¹ Ango eteneli etotanali la loyi esu ate toke la andondoli ongo la Italia, wahali Polo la wato wadji wa woyogo la mawo ma likumu mwesi o wasoda, kombo ende Yuliesu, e ebiba e Ogisito. ² Tolingelali la andondoli enge elongoyi la Adelamitiumu, enge edjaakali oki la wibete winge wisukani la malia ma moki mo Azia. Topotali oki, Alisitalaka adjaakali mongindji la iso, inde moto o Masedonia e Tesaloniki. ³ Ekundu eho, toyamalali la Sidonia, ongo Yuliusi adjakali la motema mo wouma atie Polo, ahali koto Polo mboka e oki okawadhengi wino wande la okatoti ligamesi atie iwo. ⁴ Mbuse e olongoi ongo, tolekia kelekele e esii e Sipele, la ebili ate ehoho edjakali obingi liwoso. ⁵ Tosombali ndondo e ewale, kelekele e Silisia la Pamipilia, toyamalali la Mila e Lisia. ⁶ Ongo likumu o wasoda agbotoli andondoli eesi e Alezandelia enge edjaakali oki la Italia, atotelesali iso ndondo eho. ⁷ Ndondo e masio masungu tosombakali petee, la monga ngbii toumali la Kinidi, nda etotekesali ehoho ate totikee lihiele la mboka eho, tosombali kelekele e Keleta e Salomoni. ⁸ Mbuse e osombi la monga kelekele eho, toumali la ebete eesi enge ewelani, makitikolo malamu, enge edjaaki ahue e gbata Lasea. ⁹ Toetesali engele ngbii, eumali sikandjo huko osombi la andondoli laate otoni wilaka e lisio lidhihake masumu lietali. Polo ahaali limungoli, ¹⁰ aasali la iwo ate, ''Pele ieni ate ehele okendo e andondoli ekopumbesa huko, te sa e wihoo winge widjei la andondoli, ase koto la loyi e milimo masu.'' ¹¹ Ase likumu o waSoda amookelali nde mosombesi andondoli la meemene andondoli la ebete e obilei sambo djinge iyasali Polo. ¹² Nda etidjaakali likitikolo laho olamu la oetesi engele e pio ongo, ndjongo wato ngbii wango wadjakali ndondo e andondoli waonoli ate tolongwe ango, la oluki inga wakoenga oumi te la Penesia la oetesi engele eho. Ango nde likitikolo e Keleta enge edhukwani la nolodi-esiti koto la sudi-esiti. ¹³ Ango epotali ohohi ehoho e sudi maa keke, wabundoali ate mwano mowu moengesani. Watelesali longo, andondoli epotali osombi kelekele e Keleta. ¹⁴ Ase mbuse ehoho esungu enge eweli iwo ate hilikana eyadjimbia olongoi likolo la mokoli mo esii. ¹⁵ Ango andondoli ebinganali la oteteli, etiengali koto omalesi moto la ehoho, toyadheeleli, tokpalanali. ¹⁶ Toetali la Sudi e esii ekeke enge eweli iwo ate Koda, inga te ndjongo edjaakali minga laate totote te ma waato enge edjaaki mbuse e andondoli. ¹⁷ Mbuse e otelesi eho la andondoli, wapotali okeleli miliki misungu la oamalesi andondoli, nda edjaakali iwo owangi okanangani la ngene e Silitisi, wadjimbali wihoo winge wikosombesaka andondoli, la ndenge eho wayadheelia ehoho ewasombese. ¹⁸ Kaikoase, nda edjaakali iso obingani la ehoho eho la ndenge mbe, ekundu eho wapotali olongosi wihoo wilitake ndondo e andondoli. ¹⁹ La lisio esato, la mawo mau amene walumbakolali wihoo wa andondoli la malia. ²⁰ Ango ekelali masio ngbii wuse la minoto mitidjaakali oeneni, koto nda ehoho enge edjaakali otobingi iso etidjaakali ekeke, lomungo wosu wokalake wosilali. ²¹ Ango ekelali iwo engele ndai odjangi olaki ilaka, Polo oyamalali awodja ewu, aasali ate, ''Pele, ewongoli ondjokini mbai, inga totihelali mboka e ewale tee la Keleta, nda totiene ehele huko. ²² Sikandjo ikoongoko la ino odjeeni la motema e mogalia, laate