¹ Saulo agemyali logo e Esetepano. La lisio laho, odjidji ewumelali lingomba la Yelusalema; iwo kpaa longosa ndji watutiani, wayaandjali la miki mikeke e Yudea koto la Samalia. ² Ase pele djinge wakomowangaka Mwengei, wamokpalali Setepano la oki o moombi, wamolelali koto nee. ³ Saulo, apotali oenesi lingomba odjidji la ndenge mbe. Adjakali olingeli la monguta mwesi la mwesi opumbesi pele la wali, adjakali owalumbi la woyogo. ⁴ Wango wayandjali, wakeli ebete la ebete la otiesakoli mboli ndamu e engbundu. ⁵ Pilipo ayadjimbali la gbata e Samalia, apotali otiesakoli Kilisito atie iwo. ⁶ Ebiba e iwo kpaa, wadjakali oyangatali la sambo djinge Pilipo adjakali oasi, ango edjakali iwo ooki la odhendji wilembo winge widjakali inde okeli. ⁷ Laate woto ngbii wadjakali la milimo mibe, milimo miho midjakali ohumbi pui la otili. Wato wagui makolo la wango wakotenguaka wakondjali mokalo. ⁸ Mwemu esungu edjakali la gbata eho. ⁹ Ase la gbata eho molome mwesi adjakali, kombo ende Simoni, ongo, liwoso e djinge sambo, adjakali okeli tomo dja lilando, adjakali okamwesi moki mo Samalia, adjakali oasi inde adjei moto mwesi mosungu. ¹⁰ Iwo kpaa opoti la wana wakeke tee la wiloko wadjakali omogemei la oasi ate: ''Oholo moto adjei okulu wo Mwengei, enge eengi owelani osungu. ¹¹ Wadjakali omogani, laate apotali owakamwesi tee la gala la tomo djande dja lilando. ¹² Ase ango emogemeiyali iwo Pilipo, ongo odjakali otiesakoli mboli ndamu e wokumu wo Mwengei koto e kombo e Yesu Kilisito, wapotali opatisani, pele la wali. ¹³ Simoni inde amene koto aumali mogemei, ase, mbuse e opatisani, ahelanali engele kpaa la Pilipo, adjakali okamwi la oeni ndenge wilembo koto tomo sungu e okulu edjakali okelani. ¹⁴ Ango watutiani wa Yelusalema waokali ate Samalia eyambia engbundu e Mwengei, wawatomelali Petele la Yoani. ¹⁵ Iwo wayadjimbali, wakongali la loyi e iwo laate watote elimo satu. ¹⁶ La ebili ate elimo satu etimodjimbelaliyo moto te moikima ndondo ewu, ase wapatali sa la kombo e Likumu Yesu. ¹⁷ Ndjongo Petele la Yoani wawabatelali mawo, wapotali ototi elimo satu. ¹⁸ Ango eenia Simoni ate elimo satu edjakali ohekelani engele watutiani wabatelali wato mawo, alukali owahi wadjenge. ¹⁹ Aasia ate, ''Hekele mbai koto ehele okulu, laate moto kpaa ongo okomobatela mbai mawo atote elimo satu.'' ²⁰ Ase Petele amwaselali ate: ''Dhee ate palata dja owe ebitane mongindji la owe amene, laate omungoi ototi likao e pamba e Mwengei la wambele. ²¹ Oti la likao koto la lisango la lu loyi, laate motema mo owe monanolaniti la maiso ma Mwengei. ²² Ndjongo, kukola motema la obe e owe, koto yakonga la Likumu, laate inga liengi likodja, oani e motema mo owe elimbesane. ²³ Ikoeneke ate otumi la ngenge koto moliki monangake e odjangi sambo ndamu. ²⁴ Simoni awongwesali ate: ''Pele ino nde yakongani la Likumu la loyi wo mbai ate te esi e sambo djinge easi ino etiwumele mbai.'' ²⁵ Ango esisali iwo ohekeli litotoli lilamu koto la oaseli engbundu e Likumu, wawongwali la Yelusalema, wadjakali koto otiesakoli mboli ndamu la miki ngbii ma Samalia. ²⁶ Kaikoase ahumbwa mwesi o Mwengei, amoumelali Pilipo, amwaselia: Yamala, keke la sidi, la magalasano enge eyadjimbi la Yelusalema tee la Gaza. (''Edjei mboka e esobe. ) ²⁷ Ndjongo ayamalali, ase akeeli, dhenga, mokube mwesi moto o Etiopia, moto mosungu ongo odjakali omokeleli kandasa likumu moli e wato wa Etiopia, inde koto nde adjakali odhendeli ogumake wonde kpaa. Akeeli la Yelusalema la oyakongi. ²⁸ Adjakali owongoi ayabati la likalo lande adjakali otangi la moli mopamake motiesakoli Isaya. ²⁹ Elimo eyasali la Pilipo ate: ''Yandongba, yahelela la ehele likalo.'' ³⁰ Pilipo akeli obangu la lisuka e likalo, amookali inde akotangaka la moli mopamake motiesakoli Isaya, aasali la inde ate: ''Okoewaka pendja sambo djinge ekotangaka owe?'' ³¹ Inde amowongoselali ate: Iengi oewi eho nda ndenge, inga moto atitiesakole mbai? Ayakongali la Pilipo atele ayabate koto mongindji la inde. ³² Kaikoase esuki e madhingo enge edjakali inde otangi la moli mopamake edjaki ehele ndjo: ''Nda meme, akpalanali la ebete eolanake, koto nda mana o meme ongo otilelaka liwoso e moteni swe djande, inde koto atidhukolali monoko monde.'' ³³ La owumoi wo ayadjimbesi wonde, osambesi emolongwesanali. Ndai okoasela sambo e oliye wonde? Laate mokalo monde elongosani ahala la mbume. ³⁴ Mokube amowongoselali Pilipo ate: ''Iyatati la owe, motiesakoli akoasaka lu loyi la kole e ndai?'' La kole ende amene inga la kole e moto odji? ³⁵ Pilipo, adhuholali monoko, nda epotali inde la madhingo maho, amotiesakololi mboli ndamu enge emodhendji Yesu. ³⁶ Ango edjakali iwo osombi la mboka, waumali la ebete enge edjakali malia, mokube aasali ate: ''Denga, malia maama, nde ekotekesa mbaa ate ipate? ³⁷ Pilipo aasali: ''Inga ogemei la motema mo owe kpaa, eho eengi okelani.'' Mokube awongosia: ''Igemei ate Yesu Kilisito adjei mana o Mwengei. ³⁸ Mokube amalesali likalo, iwo kpaa waale wayadjimbali la malia, Pilipo la mokube, Pilipo amopatisali. ³⁹ Ango epumbia iwo la malia, elimo e Likumu emokpalali Pilipo, mokube atimweneli kine. Mokube awongwanelia okendo wonde la mwemu. ⁴⁰ Ase Pilipo adjaali oyaeni ate adjei la Asedoda, akpandali koto moki muho kpaa, adjakali koto ndji otiesakoli mboli ndamu la wagbata kpaa tee eumali inde la Kaisalia.