¹ Polo aumali la Deleba alidji la Lisitela, denga motutiani mwesi adjaki ongo kombo ende Timoteo, mana o moli mwesi Moyuda ongo odjakali mogemei, ase sango Mogeleki. ² wamanima wa Lisitela la wango wa Ikoniumu wadjakali oasi olamu la loyi londe. ³ polo abalali ate moto oho atinge la inde, amotenali kombeni la loyi e Wayuda wango wadjakali la winge wiholo, laate iwo kpaa wayewali ate sango adjei Mogeleki. ⁴ Ango edjakali iwo oeti la wagbata, wadjakali owahi wango wadjakali ongo tomani djinge watoma la wiloko wa lingomba wango wadjakali la Yelusalema watotali laate watemeeiye djaho. ⁵ Mangomba maumali la oteteli e ogemei, wato wadjakali otaleyani masio la masio. ⁶ Polo la wato wande wakpandali Piligia koto la moki mo Galatia, laate elimo awatekisali watiase engbundu la gbata e Azia. ⁷ Ango eumali iwo ahue e Misia wayawongelali laate walingele ongo la Bitinia, aseko elimo e Yesu etiwahali mboka. ⁸ Waetali ahue e Misia wayadjimbali la Tolase. ⁹ Aseko la likolo, polo aeneli saki: Moto mwesi o Masedonia ayamalia, adjaki oyakongi la inde la oasi ate, ''Etani la Masedonia otogamesi iso.'' ¹⁰ Ango eeneli Polo enge saki, tolukali mboka e oki la Masedonia, tohelali gbondo ate Mwengei atoweli iso la owatiesakoli iwo mboli ndamu. ¹¹ Mbuse e owumi la Toloasi, tototali okendo wo ewale, tosombali mbala kikima tee la Samotalasi, ase la lisio linge libileyi, towumali la Napolisi. ¹² Tolongwali ongo, towumali la Pilipi, gbata enge esombesani la Loma, enge eyeti kole la gbata e Masedonia. Towumwali la gbata eho, toetesali ma masio. ¹³ Wuse o sabata topumbali saa e modhuhe enge esukiani la ewale, ebete enge emungwali iso ate edjei ebete e oyakongi. Toyabatali topotali oasi la wali wango wayakokiali. ¹⁴ Moli mwesi kombo ende Lidia, motambi wisindje wa ngbaa-boloo, moto o gbata e Tuatila, moyakongi o Mwengei, adjaakali ooki. Likumu adhuholali motema monde laate abata mamungwene mande la sambo djinge idjakali oasi Polo. ¹⁵ Ango inde la wato wa oliye wonde watotali patisa, ayakongali la iwo ate: ''Inga oeneni ate idjei moto omeemene la maiso ma Likumu, lingelani la monguta mo mbai, yabatani.'' Atogemeisali la mohandja. ¹⁶ Ango edjakali iso oki la ebete e oyakongi, mana o moli mwesi e otomo ongo odjakali la elimo eesi, etota mwesi etiesakolake sambo djinge iyaisi, agbotonoli la iso. Adjakali olingeseli wamemene wande wambele ngbii la otomo wotiesakolake sombo djinge igeleli. ¹⁷ Mana o moli oho adjakali omotutei Polo la iso, opami koto la dji wingbundu: ''Wa wato wadjei tuke dja Mwengei Ongo-Oyeti-Likolo, wango wakotiesakolakni ino mboka e mokalo.'' ¹⁸ Akeli djinge sambo la oumoyi e masio ngbii. Polo alembali, ayakukolali, aasali la elimo eho ate: ''Iyowaseli la kombo e Yesu Kilisito ate opumbe la wenge wande.'' Apumbali ndji la enge engele. ¹⁹ Ango wamemene wande waeneli ate mwano mowu mototake wambele ekia, wamohelali Polo la Sila, wawagulali la liho atie makumu. ²⁰ Wakeeli la iwo atie makumu ma moki, waasia: ''Wa wato wakolingesaka ewedje la gbata esu, wadjei Wayuda. ²¹ Wakotiesakolaka wikaleli winge witekisani la iso Waloma togemeiye, te tokelele. ²² Ebiba e wato waendjelali Polo la Sila; la makumu ma moki, mbuse e wabamboli, watomali wato wawabinge makobo. ²³ Mbuse e owabingi wakobo, wawalumbali la woyogo, wamoaselali sindjili o woyogo ate awabanye olamu. ²⁴ Ndenge emotomali owo ndjongo, awalumbali la woyogo e ndondo, ahelali koto mokolo mawu la winangeli makolo. ²⁵ La etete, Polo la sila wadjakali oyakongi la omogani Mwengei la lembo, wato wa woyogo wadjakali owaoki. ²⁶ La gbamuka, mbume edudumali la oteteli, makule ma woyogo koto madudumali. Miluhe midhuhuanali ndji la enge engele. Miliki minge minanganali wato kpaa mitokwanali. ²⁷ Ango esuswali sindjili e woyogo la ilo, aenali ate miluhe ma woyogo midhukwani, agulali kpoka ende alukali owaoli, amungwali ate wato wa woyogo watili. ²⁸ Ase Polo adhumbiali la moli mopamake ate: ''Otiakele obe, iso kpaa todjei ahala. ²⁹ Sindjili e woyogo aongoli matambe, ahumboiya ndondo, nda owangi emohelali, akwali liwoso la Polo la Sila la mwemu, ³⁰ awaumesali saa, aasali ate: ''Wawawa, ikele woni laate ikale?'' ³¹ Polo la Sila, waongolali ate: Mogemeiya Likumu Yesu okokala, owe la wato wa monguta mo owe.'' ³² Wamoaselali la wato kpaa wa monguta monde engbundu e Likumu. ³³ Awakpalali ndji la enge engele e likolo, akpololi wa pota wau, iwo kpaa, inde la wato wande wapatali odjangi oumoyi. ³⁴ Awalingesali la monguta monde, aandali pesa liwoso lau, aemelali ngbii inde la wato wamonguta monde laate sikandjo amogemeli Mwengei. ³⁵ Ango etania wuse, makumu ma moki wawatomali wapolisi wake oasi ate: ''Wapumbesa wango wato.'' ³⁶ Sindjili e woyogo amoaselali Polo wingbundu wau ate: ''Makumu ma moki wawatomi wato laate ino waale opumbeni. Sikandjo pumbani, kekeni logoo.'' ³⁷ Ase Polo aasali la iwo ate: ''Watobingali pimbo liwoso la wato kpaa odjangi tokwesane la loyi, iso Waloma, watolumbia koto la woyogo, wakotyolumbaka sikandjo saa la oyaisi? Te ndjongo! Iwo amene wadje opumbesi iso saa.'' ³⁸ Wapolisi wasumbelali makumu ma moki enge mboli, iwo wawangali ango eokali iwo ate Polo la Sila wadjei Waloma. ³⁹ Wadjaali, wayakongali la iwo, mbuse e owapumbesi, wawaongoli ate walongwe la gbata eho. ⁴⁰ Polo la Sila wapumbali la woyogo, wakeeli la monguta mo Lidia. Ango eeneli iwo wangbasu, wawahali mogalia, mbuse wakeeli.