ango wapagano, la Wayuda, la makumu mawu koto walukali owasambwesi, la owabingi mabukeli, ⁶ ango ewayewisali iwo loyi luho, watilali la wagbata wa Likaonia, Lisitela, la Deleba, koto la miki minge mihuani la djaho, ⁷ ongo wadjakali ndji otiesakoli mboli ndamu. ⁸ La Lisitela, moto opele mwesi ayabatali ongo, ongo ogua makolo, moto okotengulaka tee la solo dja nango, atisombate te ma keke. ⁹ Moto opele oho adjakali ooki ndenge Polo adjakali oasi, Polo amodhengali, aenali ate adjei la ogemei laate aume olamu. ¹⁰ Amoaselali la moli mompamake ate, ''Amala ngbi la makolo ma owe.'' Ahumbwali apotali osombi. ¹¹ Ango eenali ebiba e wato loyi wungo wokeli Polo, wadjambali mili mawu, waasia la monoko mo Likaonia ate: ''wamwengei waumia nda wato, koto wayadjimbeli iso.'' ¹² Wamowelia Balanabas, ''Djeusu,'' ase Polo ''Helemesi,'' laate inde adjakali moto o poo la oasi. ¹³ Koto nganga mwengei o djeusu, ongo tepelo ende edjakali liwoso la gbata eho, akpalali wangombe wa pele la mawoke ma pulele ongo la midhuhe, abalali ohekeli mbeka, inde la ebiba eho e wato. ¹⁴ Ase ango watutiani Balanabasi la Polo, waokia djongo wasalakolali wisindje wau walikolo, wahumbwali ndondo e enge ebiba e wato, wahumbali pui, ¹⁵ waasali ate: ''Pele, la nde ekokelekani ino ndjongo? Iso koto todjei wato wango wadjei la mageni ndenge kikima la ino, koto tokotiesakolaka mboli ndamu atie ino, laate odheeni sambo djinge dja pamba, odjeeni atie Mwengei o mokalo, ongo okelali likolo la mbume, la ewale koto la wihoo kpaa winge widjei ndondo eho. ¹⁶ La maliye mango mayeti, ahali mboka ate miki kpaa mitutie mboka djau amene. ¹⁷ Ase te nda etiyadheeleli inde odjangi ohekeli litotoli, ndenge aokelelalini ino olamu, ndenge aohekelalini ino wiwongo tee la likolo, koto wiengele ewotake pukapuka, ndenge atumesali mitema manu la wilaka wilakake koto la mwemu. ¹⁸ Te easali iwo djinge sambo, Polo la Balanabasi walongali la minga otekesi ebiba e wato waho laate watiwahe mbeka. ¹⁹ Ase Wayuda weesi ndjo wadjaali walongwali la Atiokia la Ikoniumu wawagemeiyesali ebiba e wato waho. Wamobingali Polo mabukeli, wamogulakolali saa e gbata, wamungolali ate agui. ²⁰ Ango watutiani wamolingali, ayamalali, alingelali la gbata. Ekundu eho alongwali mongindji la Balanabasi la oki la Deleba. ²¹ Mbuse e otiesakoli mboli ndamu la gbata eho koto la owumesi wato ngbii watutiani, wawongwali la Lisitela, la Ikoniumu koto la Atiokia. ²² Wadjakali ohekeli milimo ma watutiani okulu, wadjakali owahekeli mogalia ate, wahelane ndondo e ogemei, la wi wingbundu, ''Ewongi la iso olingeli la okumu wo Mwengei la mboka e odjidji ngbii.'' ²³ Wawabatelali wiloko la lingomba liesi liesi, wayakongali mbuse e okili wilaka, wawakawali la mawo ma Likumu ongo omogemei iwo. ²⁴ Wakpandali Pisidia, wakeeli la Pamipilia. ²⁵ Mbuse e osisi oasi engbundu e Pelega, wayadjimbali la Atalia. ²⁶ Walongwali ongo, watotia andondoli wakia la Atiokia, ongo wabatanali la mawo e magba masungu ma Mwengei la loyi e otomo wungo woengesali iwo. ²⁷ Ango eumali iwo wakokiali lingomba, wapotali oasi sambo kpaa djinge ikeli Mwengei la mboka ewu, koto ndenge adhuhuelali wapagano modhuhe mogemeiyake. ²⁸ Wayetesali engele ngbii mongindji la watutiani waho.