¹ Polo la Sila waetali la Amipipolisi koto la Apolonia, waumali la Tesaloniki, ebete sinsgoga esi e Wayuda edjakali. ² Polo alingelali ongo atie iwo, ndenge ehahanali inde okeli, la oumoyi e sabata isato adjakali okeleli madhingo la osololi la iwo. ³ Adjakali olimboli la ohekeli elembeteli la madhingo ate ewongoli Kilisito aene odjidji, koto abase la wagwi, adjaki koto oasi ate: ''Inde adjei Kilisito, Yesu, ongo ekotiesakolaka mbai ino.'' ⁴ Wadji ndondo ewu, waumali wagemei wayakokiali mongindji la Polo la Sila, koto ngbii e Wageleki wango wadjakali oyakongi la Mwengei koto wali ngbii wamogano wakelali koto ndjongo. ⁵ Ase nda eokali Wayuda zua, watotali mongindji la iwo wato wabe ndondo e wato wango wakobengiaka la liho, wakelali limbutukele liesi, walingesali ewedje la gbata. Wadjeleli monguta mo Yosona, wapotali oluki opumbesi Polo la Sila atie wango wato. ⁶ Nda etiwagbotoli iwo, wamokpalia Yasona la wamangbasu wadji atie makumu ma gbata, wapamali ate, ''Wa wato wakukoli mbume djinge eyabati wato, waumi koto ahala. ⁷ Yosona awayambi olamu. Wato waho kpaa wakokelaka sambo dja oyamaleli Kaisala, waasi ate likumu odji adjei, inde Yesu.'' ⁸ La djinge wingbundu wabatali ewodje la mito ma wato la makumu ma gbata. ⁹ Ase mbuse e ototi ndanga enge eengi atie Yosona la wadji nde wawadheeli ate wake. ¹⁰ Ndjiango la likolo, wamangbasu watomali Polo la Sila la Belona, ango eumali iwo ongo, walingelali la Sinagoga e Wayuda. ¹¹ Kaikonde wa Wayuda wadjaakali la mamungwene malamu owaeti wango wa Tesaloniki, la ebili ate wayambali engbundu la ehoha etetelake oyeti, wadjaakali odhendeli madhingo olamu masio la masio la oyewi inga sambo djaho idjei ndjongo. ¹² Ngbii djau waumali wagemei, ndenge kikima wali ngbii Wageleki wa mogano la pele koto ngbii. ¹³ Ase ango eokali Wayuda wa Tesaloniki ate Polo atiesakoli koto engbundu e Mwengei ongo la Beloya, wadjali koto ongo la owahili la omemelesi ngbii e wato. ¹⁴ La mbala kikima wamangbasu wamotomali Polo ake tee la ewale, ase Sila la Timoteo watikalali ango. ¹⁵ Wango watingali la Polo wamokpalali tee la Atene, la ewongo, mbuse e ototi ndendji ate inga eengi Timoteo la Sila wadje obangu atie inde. ¹⁶ Ango edjakali Polo owalambeli la Atene, molimo monde eokali limemu ndondo ende la ndenge eeneli inde ate gbata eho etumi la wilima. ¹⁷ La sinagoga apotali osololi la Wayuda la wapagano koto wango wadjakali omowangi Mwengei, masio la masio, la maho, mongindji la wango wadjakali ango. ¹⁸ Ase wato wadji Wapilodjope, Waepikila la Wasetoa, wapotali osololi la inde la obatani kokia, wadji wadjakali koto oasi ate, ''Nda ema ehele esopa abali oasi?'' Wadji: ''Eeneni nda ate adjei motiesakoli e wamwengei o wadjidji.'' Waasali ndjongo la ebili ate adjakali otiesakoli mboli ndamu e Yesu koto libasi. ¹⁹ Wamohelali Polo wamokpalali la Aleopadja, waasali ate, ''Toengi toewe inga matiesakoli maholi mango makoaselaka owe madjei nde?'' ²⁰ La ebili ate okolingesaka djeeti sambo djinge eokakiyo iso la matoyi masu. Eho lenge, tobali toyewe inga sambo djaho epoti oasi wani.'' ²¹ (Wato kpaa wa Atene la wadjidji wango wadjakali oyabati ongo wadjakali oyetesi engele ewu e ototi ehoho te la eeti ema ndji la oyewisi inga ooki ma loyi esi e poli.) ²² Polo ayamalali la wodja e Aleopadja, aasali ate, ''Pele dja Atene, la ndenge edhendji mbai, la sambo kpaa, oenenini ate ayahekelini la owangi wamwengei oyeti wato wadji kpaa. ²³ Laate, ango edjakali mbai oyeti la odhendji olamu wihoo wanu wa oyakongi, ieneli koto la etombeli esi enge likolo laho edhingani ate: ''Atie Mwengei ongo otiewane.'' Ndjongo, inde ongo ino ohelanini la inde inga te ate otimoyeweni, inde ongo ekotiesakalakani mbai ino. ²⁴ Mwengei ongo okeli moki la wihoo kpaa winge widjei ndondo eho, nda edjei inde Likumu e likolo la mbume, atiabataka la watepelo winge wikelani la mawo. ²⁵ Atikelanaka wotomo e mawo ma wato, nda nde akodjangaka ema, laate inde amene moto okohaka wato kpaa mokalo, ohatiani koto wihoo kpaa. ²⁶ La loyi e moto mwesi akelali wihoo kpaa e wato, la oyabati la etando kpaa e mbume, abatali koto wiengele winge wibatana la milelo minge mibatani holi winge wato wayabati, ²⁷ laate wamoluke Mwengei, inga eonga wamoluke la omekimeki wiati la wiati wamotote koto, inga te ndjongo, ati lihele la mwesi la mwisi osu. ²⁸ La ebili ate la mboka ende nde edjei iso la mokalo, tokosombaka koto todjei, ndenge wadji ndondo e wapueti wanu waasa, 'Laate todjei koto oliye wonde.'' ²⁹ Eho lenge, ndenge edjei iso oliye wo Mwengei, eengiti ate tomungwe ate Mwengei adjei nda wolo inga palata inga libukeli, nda elima enge eemani la akili koto la otomo wo moto. ³⁰ Meemene, Mwengei anangi maiso la wiengele winge widjangi oyewi, ase sikandjo akoewisaka la wato e wiholo kpaa ate ewongi la iwo kpaa wakukole mitema. ³¹ La ebili ate abati wuse woesi wungo wokosambesa inde la womeemene mbume djinge wato wayabati la mboka e moto mwesi ongo omooni inde, koto awahekeli wato kpaa ndanga ndenge emobasesi inde tee la wato waguake. ³² Ango eokali iwo loyi e obasi e wato waguake, wadji wamodendjiali Polo; ase wadji waasali ate, ''Tokooka owe la wongu loyi te mbala edji.'' ³³ Eho lenge Polo alongwali ndondo ewu. ³⁴ Ase wato wadji waaboleyali mongindji la inde waumali wagemei, enge ndondo ewu Deonisiusi mosambesi e tilibinalo e Aleopage, la moli mwesi kombo ende Damalisi la wadji wato mongindji la iwo.