¹ Petele la Yoani watelali mongindji, la engele e oyakongi, edjali engele e libwa. ² Edjali la molome mwesi motengwaka e wotamake, wadjali omokpali, koto omobati masio kpaa la moluhe mo tepelo, linge liweli iwo Olamu, laate aongake makao ma osikana atie wango wakolingelaka la tepelo. ³ Moto oho, amwenia Petele la Yoani waokeke olingeli la tepelo, apotali oongi laate atote makao ma osikana. ⁴ Pitele, mongindji la Yoani walumbali ehoi ya inde, ase Petele aasia ate: ''Todhenda iso.'' ⁵ Ase awadhengia la mwano kpaa, la odhendeli ate akotota ema te esi ya iwo. ⁶ Sikandjo Petele asia la inde: ''Iti la palata la wolo, ndjongo djinge edjei mbai la eho eho nde ikoha la owe: La kombo e Yesu Kilisito o Nazaleta, yamala koto somba. ⁷ La eho, Petele amohelali la ewo e lilome, amwaamalesia, ndji la enge engele, mangbanda e makaolo mande la mouli mande matetelali. ⁸ Ahumbwali ayamalia, ase apotali osombi, alingelali mongindji la iwo ndondo e tepelo, adjali osombi ohumboi la omogani Mwengei. ⁹ Wato kpaa wa mweneli akosombaka koto akomoganaka Mwengei. ¹⁰ Wamwewali ate edjakali inde ongo odjali oyabati la oongi makao ma osikana la moluhe Molamu e tepelo, watumali la oyahueli koto la owangi la loi wungo emowumelali. ¹¹ Nda etiwadheli inde Petele la Yoani, wato kpaa watilali obangu ya iwo, la ebete edjakali iwo oweli etombo e salomona. ¹² Ango eenali Petele ndjongo, aasali la wato waho ate : ''Pele dja Isalayele, lande ekoyahuelakani ino la wu loi ndjo? lande ekotodhendakani ino, nda edjei la otetelaki wosu amene te inga la mboka esu nde ekeli ata tomosombese oholo moto? ¹³ Mwengei o Abalayama, la Isaka, la Yakobo, Mwengei o watata wasu, ahekeli otwa atie motuke monde, Yesu ongo omokawalini ino koto omowungani liwoso la Pilato, ongo olukali omodhei. ¹⁴ Omowunganyani moto mosatu koto moto molamu, ase oongalini molome mwesi, mooli mo wato, ate waoeneseleni ino magba e omodhei. ¹⁵ Omooliani Likumu o mokalo, ase Mwengei amosusolali tee ongo la wagwi, iso todjei watotoli e loyi laho. ¹⁶ Eho lenge, kombo ende, la mboka e ogemei osu la kombo ende, etetelesia moto ongo okomodhendakani ino koto ongo omoyewini, koto ogemei wungo wodjei la mboka ende emoumesia oholo moto la mokalo la maiso manu kpaa. ¹⁷ Ase sikandjo, wamanima, iyewi ate okelalini la odjangi oyewi, ndji ndenge makumu manu koto wakelali. ¹⁸ Ase Mwengei aengesi wungo ounali inde atie watiesakoli wande, ate Kilisito onde akoene odjidji. ¹⁹ La ndjongo, kukolani esombeli enu, koto yakukolani laate masumu manu malimane ²⁰ laate gboo e limbile edje atie Likumu inde amene koto laate amotome Kilisito ongo obatani la kole enu, Yesu. ²¹ Ongo likolo eengi omobanye tee wiengele winge Mwengei akowongosa sambo kpaa poli ndenge eyasali inde la monoko mo watiesakoli wande wasatu la engele e gala. ²² Moize aasali ate: Likumu Mwengei akowumeselani ino ndondo e wamangbanu motiesakoli mwesi nda mbai. mookani la otutei sambo kpaa enge ekoasani inde la ino. ²³ Molimo kpaa ongo otimooka motiesakoli moho, akoolana ndondo e wato kpaa. ²⁴ Edjei ndjongo, watiesakoli kpaa opoti la Samuele, la wango wamotuteali mbuse, wango kpaa waasali, watiesakolali koto ma masio la hoho. ²⁵ Odjeini wana wa watiesakoli koto la ogemeiyani wungo Mwengei akelali mongindji la watata wanu, ango eyasali inde la Abalayama ate: La mogono mo owe maliye kpaa e mbume ekopambwana. ²⁶ Edjei atie ino yo nde Mwengei amwamalesali motuke monde, amotomali laate aopambweni koto la olongosi mwesi la mwesi onu la tomo djande mbe.