¹ Nganga Mwengei mosungu aasali ate: ''Djinge sambo widjei ndjongo?'' ² Setepano assali ate: ''Pele, wamanima koto wawawa, ookani mbai: Mwengei o otwa apumbelali tata osu Abalayama ango edjakali inde la Mesopotamia, liwoso ate apote oyabati la Halana; ³ aasali la inde ate: pumba la moki mo owe, koto wamangua, keke la moki mungo mokooinya mbai. ⁴ ''Apumbali la moki moho mo Wakalideya, apotali oyabati la Halana. Ongo mbuse ango sango akuali, Mwengei amolongosali la enge ebete eyabatali inde laate ake la moki mungo ino oyabati sikalandjo. ⁵ Atimohali lisango te liikima, te mbume enge eengani la osungu e ligilili e lokolo, ase omowunelali nde omohi eho laate edje ema ende, koto e litoto lande mbuse ende, inga te ate la enge engele atidjakaliyo la mana. ⁶ Mwengei aasali la loyi laho ate, lisango lande likodja wato wango wakoyabata wadjidji la moki mo wadjidji, koto wato waho wakoawumesa tuke, wakoaenese koto odjidji wilanga kama inei. ⁷ Ase moki muho mungo iwo wakokelela nda tuke, mbai okosambesa eho, mbuse e sambo djaho, wakopumba, wakokelela mbai koto otomo mosatu la ehele ebete. ⁸ Mwengei amohali koto Abalayama ogemeyani etenanake kombeni, la eho amootali Isaka, amotenali kombeni la lisio la mwambi, Isaka amootali Yakobo, Yakobo awotali makumu liomo la maale e watata. ⁹ Watata waumali la zua atie Edjepu, wamotambali la Ezipito; ase Mwengei adjakali mongindji la inde ¹⁰ amobanyali la odjidji wonde kpaa, amohali koto ngolu koto lokenge la maiso ma Palao likumu o Ezipito. Amobatali la osombesi Ezipito la monguta monde koto kpaa. ¹¹ Ndjala ekwali Ezipito kpaa la Kanana, wodjidji weesi wosungu, watata wasu watidjaakali kine la ilaka. ¹² Ase Yakobo aokali ate wilaka ilakake widjei la Ezipito, atomali wasangbasu mbala e poo. ¹³ Koto la mbala e wale Edjepu ayainyali atie wamanango, koto oliye wo Edjepu eyewanali atie Palao. ¹⁴ Edjepu awatomali wamanango wake omoweli Yakobo sango la wato kpaa e oliye wonde, iwo kpaa wadjakali wato tuku sambo la itano. ¹⁵ Yakobo ayadjimbali la Ezipito, aguali, watata wasu koto waguali. ¹⁶ Wenge wau wikpalanali la Sekema koto wawalangeyali la mbila enge Abalayama asombali la motio e wadjenge e palata atie wana wa Hamola la sekema. ¹⁷ ''Ango engele edjakali owomi la hue laate liwona wungo Mwengei atiesakolali la hoho atie Abalayama eengesane, wato waotanali ngbii, waumali ngbii la Ezipito, ¹⁸ Tee engele enge odji likumu apumbali la Ezipito, ongo otimoyewali Edjepu. ¹⁹ Akelelali moki mosu lokenge lobe, agugali wasangbasu laate wapumbese wana wau wakeke, la ebili ate watiwadhee la mokalo. ²⁰ La engele eho, Moize awotamali, awongali koto te la maiso ma Mwengei; wamobanyali ndembo isato la monguta mo sango. ²¹ Ango emolumbali iwo, mana o moli o Palao amoliali koto amowokololi nda mana onde amene. ²² Moize atiesanali la lokenge kpaa e Waezipito, aumali la otetelake la ogbomeli koto la tomo djande. ²³ Ango elanga ende e tuku enei edjakali oyeti, amungolali la motema ate ake awadhendji wamaanago, wana wa Isalayele. ²⁴ Ango eeneli inde mwesi ongo wadjakali omokeli obe, amolingelali, awongosali obe la loyi e moto ongo wadjakali omoenesi odjidji la ooli ongo Moezipito. ²⁵ Inde adjaali omungoyi ate wamanango wakoewa ate Mwengei moto obali owakalesi la ligamesi e ewo ende, ase watiewali ndjongo. ²⁶ La lisio linge libileyi awapumbelali ango edjakali iwo osani, amekali owongosi logoo ndondo ewu, aasia: '' Pele, odjeini wana wauma. Woni ekokelanakani ino obe? ²⁷ Ase ongo odjakali omokeli manango obe, amohilali, aasali ate: ''Ndai aobati owe likumu koto djodji osu?'' ²⁸ Otilukaaka ate ondjole mbai nda emoolali owe Moezipito kolokolaka? ²⁹ Ango eokia Moize enge engbundu, atilali, awumali oyabati modjidji la moki mo Midiana, ongo ewotali inde wana wa pele waale. ³⁰ Ango eengali wilanga toku inei, ahumbwa mwesi amopumbelali la esobe e mokoli mo Sinai ndodno e lolemu wo misa e ma mote e keke. ³¹ Ango eenali Moize ndjongo, ayahuelali la loyi enge eenali inde; ango edjakali inde oyandongbi la odhendji olamu, moli mo Likumu mokpomali, ³² Idjei Mwengei e watata wa owe, Mwengei