¹ La masio maho, ango motio mo watutiani modjakali otaleyani, ondunguani epumbali atie Wayuda wa monoko mo Geleki la loyi e Wayuda wa monoko mo Ebele, la ebili ate wadjakali owosani la engele ekawolake wilaka e masio kpaa wali wau wango wagueli pele. ² Ndjongo, watutiani liomo la iwale wawawelali wango watutiani kpaa atie iwo, koto waasali ate: ''Eti olamu ate iso todhe engbundu e Mwengei laate tokawole wilaka wilakake la wamesa.'' ³ Ndjongo, wamanima , lukani ndondo enu pele sambo e mogano molamu, wango watumi la elimo koto la lokenge, laate towabate la mokpali mungo mo kole. ⁴ Ase iso toyahe kpaa la oyangongi la otomo e engbundu. ⁵ Loyi wungo woasali iwo, e emeseli ngbii e enge wato kpaa. Wamoonoli Setepano, moto ongo otumi la ogemei koto la elimo satu, Pilipo, la Polokolo, Nikanola la Timona, la Palamenasi, Nikolasi, moto o moki mo Atiokia ongo oyakukolali mo Yuda. ⁶ Wawabatali la odja e watutiani, mbuse e oyakongi, wawabatelali mawo. ⁷ Engbundu e Mwengei edjakali obeki, koto motango mo watuytiani modjakali oteli ngbii ndondo e Yelusalema, koto ngbii e wanganga Mwengei wapotali otemei ogemei. ⁸ Kaikoase Setepano, ongo otumali la ngolu koto la okulu, adjakali okeli makamwisi masungu eenesake sambo djinge wikodja koto wilembo wisungu ndondo e wato. ⁹ Ase wato wadji ndondo e wango wadjakali o welani Sinagoga e wakpolani, la wato wa Silena, la wato wa Alesandelia, la wango walongwali la Silisia la Azia, wayamalali la omokokeyi Setepano. ¹⁰ Ase watiengali oyamali liwoso e lokenge koto e elimo enge inde adjakali oasi la eho. ¹¹ Wandongbali wato laate waase ate: ''Tomooki akoasaka wingbundu e omotangi Moize la Mwengei.'' ¹² Wamemeleseli wato, wiloko la wagbolo, wamohelali, wamokpalali la Sanedelina. ¹³ Wapumbesali watotoli wa moleho, wango waasali ate: ''Oholo moto atidheeke oasi sambo mbe la ehele ebete mosatu koto la loyi e pui. ¹⁴ Tomooki akoasaka ate, Yesu o Nazaleta oho akobitesa ehele ebete koto akokalamba ekaleli enge etohali Moize. ¹⁵ Wango kpaa wayabatali la sanedilina wadjakali omodhendji, waeneli ate mbanda ende edjakali nda mbanda e ahumbwa.