¹ Agilipa aasali la Polo ate, ''Ehekemeli la owe mboka la oasi la loyi e owe amene.'' Ndjongo Polo ananolali ewo ende ase apotali oasi la osambi ate. ² ''La sambo kpaa djinge Wayuda wakambi mbai la eho, Likumu Agilipa, ikoyatangaka moto o mwemu nda edjei liwoso la owe nde iengi osambi la lisio la keke, ³ la ebili ate, owe oewi olamu ehahaneli kpaa koto wakokia kpaa ndondo e Wayuda. Eho lenge iyakongi la owe ate ooke mbai la motema ndayi. ⁴ La enge edhengi mokalo mo mbai opoti olenge wungo wobeki mbai la eho tee lipotele e moki mo mbai koto la Yelusalema. ⁵ Wayuda kpaa waewi mbai liwoso tee la lipotele waewi, inga wabala ototoli, ate la otutei ma lingomba linge lieti sambo tetelake la losambo lasu, idjaali Mopalisayo. ⁶ Sikandjo ikosambesanaka la loyi e liwuna linge Mwengei ahali watata wasu. ⁷ Liwuna linge maliye liomu la maale masu wakolambelaka ototi liengesi laho, la okeleli Mwengei otomo likolo la wuse, edjei la lu loyi nde Wayuda wapundi mbai la eho , Likumu. ⁸ Lande, egemeitiaka ino ate Mwengei akosusolaka wato waguake?'' ⁹ Mbai ikobundwali la motema mo mbai ate, ewongi la mbai okeli sambo ngbii la owamaleli kombo e Yesu moto o Nazaleta. ¹⁰ Ikelelali eho la Yelusalema. Ibatali la woyogo wasatu ngbii, laate itotali wotomo wuho atie nganga-Mwengei likumu, engele eengali oolani, idjaakali ooni oolani. ¹¹ Idjaaki owahekeli iwo etumbu mbala la mbala la wasinagoga kpaa, idjaakali owahili la otetelake ate waungane ogemei. Nda edjaakali mbai la limemu lawu, ikeeli lihele tee la oenesi iwo odjidji te ongo la djieti gbata. ¹² Ndji la mogalia muho, ango edjaakali mbai oki la Damasi, la otomo e wanganga-Mwengei makumu; ¹³ la mbile, ieneli la mboka, likumu, ngbai eesi wungo woeti ongali wo wuse ebingia tee ongo likolo la lisuka suka la mbai la wango koto wadjaaki oki la mbai mongindji. ¹⁴ Ango ekwiya iso kpaa la mbume, iyokia moli mwesi moasia la mbai la monoko mo Ebele ate, 'Saulo, Saulo nda ndenge okoeneseke owe mbai odjidji? Ekodja la owe minga oyamaleli misete.' ¹⁵ Ase mbai iwongolali ate 'Owe ndai, Likumu?' ase Likumu oasali ate, 'Mbai Yesu ongo okomoeneseke owe odjidji. ¹⁶ Longwa la mbume, yamala la makolo ma owe, la ebili ate edjei la loyi e ehele kole nde iyaenesi atie owe, la ooni owe nda mokeleli la mototoli e sambo djinge ieni owe koto la sambo djinge ekoenese mbai owe la enge edhengi mbai; ¹⁷ iwooni ndondo e wa wato koto e wapagano, wango ekotomaka mbai owe atie iwo, ¹⁸ la owadhuholi maiso, la olongosi iwo la likolo laate waume la hoho koto owalongosi la okulu e mondjili laate wadje atie Mwengei, laate watote olimbesi e masumu koto lisango ndondo e wango wasatisani la mboka e ogemei wou atie mbai.' ¹⁹ Eho lenge, Likumu Agilipa, itiengali okokeyi saki eho e likolo; ²⁰ ase atie wango wadjaakali poo la Damasi koto atie wango wadjei la Yelusalema, la moki kpaa mo Yudea, koto atie wapagano, ikpalali mboli ehele ate, ''Ewongi la iwo okukoli motema koto oyakalambi atie Mwengei koto la okeli tomo djinge ienesi ate wakukoli motema. ²¹ Edjei la loyi e sambo djaho nde Wayuda wahelali mbai la tepelo, walukali ondjoli mbai. ²² Kaikonde, nda ndenge etoti mbai ligamesi linge lilongoyi atie Mwengei ikohaka tee lisio la keke litotoli atie wato wakeke koto la wato wasungu, ase itidjaali oasi loyi lodji, ndji enge Watiesakoli la Moize waasali ate ewongi okeleni- ²³ ate kilisito awongi oeni odjidji, nda moto o poo ongo obasi longwa la wagwi, awongoli otiesakoli ngbai atie wa wato koto la wapagano.'' ²⁴ Ango edjaakali Polo oasi sambo djaho ndondo e osambi wonde, Pesitusi aasali la moli mopamake ate, ''Polo oyekoli ngbii e owumesia boli.'' ²⁵ Ase Polo aasali ate, ''Ikoniti boli, Pesitusi Moto o Mogano, ikopumbesaka nde wingbundu wimeemene koto la mamungwene malamu. ²⁶ Likumu ongo ikoasaka liwoso lande, la eyaseli wo hoho ayewi sambo djaho olamu; laate mbai igemei pendja ate la dji sambo ndjo edjeiti te la eesi enge inde adjangi oewi; laate loyi luho etikelenali la ebete eisanake. ²⁷ Likumu Agilipa akowagemeiyaka Watiesakoli? Iyewi ate okowagemeiyaka.'' ²⁸ Ase Agilipa aasali la Polo ate, ''La ma engele keke okogemeiyesa mbai iume Mokilisito?'' ²⁹ Aseko Polo aasia ate ''Edjei la ma engele keke, inga koto mbuse e engele ndai, ikoemele nee liwoso la Mwengei ate te ndji owe moikima ase koto wango kpaa wakookaka mbai keke, oumeni ndenge edjei mbai, longosa ndji djii miliki.'' ³⁰ Ase likumu ayamalali, ndenge kikima koto la likumu o moki, la Belenisa, la wato koto wango wayabatali mongindji la iwo; ³¹ ase ango edjaakali iwo opumbi, wadjaakali oasi iwo la iwo, ''Oholo moto ndjo akeliti loyi te lokeke linge liengi la logo te woyogo.'' ³² Alidji, Agilipa aasali la Pesitusi ate ''Waongoki omodhei oholo moto inga ationgake oki osambi atie Kaisala.''