¹ Lu loyi edjei meemene, inga moto abala odjei sindjili, abali otomo olamu. ² Ekoki ate sindjili adje moto ongo odjangi opundami la wato, molome o moli moikima, moto ongo otietesaka molelo la ekaleli ende, moto o mamungo malamu, moyambi wato, moto ongo ayewi matiesakoli. ³ Akokiti odjei mokengi mo maana, moswi mo wato, motobi mo wato, te moto o sambo tetelake, te moto ongo obali wita, te moto ongo okobalaka wadjenge. ⁴ Moto ongo akotiesakolaka monguta monde amene la ndenge elamu, ongo wana wande wadjei la otosi pe watitotaka sambo la odendeyi; ⁵ meemene inga moto atiyewe osombisi monguta monde amene, nda ndenge ekoki inde osombisi molako mo Mwengei? ⁶ Akokiti odjei moto ongo ogemei oholi, la owangi ate atitume la elolo pe atikwe la etumbu enge ekwate etota. ⁷ Adje moto ongo wato wa saa wakomoaselaka sambo ndamu laate atikwe la soni pe la lisala e etota. ⁸ wa diakona iwo pe wakoki odjei wato wango watitotaka sambo la mosimbo, wato wango wati la minoko miale, wango watiahe la bino, watidje wato walitema wango wakolukaka ototi asumbelia la ndenge mbe; ⁹ Wakoyisaka liisami esatu, e ogemei la mamungwene malangi. ¹⁰ Wakowamekaka liwoso la oyewi inga waengi, mbuse wadje wasali wa Mwengei, inga watipundane la loyi te liikima. ¹¹ Wali iyo pe waengi odjei wato wango watitotaka sambo nda mosimbo, wango watibukelaka wato moleho, wango watietesaka molelo la ekaleli ewu, wato wa meenene la sambo kpaa. ¹² Wadiakono wakoki oiki moli moikima, wato wango wakokambaka wana wawu olamu la watu wa minguta mawu la ndenge ndamu ¹³ wango wakokelaka otomo owu la ndenge ndamu, wakototaka eholo e mogano, oasi la hoho pe la omeemene la ogemei enge wamogemei Yesu Kilisito. ¹⁴ Iyodhingeli dji sambo, te ndenge ekoanaka mbai odji atie owe mbuse e engele maa keke; ¹⁵ kasi inga itidje sikala, laate oyewe ndenge okoki oyasombesi la munguta mo Mwengei enge edjei lingomba e mwengei o mokalo kpaa, likule aleti ema enge eheli omeemene. ¹⁶ Iyowaseli te la ekosako, liyisami e wosatu enanganake la Mwengei edjei osungu : aeneneli la hoho la wenge, wamotangate moto owongi la elimo, aenanali la waahumbwa, wamotiesakolali la witondo, wamondjimelali la moki, akpalamate likolo la dombwa.