¹ Ango ndji seseali Salomo omai monguta mo Yawe, monguta mo likumu, koto la djinge kpaa ibalali inde okeli, ² Yawe amopambwali Salomo la mbala ewale, ndji ndenge emopumbelali inde la Gabeone. ³ Yawe aasali la inde ate: Ioki oyakongi e owe koto la oyatati e owe djinge okelelali mbai, ipamboyi ehele monguta enge emai owe la obati libelankombo e mbai, maiso ma mbai la motema mo mbai ekodjaa ango wiengele kpaa. ⁴ Koto owe, inga osomba liwoso la mbai ndenge esombali sangwa Davidi, la odjangi okeli obe la motema koto la omeemene, la okeli koto sambo kpaa djinge iyohekeleli owe tomaka, inga otemeiya pui dja mbai la witeneli wa mbai wa lisambi, ⁵ mbai ikobata ngbelengo e okumu wo owe likolo la Isalayele la engele enge ei la gbo, ndji ndenge easali mbai eho atie sangwa, Davidi ate: Otidjanga moto ongo okootikalela la ngbelengo e okumu la Isalayele. ⁶ Ase inga ino la wana wanu ohekeleni mbai mokongo, inga otitemeiyakani tomaka dja mbai, koto pui dja mbai djinge iyohekelini, koto inga okeeni owakeleli wamwengei wadji koto omai mauli liwoso lawu, ⁷ ikolongose Isalayele la moki mungo imohekeleli, ikolumba lihele la mbai monguta mungo ipamboyi la kombo e mbai, Isalayele akouma ema e masekpe koto ema esekake ndondo e wato kpaa wa witondo. ⁸ Mu momonguta kouma agudja matikalake. Moto paa ongo okoleka ahue la muho akotikala monoko ohola koto akobinga mweka. Wakoasa ate: Lande Yawe akeli ehele moki koto ehele onguta? ⁹ Wakoasa ate: La ebili ate wamodheeli Yawe, Mwengei owu, ongo opumbesali watata wau la moki mo Ezipito, la ebili ate wayahekeli la wamwengei wadji wamai mauli liwoso lawu, koto wawakeleli, dhenda eho nde Yawe awadjeleseli iwo wungo wodjidji kpaa. ¹⁰ Gbo e wilanga ntuku iwale, Salomo amaali minguta maho miale, monguta mo Yawe koto la monguta mo likumu. ¹¹ Hilame likumu la Tile amohekelel Salomo mite ma sedele koto mite ma sipele, la wolo koto, ndji ndenge edjaakali inde la posa, likumu Salomo amohali Hilame gbata ntuku iwale la moki mo Galileya. ¹² Hilame apumbali la Tile, la okadhengi wagbata djinge imohekeleli Salomo. Ase itimowogeleli, ¹³ aasali ate: Wi wagbata dja nda ndenge wihekeli owe mbai manima? Adjaakali oweli djaho miki ma Kabule, tee la wuse wokeke. ¹⁴ Hilame amotomelali likumu ntalata nkama eesi dja wolo. ¹⁵ Dhenda sikandjo okpomesani wo wato wango wawelanali la okeli otomu la oteteli, wango wawelali likumu Salomo la omai monguta mo Yawe la monguta monde amene la ma mokoli, etutu e Yelusaleme, Hazole, Megido koto la Gezele. ¹⁶ Palao, likumu la Ezipito adjaali opuesi Gezele, alongosali eho, awawolali wato Wakanana wango wadjaakali oyabati la gbata eho. Mbuse amohekeleli la kole e liwala e moseka monde, moli o Salomo. ¹⁷ Salomo koto amaali Gezele, Bete-Hoone e sese, ¹⁸ Waalate, koto la Watadimola la lisobe e moki, ¹⁹ gbata kpaa winge widjaakali wibete wa woisi wiho, winge wiumali wa Salomo,wagbata wa makalo, wagbata wa wato wango wakosumbisaka wapunda, koto la dnge kpaa imowongelali Salomo omai a Yelusalema, la Liba, koto la miki kpaa djinge idjaakali inde likumu. ²⁰ Wato kpaa wango watikalali Wamola, Waheti, Wapeleza Wahebi koto la Wayebusi, watidjaaali wana wa Isalayele, ²¹ wana wau wango watikalali mbuse ewu la moki, wango wana wa Isalayele watiengali waseseli ngoo, Salomo adjaali owaeni nda tuke dja tomu tetelake, tee la wuse wo keke. ²² Ase Salomo atiomali kine nda tuke wana wa Isalayele; laate wadjaakali wato wa wita, koto tuke djande, makumu mande, makumu ma wamasaze wande, makumu mawamakalo mande koto makumu ma wasombesi punda. ²³ Makumu mango Salomo awabatali la tomu wadjaali wato nkama itano la ntuku itano, wanga adjaali awadhendi wato wa tomu. ²⁴ Moseka Palao atelali la gbata e Davidi la monguta monde enge emomeeleli Salomo. La engeleeho nde amaale ma mokoli. ²⁵ Salomo atutiali ohekeli mbala isato la elanga wambeka wa tumbake koto la wa meka wa ookani likolo la etumbeli enge emomeeleli inde Yawe, wadjaakali opumbesi milungu ma mbeka la etumbeli eho, enge edjaakal liwoso la Yawe. Aseselali monguta moho. ²⁶ Likumu Salomo adjaali la wandondoli ongo la Eziyone-Gebele, enge edjei ahue la Elote, kelekele e ewale etanake, la moki mo Edome. ²⁷ Hilame koto adjaakali owatomi tuke djande okakeli watondondoli waho, ebete eikima la tuke dja Salomo, la wato wango wango wango wakowongeleke waandondoli wango waewali ewale. ²⁸ Wakeeli la Opila, okatoti wolo, talata nkama inei la ntuku iwale, wamokpalelali likumu Salomo.