¹ Pele djeesi walongwali la Yudea, wapotali otiesakoli la wamangbasu la Atiokia, la oasi ate: ''Inga otitenaneni kombeni la obileyi pui dja Moize, oengitini la mokalo.'' ² Ango okawani la kokia esi e minga epumbali ndondo ewu, wamangbasu watotali mwano ate Polo la Balanabasi la weeti ndondo ewu watele atie watutiani la wiloko ongo la Yelusalema la osisi enge kokia. ³ Watomanali la lingomba, wakpandali Penisia la Samalia, wadjakali oaseli loyi liesi liesi linge lidhendji okukwani e wapagano, wadjakali ohekeli wamangbasu kpaa mwemu. ⁴ Ango eumia iwo la Yelusalema, wayambanali la mwemu esungu la lingomba, la watutiani, la wiloko e mangomba, wawayewisali ngbii e sambo djinge Mwengei akelali la ewo ewu. ⁵ Ase wato wadji e ma lingomba liesi e Wapalizeo wango wagemeiyali, wayamalali la wangbelengo djawu, waasali ate: ''Eengi owatenesi kombeni, koto owainei ate watemeiye pui dja Moize. ⁶ Watoma, la wiloko wa lingomba, wayakokeiyali la obundoyi loyi loho. ⁷ Ango eumia la kokia etetelake, Petele ayamalali, aasia la iwo ate, wamanima, ino oewini ate opoti lisio la poo Mwengei aonali ndondo enu ate la monoko mo mbai wapagano waoke engbundu e mboli ndamu koto wagemeiye. ⁸ Mwengei ongo okoyewaka atotolali la ndenge awahali iwo elimo satu, ndji ndenge akelali eho koto atie iso. ⁹ Atisombosanali koto iso la iwo, ase alangesali mitema mau la mboka e ogemei. ¹⁰ La ndjongo, lande edjei ino sikandjo omomeki Mwengei la ndenge ekoatomakani ino la otetelake watutiani waengese sambo djinge te watata wasu te iso totiengali oengesi? ¹¹ Ase tokobataka nde motema ate tokokala la mboka e magba masungu e Likumu Yesu, ndenge kikima la iwo. ¹² Wango wato kpaa wadakali bii, wapotali omooki Balanabasi la Polo ango edjakali iwo oyewisi wilembo ngbii la sambo kamwake enge eenesake sambo djinge igeleli djinge Mwengei akeli la mboka ewu ndondo e wapagano. ¹³ Mbuse eho wadheeli okpomi, Yakobo awongosali ate, ''Wamanima, ookani mbai.'' ¹⁴ Simeona aseseli olumboli olamu ndenge ndji liwoso Mwengei adji la ooni ndondo e wapagano wato wango wakpali kombo ende. ¹⁵ Wingbundu e watiesakoli eokani la djaho, ndji ndenge edhingana ate, ¹⁶ ''Mbuse e sambo djaho, ikowongwa, ikoma koto monguta mo isoki mp Davidi enge ekwate; ikoma alidji wiholo winge wibitani, ikomalesa eho alidji. ¹⁷ Laate wango watikali ndondo e wato wamoluke Likumu, mongindji la wapagano kpaa, wato wango wawelani la kombo e mbai, Likumu aasi ndjongo, inde ongo okokelaka sambo djaho. ¹⁸ Likumu ayewisali dji sambo tee la gala. ¹⁹ Eho lenge, imungoi ate, eti olamu obati minga atie wapagano wango wakoyakukolaka atie Mwengei. ²⁰ Ase towadhingele ekpata ate watone wihoo winge wiumesani onalili la wilima, la pite, la nama djinge wipotani koto la makila. ²¹ Laate tee la masio ma gala Moize adjei la wato wango wakomotiesakolaka gbata la gbata, laate akotanganaka la moli mopamake la wasinagoga sabata kpaa. ²² Watoma la wiloko wa lingomba, mongindji la lingomba kpaa waenali olamu watome pele wango waononi ndondo ewu wake la Atiokia mboka kikima la Polo la Balanabasi. Ndjongo wamoonali Yudasi, ongo omoweli iwo Balasabasi la Sila, wato wango wakosombesaka sambo ndondo e wamangbasu. ²³ Watomali ekpata la ewo ewu ate, ''Watoma la wiloko wa lingomba, wamaangbanu, atie wamangbasu wango wadjei la Atiokia koto la Silia, la Silisia wango wadjei wapagano: Mobale! ²⁴ Nda eoki iso ate wadji wango walongwali atie iso wabatini ino la ewedje la wingbundu wau, walukali obulungi milimo manu, inga te ate iso totiwainyali ndjongo, ²⁵ iso kpaa tookani, toeni koto olamu ooni pele laate totomeleni ino mongindji la wamangbasu wa libalano, Balanabasi la Polo, ²⁶ wato waho wakawi milimo mawu la loyi e Likumu lasu Yesu Kilisito. ²⁷ Towatomi Yudasi la Sila, laate iwo koto waasele sambo djaho la monoko. ²⁸ Laate elimo satu la iso koto amene toeni olamu ate totiotalieleni alidji edji mokpali, ndji sambo djinge dja kole: ²⁹ djaakani ndji otoni wihoo winge wihekelani mbeka la wilima koto la makila, koto la nama djinge ipotani, la pite koto. Inga oyabanyani olamu la sambo djaho, okodjani olamu. Tikalani olamu. ³⁰ La ndjongo, ango edheeli iwo wato waho wake, wayadjimbali la Atiokia, wakokiali ngbii e wango wato, wawahali okpengbeite eho. ³¹ Ango esiselali iwo otangi, waemelali la mogalia moho. ³² Yudasi la Sila nda edjakali iwo amene koto watiesakoli, wahali mogalia la wamangbasu waho la sambo ngbii, wawahali koto okulu. ³³ Mbuse e oetesi ma engele, wamangbasu wawadheeli wake la logoo atie wango wawatomali. ³⁴ Sila aeneli olamu otikali. ³⁵ Polo la Balanabasi waumwali la Atiokia, wadjakali oteyi la otiesakoli, mongindji la wadji ngbii, mboli ndamu e engbundu e Likumu. ³⁶ Mbuse e masio Polo aasali la Balanabsi ate, towongweyo la wagbata kpaa etiesakolali iso engbundu e Likumu, la odhengi inga wamangbasu wadjei nda ndenge. ³⁷ Balanabasi abalaki omototi Yoani, ongo owelani Malako. ³⁸ Ase Polo atieneli olamu omokpali inde mongindji la iwo, laate awadheeli la Pamipilia, atikeeli mongindji la iwo la otomo. ³⁹ Mosio moumali ndondo ewu, wakawanali, moto la moto la mboka ende; Balanabasi amototali Malako atelali andondoli akia la Sipele. ⁴⁰ Ase Polo amoonoli Sila, akeeli koto, wamangbasu wamodheeli ate ake la logoo e Likumu. ⁴¹ Akpandali Silia la Silisia, adjakali ohekeli mogalia la mangomba.