¹ Masio masato mbuse e olingeli e Pesitusi la okumu wonde, alongwoali la Kaisalia, atelia la Yelusalema. ² Wanganga-Mwengei makumu la iloko wa Wayuda, wamopundali Polo liwoso lande, wapotali oyatati la inde, ³ wadjaaki omoongi ate awaokele magba, la omokoesi Polo, atome wamowele la Yelusalema, kaikoase wadjaakali omoaleli lisala la omooli la mboka. ⁴ Pesitusi awongosali ate Polo adjei la woyogo e Kaisalia, inde amene koto akobalaka okii ongo la loga. ⁵ Aasali alidji ate, ''Wango wadjei la okumu ndondo enu, wayadjimbe mongindji la mbai wamopunde, inga loyi lopundake wodjei atie moto oho.'' ⁶ Pesitusi aetesali masio mwambi inga liomu ndondo ewu, ayadjimbali la Kaisalia, ekundu eho, ayabatali la ngbelengo e masambi, atomali ate wadje la Polo atie inde. ⁷ Ango oumali inde, Wayuda wango wayadjimbali tee la Yelusalema wayamalia ango omolingi, wadjaali omopundi la sambo ngbii koto e sungu sungu djinge etiengali iwo oenesi womeemene woho. ⁸ Polo awongosali la osambi ate, ''Ikeliti obe te oikima la loyi e pui e Wayuda, inga te la tepelo, inga te la kole e Kaisalia.'' ⁹ Ase Pesitusi nda ebalali inde ate Wayuda wamoemele, amowongoeselali Polo ate, ''Ogemei oteli la Yelusalema la osambesani liwoso la mbai la loyi e dji sambo ndjo?'' ¹⁰ Ase Polo aasali ate, ''Ikoyamalaka liwoso la ngbelengo e masambi e Kaisalia, enge owongi la mbai osambesani. Iwakeliti Wayuda obe te woikima nda ndenge owe amene okoeneke eho. ¹¹ La ndjongo inga idjaa moto mobe, inga koto ikeli loyi liesi wungo woengi la logo, itoniti logo. Aseko inga sambo djinge ikohelesaka iwo mbai idjangi kole moto te moikima aengiti okawi mbai atie ewu saa ate awaemelese .Ibali oki osambi atie Kaisala.'' ¹² Mbuse e Pesitusi osoyi ndungu la wato wande, awongosali ate, ''Nda eongi owe oki osambi atie Kaisala; okoke atie Kaisala!'' ¹³ Ambuse e masio, likumu Agilipa mongindi la Belenisa waumali la Kaisalia la omodhendji Pesitusi. ¹⁴ Edjaki iwo oetesi masio ngbii ongo, Pesitusi amosumbelali likumu mboli e Polo ate, ''Molome mwesi adjei ala, ongo omotiki Peliki la woyogo.'' ¹⁵ Ango edjaaki mbai la Yelusalema, wanganga-Mwengei makumu la iloko wato wa Wayuda wadjaali oasi sambo djinge imodhengi, waongoli la mbai ate imokwese. ¹⁶ Iwawongweselali ate Waloma watidjaaka la ehahaneli ekawake moto la loyi eokeli wato magba, liwoso ate moto oho ongo opundani aenane la wapundi wande atote nano esambake loyi wungo wopundani inde la eho. ¹⁷ Eho lenge ango edjaali iwo ala, itiumwali, ekundu eho iyabatali la ngbelengo e masambi, itomali ate wamowele moto opele oho. ¹⁸ Ango eyamalali wango wamohelesali, watimopundali te la eesi e sambo mbe djinge idjaaki mbai omomungweli. ¹⁹ Aseko wadjaaki ndji obatani la inde kokia la ndenge ewu eyakongake la Mwengei, la loyi koto e Yesu mwesi ndjo ongo ogwa, ase ongo Polo adjaaki ndji oasi ate adjei la mokalo. ²⁰ Mbai iyawedjaali la kole e kokia eho likolo e djinge sambo, imohuelali inga akogemia oki la Yelusalema osambesani ongo la sambo djaho. ²¹ Aseko Polo aongoli ate wamobanye laate loyi lotenane la okumu wosungu, ndjongo itomaali ate wamobanye tee ango ekomotoma mbai atie kaisala. ²² Agalipa aasia la Pesitusi ate, ''Ibali ate imooke koto moto oho mbai amene.'' Pesitusi aasali ate, ''ekundu okomooka.'' ²³ Ekundu eho, Agilipa la Belenisa wadjaali la ndenge e otwa, walingelali la monguta e masambi mongindji la makumu e wasoda koto la wato ngbii e gbata. Pesitusi atomali, wadjaali la Polo. ²⁴ Pesitusi aasali ate, ''Likumu Agilipa la ino kpaa wango wadjei mongindji la iso aha, omwenini oholo moto ongo Wayuda kpaa waongoli mbai la Yelusalema koto ahala, wadjakali opami ate ewongiti kine la inde odjei la mokalo. ²⁵ Mbai ieneli ate akeliti loyi lungo liengi la logo. Ase ango inde amene aongoli ate ake okasambi atie Moto o mogano mosungu, itotali eteneli e omotomi. ²⁶ Ase la loyi lande, iti pendja la loyi e modhingelake Likumu la mbai . Eho lenge imopumbesi liwoso lanu, la oeteli liwoso la owe, Likumnu Agilipa. la ebili ate, mbuse eho lisambesi likokelana, ienge ototi ma loyi limodhingake. ²⁷ Laate iyewi ate omotomi mohelani la woyogo odjangi oasi obe wonde edjei loi lo ekete.