¹ Kaiko nde ango Petele la Yoani wadjakali oasi la wato, wanganga Mwengei makumu la wasindjili wa tepelo koto la wasadukai wawapumbelali. ² Wayatungesali nda edjakali iwo otiesakoli wato, koto la otiesakoli la hoho obasi e wagwi la enge emodhendji Yesu. ³ Wawabatali mawo, wawabatali koto la woyogo tee lisio linge libilei. ⁴ Ndji ango ngbii e wango waokali engbundu eho wagemeiyali; motio mo pele ewumali inga koto itano. ⁵ Wuse wungo wobilei, makumu wagbotonoli la Yelusalema. ⁶ La Anasi nganga Mwengei likumu la Kaipa la Yoani la Alezandele la wango kpaa wadjakali wato wa oliye e wanganga Mwengei likumu. ⁷ Wabatali Petele la Yoani la odja ewu, wadjakali ohueli ate: ''La nda okulu inga la kombo e ndai ekelini ino lu loyi?'' ⁸ La eho Petele, nda etumesalanali inde la elimo satu, aasali la iwo ate: Makumu ma wato koto la wagbolo, ⁹ inga tosambesana keke, la loyi e sambo ndamu enge ekelani atie moto o ekoni, la oyewi inga la mboka e ndai oholo moto akali, ¹⁰ Eewane la ino kpaa, koto la wato kpaa wa Yisalayele, ate la kombo e Yesu Kilisito o Nazaleta, ongo omobakalini ino la ekulusu, ase Mwengei amobasesia tee ongo la wagwi, la mboka ende nde oholo moto opele ayamali liwoso lanu la wenge tetelake. ¹¹ Yesu Kilisito adjei libukeli linge lilumbali ino wamai monguta, eho nde ewumali moika e monguta. ¹² Mokalo eti la oeti moto; laate kombo eeti eti ala sese enge ehani ndondo e wato, enge eongi la iso okali la mboka eho. ¹³ Ango eenali iwo oasi wo hoho e Petele la Yoani, ndjongo wakamwali, laate waewali ate wadjei wato wango watitange kelasi . Wadjali oewi olamu ate wadjakali mongindji la Yesu. ¹⁴ Ango edjakali iwo odhendji ohongo moto okalali ayamali mongindji la iwo, watidjakali la loyi loasake. ¹⁵ Ase wawahali mboka ate wapumbe la Sanedelina, wapotali oyahueli iwo la iwo, ¹⁶ waasali ate: Tokokela woni la wa wato? Laate la omeemene pendja elembo esi esungu ekelani la mboka ewu, enge eeneni la hoho la wato kpaa wango wayabati la Yelusalema, toengiti koto owungani eho. ¹⁷ Ase, laate loyi luho litiandjane alidji la oeteli ndondo e wato, towayewese la oani ate, watiase la kombo eho alidji la moto te moikima. ¹⁸ Wawawelali iwo, wawatekisali ate waase te watiesakole la kombo e Yesu. ¹⁹ Ase Petele la Yoani wawaongoselali ate: Inga edja sambo ndamu la maiso ma Mwengei ate tookeni ino la ebete ete tomooke Mwengei, ino amene tenani loyi. ²⁰ Iso toengiti odhei oaseli djii sambo eeni iso koto eoki iso. ²¹ Ango esisali iwo owaaseli la oani, wawapumbesali, laate watieneli loyi te luesi la owahi etumbu koto la loyi e wato, la ebili ate iwo kpaa wadjakali omohi Mwengei otwa la loyi wungo wokelanali. ²² Laate oholo moto atie inde elembo eho e mokalo ekelanali adjakali la wilanga oyeti tuku inei. ²³ Mbuse e opumbi, Petele la Yoani wakeeli atie wato wau amene, wawaaselali sambo kpaa djinge wanganga Mwengei la wagbolo waasali la iwo. ²⁴ Ango eokali iwo ndjongo, wadjambali mili mau la oboliani pendja atie Mwengei, waasali koto: ''Motiesakoli, odjei Mwengei ongo okeli likolo, mbume, ewale la wihoo kpaa winge widjei ndondo eho. ²⁵ Koto ongo la mboka e elimo satu oasali la monoko mo tata osu Davidi, motuke mo owe ate: ndjoni minga miumia la miki koto wato wa miki wakobundwaka ndji sambo djinge idjangi kole? ²⁶ Makumu ma mbume wayamalia la makumu wayaboliali nda moto moikima la omoyamaleli Likumu, koto la omoyamaleli moto onde okpulani maita. ²⁷ Kaikoase, Elode la Pose Pilato la wato wa miki, mongindji la wato wa Yisalayele, wayaboliali ndondo e ehele gbata, la omwamaleli motuke mo owe mosatu Yesu, ongo owe omokpulali maita. ²⁸ Laate ikokelaka sambo djinge ewo e owe koto mwano mo owe eyanali liwoso ate ekopumba. ²⁹ Ase sikandjo, Likumu, ene ndjangi djau, ndjongo ehekele mituke ma owe maengi eyaselake engbundu e owe la mohandja. ³⁰ Ango okonanolaka ewo e owe la okalesi koto ango wilembo koto makamwesi eenesake sambo djinge wikodja, ekokelanaka la kombo e motuke mo owe mosatu Yesu. ³¹ Ango esisali iwo oyakongi, ebete enge eyaboliali iwo edudumali, iwo kpaa koto watumali la elimo satu wadjali oaseli engbundu e Mwengei la mohandja. ³² Ebiba e wango wagemeiyali wadjakali la motema sa mwesi koto la molimo sa mwesi, koto moto tueti adjakali oasi ate enge ema edjei e inde amene la wihoo winge widjakali inde la eho. Ase wawanesali wihoo kpaa mongindji. ³³ La okulu wosungu watutiani wadjakali ohekeli litotoli la kole e obasi e Likumu Yesu, koto magba masungu edjakali ngbii atie iwo kpaa. ³⁴ Moto tueti ndondo ewu adjakali la odjangi, laate wango kpaa wadjakali la wilanga inga minguta, wadjakali otambi eho koto okpali makuta ma wihoo winge witambani ³⁵ wadjakali otiki eho la mawo ma watutiani. Mbuse eho wadjakali okawoli eho moto la moto la ndenge eengani la posa ende. ³⁶ Edjepu, ongo watutiani wamohali kombo Balanabasi, ongo inga wakukola einei Mana o mohandja, inde Molebi, mana o moki mo Sipelelusi, ³⁷ atambali mobele monde akpalali wadjenge abatali eho la makolo ma watutiani.