¹ Mbuse e okali wosu, tookali ate kombo e esii eho edjaali Malita. ² Wato wa moki muho watoeneselali magba, watoyambali la mwemu ngbii, walolesali misa la loyi e ewongo enge edjaaki oloyi koto la loyi e pio. ³ Ase Polo andukaali kula laate alumbe la misa. ndjoo mwesi epumbali la djinge kula otili ehela, eyahelelali la ewo e Polo. ⁴ Ango eenia wato wadjaaki ango la esii nama eho e ngenge eyaheleli la ewo e Polo, wayaasania iwo iwo ate, ''Oholo moto meemene adjei mooli mo wato, inga te ate alongwali la huko e malia, womeemene wungo ekoongoko ohekeli etumbu etimodhee ate adje la mokalo.'' ⁵ Ase Polo abandali ewo ende, ndjoo eho ekpia la misa, ndjongo Polo aokiti te oembi. ⁶ Wadjaakali omolambeli inga ewo ekomokunda te ogwi mbala kikima. Ase mbuse e olambeli engele ndai, odjangai oeni loyi te kikima emoumeli, wakukolali mamungo mau, wapotali oasi ate adjei mwengei mwesi. ⁷ Ahue e ebete eho, moto mosungu e esii eho, kombo ende Pubiliusi. Adjaakali la mbume djande, atoyambali olamu, atobatali koto atie inde masio masato la logoo. ⁸ Eumaali, sango pubiliusi aembaali ekoni e oteli misa la osolo e makila. Polo akeeli okamodhengi, ayakongali, abatali mawo likolo lande, akalali. ⁹ Mbuse eho, wato wadji wa esii eho wango wadjaakali la wikoni, wadjaaaki koto odji atie inde, wadjaakali ototi mokalo. ¹⁰ Watotemeiyali nee. Ango epotali iso ototi okende e andondoli, watohali ilaka kpaa winge wiengi la okendo wosu. ¹¹ La gboo e ndebo esato, tototali andondoli eesi enge elongwali la Alezandelia, enge eetesali engele e pio la esii eho, moto mo andondoli eho edjaali la elembo,''Wana wa Djeusu.'' ¹² Towumali la Sulakusa, toyabatali ongo masio masato. ¹³ Tolongwali ongo, tosombali kelekele, toumali la Legiuma. Mbuse e lisio liesi, ehoho eesi e sudi ehohali, toumali la Puteoli ekundu eho. ¹⁴ Togbotoli wamaangbasu la moki muho, watoongoli ate toyabate mongindji la iwo poso eesi. Edjaakali la ndenge eho nde eumali iso la Loma. ¹⁵ Ango eokaali wamaangbasu mboli esu wadjaali tee la likitikolo e Apiusi ebete elangalake edjaali ndi minguta isato, laate wandongbane la iso. Ango Polo awaeneli, amohali Mwengei pambo, atetelali koto wenge. ¹⁶ Ango eumali iso la Loma, wamohia Polo mboka e oyabati inde amene mongindji la soda ongo odjaali olambiani la inde. ¹⁷ Mbuse e masio masato Polo awelali wiloko wa Wayuda. Ango eyaboleyali iwo, apotali oasi la iwo ate, ''Pele, inga te ate itikelali ema eesi ebe atie wato, te la wihahaneli e watata wasu, ikawanali nda moto o woyogo tee ongo la Yelusalema la mawo ma Waloma.'' ¹⁸ Mbuse e Waloma osambesi mbai, wabalali odhei mbai, la ebili ate itidjaali te la loyi loikima atie mbai enge ewongoki la logo. ¹⁹ Ase nda Wayuda watonali loyi luho, ihilanali la oongi ate ike osambi liwoso la Kaisala, ase etidje nda nde idjei la loyi loesi epundake moki mo mbai. ²⁰ Eho lenge, iongoli la oyakongi ate isolole la ino, la ebili ate edjei la loyi e mokalo mo Isalayele nde inangani la mi miliki. ²¹ Iwo waasali la inde ate, ''Tototakiyo ekpata teeti enge elongoyi la Yudea la loyi e owe, moto tueti ndondo e wamangbasu wango wadji atohi iso mboli inga te otoaseli iso loyi loesi lobe la kole e owe. ²² Ase tomungoyi ate edjei olamu tooke atie owe amene wungo wokomungwaka owe, laate la omeemene, la wungo wodhendji ma enge lingomba, toewi ate wiati kpaa wato wakoaselaka eho obe.'' ²³ Wiloko waho ebete eikima la Polo waonoli wuse woesi, wuse woho wadjaali wato ngbii ogbotoni la inde la ebete enge edjaakali inde ayabati. Awalumbwelelali loyi luho la ohekeli litotoli lilamu la loyi e okumu wo Mwengei, la olukani owagemeiyesi la enge emodhengi Yesu, la owainyei pui dja Moize koto e watiesakoli, opoti boo tee la pokwa. ²⁴ Wadji wagemeiyali sambo djinge iyasanali, ase wadji watigemeiyali. ²⁵ Nda edjangali ookani ndondo ewu, wapotali oki, Polo aasali la iwo ate, ''Elimo satu aasali olamu ango edjaali oasi la watata wasu la mboka e motiesakoli Isaya. ²⁶ Inde aasali ndjo, ' keke atie wa wato, aasa koto ate, ''Okookani, ase otihelani kole; odhengi, okodhengani ase otieneni. ²⁷ Laate motema e wa wato eteteliga, koto la matoyi mawu, waoki odjangi okeli te ema, walimi koto maiso mawu, laate watiene la maiso mawu koto watioke la matoyi mawu, koto watihele kole la motema mowu, watiyakukole, laate itiwakalese''' ²⁸ Paulo aasali a leeti, ate, ''Yewani ate, mokalo mo Mwengei etomani atie wapagano, iwo wakooka eho pendja.'' ²⁹ Ango easia Polo ndjongo, Wayuda wakeeli la mosio iwo la iwo. ³⁰ Polo ayabatali wilanga wiale kpaa la monguta monde amene eputelake, adjali owayambi wato kpaa wango wadjaakali oki omodendji. ³¹ Inde adjaali oinei iwo okumu wo Mwengei la otiesakoli sambo idhendji Likumu Yesu Kilisito la hoho, koto la womeemene odjangi litekesi.