o Abalayama, koto o Isaka koto o Yakobo, nda ongilimi e moetelali Moize atimekali alidji odhendji ongo. ³³ Ndjongo Likumu aasali la inde: tuba wikpokpo e makolo ma owe, laate ebete eyamali owe, edjei mbume mosatu. ³⁴ Eeni wodjidji e wato wa mbai ongo la moki mo Ezipito, ioki oyatati wou, koto iyadjimbi laate iwakalese. Djaka sikandjo, ibali ate iyotome ongo la Ezipito. ³⁵ Moize oho, ongo omowunganali iwo, waasali ate, ndai aobati owe likumu koto djodji? Inde moto oho nde Mwengei amotomali nda likumu koto nda mokalesi la ligamesi e ewo e ahumbwa ongo omopumbelali inde la ma mote enge e keke. ³⁶ Edjaali Moize nde awapumbesali mbuse e okeli sambo kamwake e eenesake sambo djinge wikodja koto wilembo la Ezipito koto la ewale etanake koto la esobe wilanga tuku inei. ³⁷ Inde nde Moize ongo oasali la wana wa Isalayele ate: 'Mwengei akomalesela ino ndondo e wamangbanu, motiesakoli mwesi nda mbai. ³⁸ Inde nde odjakali ndondo e liboliani la esobe mongindji la ahumbwa ongo odjaakali oasi la inde la mokoli mo Sinai koto mongindji la watata wasu, atotali koto wingbundu mosatu e mokalo la ohekeli ino. ³⁹ Ase watata wasu watibalali omotemei, wadjaakali omotoni, la mitema mawu wawongwali la Ezipito. ⁴⁰ Waasia la Alona ate: Totulela iso wamwengei wango wakosomba liwoso lasu. Laate Moize oho, moto ongo otopumbesali la moki mo Ezipito, toewiti nda ema emoumeli. ⁴¹ Ndjongo watulaali mana ongombe, watelesali mbeka atie elima eho, wapotali oemeli la tomo e mawo mau. ⁴² Ase Mwengei ayakukolali, awakawali laate wakelele miyoto ma likolo, ndenge edhingani la ahala e watiesakoli, etidjakali atie mbai nde ohalini nama enge eolani koto wambeka la oumoyi e wilanga tuku inei la esobe, monguta mo Isalayele? ⁴³ Ase edjakali nde hema e Moloke koto wenge e mwengei Lepana enge ekpalalini ino, wilima winge wikelalini ino la oyakongi la eho: ndjongo ikookpalani lihele oyeti Babilona. ⁴⁴ Watata wasu wadjakali la hema e litotoli ndondo e esobe, ndji ndenge Mwenge ahekeleli pui ango edjakali inde oasi la Moize akele eho la otuteyi enge eeneli inde. ⁴⁵ Watata wasu wango watotali lisango laho, walingesali koto eho mboka esi la Yosuwa la moki mo wapagano, enge Mwengei aumbali la iwo liwoso la watata wasu. Hema eho eumuali ongo tee masio ma Davidi. ⁴⁶ Davidi atotali ngolu la maiso ma Mwengei, aongoli koto nano ndamu e omototeli Mwengei o Yakobo ebete eyabatake. ⁴⁷ Ase Salomo moto omomayelali Mwengei monguta. ⁴⁸ ''Inga te ndjongo, ongo oeti likolo atiyabataka, la minguta minge mikelani la mawo. Ndji ndenge motiesakoli akoasaka, ⁴⁹ Likolo lidjei ngbelengo e okumu o mbai, mbume edjei ebete ebatelake makolo ma mbai. Monguta e nda ndenge ekomaalelani ino mbai? Likumu aasi ndjongo, koto eni ebete e mbai ehomake? ⁵⁰ Eti ewo e mbai nde ekelali dji sambo kpa? ⁵¹ Ino wato wa mito mangbongi koto wango wadjangi otenani kombeni la mitema koto la ma matoyi, odjeini engele kpaa oyameleli elimo satu; ndenge watata wanu wakelali, ino koto okokelakani ndji ndjongo. ⁵² Ndai watata wanu watimodjebeleli ndondo e watiesakoli? Waolali wango watiesakolali poo la kole e djaake e Moto molamu, ongo ino oumiani sikala ndjo watambi koto waoli wande, ⁵³ ino wato watotali pui enge ehanali la mboka e waahumwa ase otitemeiyalini eho. ⁵⁴ Ango eokali iwo djinge sambo, wakondjoli la mitema mau, wapotali koto omolakeli Setepano maino. ⁵⁵ Ase inde, nda etumali inde la elimo satu, adhendali likolo, aenali otwa wo Mwengei koto Yesu ayamali la ewo e lilome e Mwengei. ⁵⁶ Setepano aasali: ''Dhenda, ieni likolo lidhukwani koto mana o moto ayamali la ewo e lilome e Mwengei.'' ⁵⁷ Wahumbali pui esungu la oyadhiki matoyi, iwo kpaa wakwali likolo lande. ⁵⁸ Mbuse e omolumbi saa e gbata, wapotali omobingi mabukeli. Watotoli walangesali wisindje wau e likolo la makolo e mwenga mwesi omoweli iwo Saulo. ⁵⁹ Wadjakali ndji omobingi Setepano mabukeli, ango edhumbiali inde, aasali ate: ''Likumu Yesu, yamba molimo mo mbai.'' ⁶⁰ Mbuse e inde okpii la mauli, ahumbali pui etetelake ate: ''Likumu, otiwatangele ehele lisumu.'' Mbuse e oasi ndjongo alangalali ndondo e logo.