¹ Mbuse e sambo djaho, Polo alongwali la Atene, akeeli la Koliti. ² Amogbotoli Moyuda mwesi kombo ende Akila, moto o Poti ongo olongwali sikandjo la Italia, la moli onde Pisila, la ebili ate Kolode aasali la Wayuda kpaa walongwe la Loma. Inde akeeli atie iwo, ³ nda edjaakali iwo okeli otomo woikima, ayabatali la monguta mowu, wadjaakali koto okeli otomo, laate otomo wowu wodjakali omai wahema. ⁴ Polo adjakali oasi la oyatii la Sinagoga sabata kpaa, adjakali owagemeisi Wayuda la Wageleki. ⁵ Kaikoase ango elongwali Timoteo la Sila la Masedonia wayadjimbia, Polo ayahali kpaa la otomo wodhendji engbundu, adjakali ohekeli Wayuda litotoli la oenesi ate Yesu adjei Kilisito. ⁶ Ase mbuse, nda edjakali Wayuda oyamaleli la oasi obe, ahuholali wisindje wande, aasali koto la iwo ate, ''Makila manu madjei la mito manu amene; mbai ilangi. Opoti sikandjo okokeeke atie Wapaganogano.'' ⁷ Ase apumbali ongo, akeeli olingeli la monguta e moto mwesi kombo ende Titiusi Yusutusi, moyakongi mwesi o Mwengei; ongo monguta monde mohelani la sinagoga. ⁸ La engele eho Kilisipusi, kumu o sinagoga amogemeiyelali Likumu, ndenge kikima koto wato kpaa wa monguta monde. Ngbii ndondo e Wakoliti wango waokali wapotali ogemei la opatisani. ⁹ Likumu amwaselali Polo la saki la likolo ate, ''Otiwange, djaaka ndji oasi, otidhikake monoko. ¹⁰ Laate idjei mongindji la owe, moto tueti okoodjele owe la o okeli obe, la ebili ate edjei la wato ngbii la ehele gbata.'' ¹¹ Polo ayabatali ongo elanga esi la ndebo motoba, owapundesi engbundu e Mwengei ndondo ewu. ¹² Ase ango edjakali Galio likumu o gbata e Akaya, Wayuda kpaa wamomemelelia Polo, wakia la inde la ngbelengo e lisambi; ¹³ waasia ate: ''Oholo moto akogemeiyesaka wato wayakonge la Mwengei ndenge eeti, enge esomboni la pui. ¹⁴ Ango Polo alukali odhuholi monoko, Galio aasali la Wayuda ate, ''Ino Wayuda, inga edjaki la ekpeli esi te la loi wesi wobe, ikelaki ate inange motema la ookini ino engele ndai. ¹⁵ Ase, inga edjaa kokia e wingbundu la wakombo koto la pui ndondo enu, enge eodhendjini ino amene. Ibaliti odjei mosambesi e sambo djinge.'' ¹⁶ Galio aumbali la iwo la ngbelengo e lisambi. ¹⁷ Ndjongo iwo kpaa wamohelali Sositenesi, kumu o sinagoga, wapotali omobingi liwoso la ngbelengo e lisambi. Ase Galio atiasumbwali te wokeke la sambo djinge kpaa. ¹⁸ Kaikoase, Polo atikalali masio masungu la Kolito. Mbuse eho ayaambia la wamananango ase alingelia la andondoli, akia la Sili, iwo la Pilisila la Akila. Ango edjengeli inde sue la Kekelea, la ebili ate adjakali la elako. ¹⁹ Waumali la Epeso, Polo amotikali Pilisila la Akila ongo, ase inde amana alingelali la sinagoga la osololi la Wayuda. ²⁰ Inga te ate wamoongoli ate aumwe la iwo ma engele ndai, atigemeiyali. ²¹ Ase ahali mobale, aasali la iwo ate, ''Ikowongwa alidji atie ino inga Likumu abala.'' Atotali mboka e ewale la Epeso. ²² Ango eyadjimbia inde la Kaisalia, atelia la Yelusalema la ohekeli lingomba mobale, mbuse ayadjimbali la Atiokia. ²³ Mbuse e oetesi ma engele ongo, Polo ahelia mboka, aetali la ebete esi tee la edji ebete la moki muho mo Galatia koto la Piligia, adjakali ohekeli mogalia la watutiani kpaa. ²⁴ Moyuda mwesi kombo ende Apolo mana o moki mo Alezandelia, mwaasi sambo ndamu, aumali la Epeso, ayewali koto madhingo olamu. ²⁵ Apolo ayinyesanali la monoko, la mboka e Likumu, nda edjakali inde ololi la elimo, apotali otiesakoli la oyinyei la ndege ndamu sambo djinge imodhendji Yesu, ase ayewali ndji patisa e Yoani. ²⁶ Apolo apotali otiesakoli la mogalia ndondo e sinagoga. Ase ango Akila la Pilisila wamookali, wamototali mongindji la iwo, wamwenesia la hoho mboka e Mwengei la ndenge ndamu alidji oeti. ²⁷ Ango edjakali inde la ehoha e kpanake la Akaya, wamangbasu awawadhingelali watutiani ekpata, wawahali mogalia ate wamoyambe olamu. Ango eumali inde ongo, awagamesali wango wagemeiyali la loyi e magba masungu. ²⁸ Apolo adjakali oenesi wato la hoho ate Wayuda wausi mboka, ango edjakali inde oenesi la mboka e madhingo ate Yesu adjei Kilisito.