molimo teeti ndondo enu ekosalamata, ndji andondoli muho amene nde mokobitana. ²³ Laate la likolo la keke, ahumbwa mwesi o Mwengei ongo odjei mbai moto onde koto ongo mbai ikokelelaka otomo wosatu, ayamalali ahue e mbai ²⁴ aasia, 'Otiwange, Polo. Ewongi la owe oyamali liwoso la Kaisala, koto, dhenga! Mwengei aohiga la magba pendja wango kpaa wakokelaka okendo mongindji la owe la andondoli.' ²⁵ Eho lenge, pele, djaani la motema e mogalia! La ebili ate ikomogemeiyaka Mwengei ate ekokelana ndji ndenge endjaseli inde mbai. ²⁶ Ase malia makotolumba kelekele e esii eesi.'' ²⁷ Ango likolo e liomu la inei liliali, iso todjaakali ndji okpalani wiati la wiati likolo e ewale e Adelia, awodja e ewale, wato wa otomo e andondoli wapotali oeni nda wakoyandongbaka ahue e ma mbume. ²⁸ Wanangia longo elitake ongo gboo la moliki moesi, ase walumbia la malia Waengeya, waenia ate malia malindi metele tuku isato la sambo, wakia ma lihiele walumbia alidji moliki moho, waenia ate malia malindji ango metele tuku iwale la mwambi. ²⁹ Nda edjaakali iwo owangi ate totinangane la mabukeli la ebete eesi ndjo, walumbali longo inei mbuse e andondoli, wamalesa eho, wadjakali olambeli la motema mohelake ate wuse wotane. ³⁰ Wato wa otomu e andondoli wadjakali oluki ate watile, wadjimbia andondoli mokeke ndondo e malia la okosi ate wapotia olumbi longo edji liwoso la andondoli. ³¹ Polo asia la likumu o wasoda koto la wasoda ate, ''Inga wa wato watiabate ndondo e andondoli, watikala. ³² Wasoda watenali moliki mungo mohelali andondoli mokeke, wadheeli eho eke. ³³ Ango eumia ahue e otani wo wuse, Polo apotali ohekeli wato kpaa mogalia ate walake wilaka, aasali ate, ''Denda keke edjéi masio liomu la manei okolambelakani, otilakaka kotoni te ema teeti. ³⁴ Eho lenge, iwongini ino olakeni ilaka laate edjei libanyeli lanu, la ebili ate te swe eesi e moto monu motibitana.'' ³⁵ Mbuse e oasi djongo, atotali koto wokoke, amohali Mwengei pambo liwoso la iwo kpaa. Abukali eho, apotali olaki. ³⁶ Iwo kpaa waumali la otetelake, wapotali iwo amene olaki ilaka. ³⁷ Iso kpaa todjaakali wato kama iwale la tuku sambo la motoba. ³⁸ Ango egbetali iwo ilaka, wapotali olumbi ndongo la malia la okokoli woliti wo andondoli. ³⁹ Ango etanali wuse, wato wa otomu e andondoli watiewali moki muho, ase waeneli ebete eesi malia malingeli la mbume la likitikolo e ngene, watotali mwano inga ekoenga, onangi andondoli la likitikolo laho. ⁴⁰ Mbuse e oteni walongo wadheeli eho ekwe la ewale, ndji la enge engele watokolali miliki e wakai, mbuse e otelesi esindje e liwoso e andondoli la ehoho, watutiali likitikolo. ⁴¹ Ase waumia la mokoli mwese mongene enge ewale ekolumbelaka eho malia wiati kpaa wiale, waamalesali andondoli ango, mbanda e andondoli enanganali la oteteli, etidjaakali koto obandani, ase esuki enge mbuse epotali obitani la ndenge e bo. ⁴² Wasoda watotali mwano ate waole wato wa woyogo weesi kpaa, laate moto tueti aenge obingi malia la otili. ⁴³ Ase likumu o wasoda abalali omokalesi Polo, atekesali koto iwo oengesi mwano mou. Atomali wango waewi obingi malia ate wayalumbe la ewale, wasawe kondolo. ⁴⁴ Wango wadji wakowatutia mbuse, woyahelele la mite, wango wadji woyahelele la wisuki wa andondoli. La ndenge eho ekelanali ate wato kpaa wasawe kondolo odjangi huko.