¹ Kaikoase, molome mwesi kombo ende Ananiasi la Safila moli onde, atambi ema ende, ² ase aisali esuki e wadjenge, moli onde koto ayewali eho, akpalali sa esuki abatali eho koto la makolo ma watutiani. ³ Ase Petele aasali ate: ''Ananiasi ndjoni Etota aohi mogalia la omokosi elimo satu koto oisi esuki e wadjenge e elanga? ⁴ Engele kpaa enge edjakali atie owe, koto mbuse e otambi, etidjakali ndji la mawo ma owe? Woni eyanali owe loyi e ehele ndenge la motema mo owe? Otikose wato, ase omokosi Mwengei. ⁵ Ango Ananiasi aokali enge engbundu, akwali sese atenali motema, owangi wotetelake ehelali wango kpaa waokali eho. ⁶ Wapalanga wa pele wayamalali, wamolingali la wisindje, wamokpalali saa, koto wamoombali. ⁷ Mbuse e wiengele inga isato, moli onde alingelali, atiewali loyi wungo wokelanali. ⁸ Petele aasali la inde ate: ''Ndjasela mbai, ino waale otambalini elanga la mu motio?'' Inde aasali ate: ''Ndjongo, la mu motio.'' ⁹ Ndjongo Petele aasali la inde: ''Ndjoni ookanini ino waale laate omomekeni elimo e Likumu? Dhenga! makolo ma wango wamoombali molome o owe idjei la monoko mo moluhe.'' ¹⁰ La mbala kikima akwali la makolo mande atenali koto motema. Engele elingelali djinge palanga dja pele, wamogbotoli agwi, wamokpalali koto saa, wamoombali inde koto ahue e molome onde. ¹¹ Owangi etumisanali la lingomba kpaa la wango kpaa waokali sambo djaho. ¹² La mawo ma watutiani wilembo ngbii koto la sambo kamwake e eenesi sambo ndjinge ikodja edjakali ndji okelani ndondo e wato. Wadjakali oyabolei la etombo e Salomona. ¹³ Te mwesi ndondo e wato wadji adjakali la mogalia e oboliani mongindji la iwo. Kaikoase wato wadjakali owagani. ¹⁴ Motango mo wango wamogemeiyali Likumu, modjakali oteli, pele la wali, ¹⁵ wapumbesali wato wa wikoni te la wamboka wisungu, la owalangesi ongo la wipe wikeke koto la matoko, laate ango ekoeta Petele, inga te elima ende pamba ekomogaa te mwesi la iwo. ¹⁶ Ebiba e wato wango walongwali la wagbata winge wisukiani la Yelusalema, wadjakali oyabondji, wadjakali okpali wato wa wikoni, wango koto wahelani la milimo mbee, iwo koto kpaa wakalali. ¹⁷ Ase nganga Mwengei mosungu la wango kpaa koto wadjakali mongindji la inde, ma lingomba e Wasadukai enge edjakali la enge engele, wayamalali, koto watumalali la zua ¹⁸ wawahelali watutiani, wawabatali la woyogo e wato kpaa. ¹⁹ Ase la likolo ahumbwa o Likumu adhukolali miluhe ma woyogo, awapumbesali saa, aasali koto, ²⁰ Kekeni, ango ekoyamalani ino la tepelo, asakani la wato wingbundu kpaa widhengi mokalo. ²¹ Ango eokiya iwo ndjongo, walingelali boo la tepelo, ase wapotali otiesakoli. Kaikoase ango nganga Mwengei mosungu la wango koto wadjakali mongindji la inde wadjali, waboliali Sanedelina koto limbutukele e wiloko kpaa e wana wa Yisalayele, watomali wato wake owatoti la woyogo. ²² Ase ango eumali wapulusu ongo, watiwagbotali kine ndondo e woyogo, ndjongo wawongwali, la okasumbi mboli, ²³ ''iso togboti woyogo edhihani olamu, wasindjili wayamali koto olamu la miluhe, ase ango edhukolia iso, totimogbote moto te moikima. ²⁴ Ango likumu e tepelo la wanganga Mwengei makumu waokia engbundu eho wasilali lokenge la loyi e sambo eho, wadjakali oyahueli inga ekosuka woni. ²⁵ Ase moto mwesi adjali o waaseli: denga! Pele djinge owabatalini la woyogo, wadjei la tepelo, wayamali, wakotiesakolaka wato. ²⁶ Ase likumu e tepelo akeeli mongindji la wapulusu wande, wadjali la iwo, te la minga, laate wadjakali owawangi wato ate watiwabinge mabhukeli. ²⁷ Ndjongo wadjakali la iwo wawamalesali la monguta mo Sanedelina. Nganga Mwengei mosungu awahuelali, ²⁸ wawongosali ate: Tootekisalini la hoho ate otitiesakoleni kine la ehenge kombo, ase, denga! Otumesiani Yelusalema la matiesakoli manu, okoanakani odjeesi makila e moto oho likolo lasu. ²⁹ Petele la watutiani wadji waongosali ate: '' Toengi omotemei Mwengei laate adjei Likumu la ebete e otemei wato. ³⁰ Mwengei e wasangbasu amobasisali Yesu, ongo omoolali ino, la omobaki la ekulusu. ³¹ Mwengei amoyamalesali moto oho adje Likumu koto Mokalesi la ewo ende e lilome, la ohekeli Isalayele nano ekukolake motema koto e olimbesani masumu. ³² Todjei watotoli e sambo djaho, ndenge kikima koto elimo satu, enge Mwengei ahekeli la wango wakomotemeiyaka. ³³ Ango eokali iwo ndjongo, wamemelali, wapakali koto owaoli. ³⁴ Ase Mopalizeyo mwesi kombo ende Gamaliela, motiesakoli mo pui ongo wato kpaa wakomotemeiyaka nee, ayamalali la Sanedelina, atomali ate wapumbese makeke watutiani. ³⁵ Ase aasali la iwo ate: ''Pele dja Isalayele, huakani la wungo obali ino okeli wa wato. ³⁶ Laate liwoso e masio mango Tedasi ayamalali, adjakali oasi ate inde pendja adjei moto, ase ebiba e pele inga kama inei, walingelali la lingomba lande. Ase aolanali, koto wango kpaa wadjakali omotemei wayandjanali, wasilala koto iwo kpaa. ³⁷ La mbuse ende, Yudasi mo Galileya, ayamalali la masio madhingesake kombo, agulali koto wato mbuse ende. Ase moto oho aguali, wango kpaa wadjakali omotemei wayandjanali. ³⁸ La sambo djinge ikoetaka sikalandjo, ikoasaka la ino ate: Otilingeleni la sambo e wa wato, ase wadheeni, la ebili ate inga mungo mwano, te inga wungo otomo elongoyi la wato, ekokwa. ³⁹ Ase inga elongoi atie Mwengei, otiengani okwesi. Okahuakeni laate okodjani osanesi Mwengei. ⁴⁰ Wamookelali, wawawelali watutiani, wawabingali pimbo, wawaaselali koto ate wadhe oasi la kombo e Yesu, wawadheeli. ⁴¹ Walongwali liwoso e Sanedelina, waemelali laate watoloni wato wango waongi la osambo la loyi e kombo e Yesu. ⁴² Masio kpaa, la tepelo koto la monguta mwesi la mwesi wadjakali oaseli la otiesakoli mboli ndamu enge edhendji Yesu Kilisito.