¹ Ase elimo easi la hoho ate, engele e gboo, wadji wakodhe ogemei, la oyaheleli la easeli e milimo ma ekosako alidji la matiesakoli ma mindjili ² la ekosako e wato wango wakoasaka moleho, wango wabatani eleme nda enge e ebeha e misa la oyewi owu; ³ wakotekisaka oikani, otomi wato watone olaki wilaka winge Mwengei akeli laate wato wango wadjei la ogemei pe wayewi omeemene walake eho la dombwa. ⁴ Laate wiho kpaa winge Mwengei akeli edjei olamu, ase ema teeti ekokiti olumbami inga walaka eho la dombwa, ⁵ laate esatisami la liloba e Mwengei pe la oyakongi enge wakeleli eho. ⁶ Inga owaasela wa maangbasu dji sambo, okodjaa motuke molamu mo Yesu Kilisito, ongo olakesi mamungwene mande la maloba magemeyake pe la matiesakoli malamu enge ebilei owe olamu. ⁷ Tona masekpe ma moleho e mbange wali. Alidji kela kpaa owume la ekaleli enanganake la Mwengei. ⁸ Laate galasisi e wenge edjei olamu la maa sambo keke; ase enge enanganake la Mwengei edjei olamu la sambo kpaa, laate eho edjei la liwuna e mokalo mo keke pe la masio mageleli; ⁹ Loyi luho edjei meemene pe ewongi ogemei eho te la oyaisi. ¹⁰ Tookelaka otomo otetelake pe la oli wenge, laate tobati dombwa esu atie Mwengei mwesi o mokalo, ongo odjei mokalesi o wato wandenge kpaa. ¹¹ DJaaka ohi djinge tomani pe tiesakola eho. ¹² Moto tueti atidendje olenge wo owe; kasi dja ekpangele atie wato wameemene la eyaseli, la esombeli, la libalano, la ogemei, la ekaleli elangi. ¹³ Liwoso ate idje, yahekela otangi liwoso la wato kpaa, laate wato kpaa waene ate okokeeke liwoso. ¹⁴ Otiene pamba likawo linge lidjei atie owe, enge ehekalami la owe la mboka e totoli pe la limbutukele e wiloko wabatali mawo likolo la owe. ¹⁵ Sumbua djinge sambo, yahekele kpaa la eho, laate wato kpaa waene la hoho ate okokeeke liwoso. ¹⁶ Bata wokenge atie owe a mene pe la oineyi wowe; yahela la sambo djawo, laate inga okela ndjongo okoyakalesa pe okokalesa wato wango wakookaka.