¹ La engele eho, Salomo awabomanesali wiloko wato wa Isalayele, makumu kpaa wa mawota, makumu kpaa ma mawota, makumu kpaa ma wawawa wa wana wa Isalayele atie LIkumu Salomo la Yeslusalema, la otelesi sanduku e ogemeiyani e Yawe olongoyi la gbata e Davidi ongo la Siona. ² La eho pele kpaa dja Isalayele wabolianali la lipati atie e likumu Salomo la ndebo e Etanime, ebali oasi ndebo e nsambo. ³ Ndjongo wiloko wato kpaa wa Isalayele wadjaali, koto wanganga-Mwengei wapotali okpali sanduku. ⁴ Wadjaali, ango wakotelesaka sanduku e Yawe la hema e ogbotononi la wikeleli kpaa mosatu winge widjaali la ndondo e hema eho; wanganga-Mwengei la Walepi wadjaali, ango wakotelesaka eho. ⁵ Likumu Salomo la liboliani liesi kpaa e Isalayele la inde mongindi, wango wadjaali obomani ndenge eokanali iwo la inde, wadjaali liwoso la sanduku wakohekeleke mbeka dja wapalata la wangombe djinge itiengali oewani motio, te la otangani, la ebili ate iyetali ngbii. ⁶ Ndjongo wanganga-mwengei walingesali eogemeiyani e Yawe la ebete ehjo, la mwange e ndondo e monguta, ebete enge eyeti wosatu, la sese e mambulu ma wakeluba. ⁷ La ebili ate wakeluba waho wananolali mambulu mau likolo la ebete e sanduku la mite ma okpali eho likolo. ⁸ Ase mite maho midjaali mailai, ndjongo songosongo e mite maho midjaali oeneni la ebete mosatu liwoso la mwange e ndondo, ase etieneneni saa. Edjaakali ongo tee wuse wo keke. ⁹ Ema teeti edjaali la ndondo e sanduku, longose ndji witanda wiale wa mabukeli winge wibatali Moize ongo la Olebe, ango oklali Yawe ogemeiyani la wana wa Isalayele, ango odjaakali iwo opumbi la moki mo Ezipito. ¹⁰ Ango opumbali wanganga-Mwengei la ebete mosatu, lipata litumali la monguta mo Yawe. ¹¹ Wanganga-Mwengei watiengali oyamali la okeli otomu wou la kole e lipata laho, la ebili ate otwa wo Yawe motumali la monguta mo Yawe. ¹² La engele eho, Salomo aasali ate: Yawe abali oyabati ebete e molili pii! ¹³ Ilongi omai monguta la ebili ate edje ebete e owe e oyabati, e etemia, ebete e owe e oyabati libela! ¹⁴ Likumu akukolali mbanda ende, awadhendia wato, apotali opamboyi liboliani liesi bii e Isalayele ango eyamalali iwo. ¹⁵ Aasali alidji ate: Yawe , wengei o Isalayele apambwane, inde ongo oasali la monoko monde mene la wawa Davidi, aengesi woho la ewo ende mene, ege easali inde ate: ¹⁶ Opoti wuse wo wapumbesali mbai wato wa mbai Isalayele la Ezipeto, itionoli gbata eikima ndondo e mawota kpaa ma Isalayele la omai monguta, la ebili ate nkombo e mbai edje ango, ase imooni Davidi adje likumu la wato wa mbai Isalayele! ¹⁷ Wawa Davidi la motema monde, adjaali la ehoha e omeeli nkombo e Yawe Mwengei o Isalayele monguta. ¹⁸ Yawe aasali la wawa Davidi ate: Nda edjei owe la ehoha la motema mo owe e omeli nkombo e mbai monguta, okelelu olamu, la ebili ate odjei la ehoha eho la motema mo owe. ¹⁹ Nde owe amene otimaa monguta moho, ase monga mo owe ongo okopumba la nsolo dja owe, inde nde akomeele nkombo e mbai monguta. ²⁰ Yawe aengesali loi wonde wungo woasali inde wungo wosali inde ate iyamale la ebete e wawa Davidi, iyabate la ngbelengo e wokumu wo Isalayele, ndenge eyasali Yawe ate ikomeele nkombo e Yawe Mwengei Isalayele monguta. ²¹ Ihekele ebete e obati sanduku atie edjei ogemeiyani wo Yawe, wungo wokelali inde la watata wasu ango odjaakali inde owapumbesi la moki mo Ezipeto. ²² Ndjongo Salomo ayamalali liwoso la etumbeli e Yawe, liwoso la liaboliani liesi bii la Isalayele. Atelisali mawo mande likolo, ²³ aasali ate: Ee Yawe, Mwengei o Isalayele, Mwengei odji ongo odjei nda owe ati ongo likolo te la mbume, te sese e mbume e mbume: Okobaniaka ogemeiyani la motema ma ouma atie tuke dka owe wango wakosombaka liwoso la owe la motema mowu mwesi bii! ²⁴ Owe ongo omoengeseli motuke mo owe wawa Davidi loi wungo womowunelali owe inde, la ndenge ehekeleli owe liwuna laho la monoko mo owe mene, woengi woho la ewo e owe mene, ndenge edjei la wuse wo keke. ²⁵ Sikandjo, ee Yawe, Mwengei o Isalayele, moengesela motuke mo owe wawa Davidi loi wungo womowuneleli owe inde ate: Moto o liwota la owe atidjanga la ngbelengo e okumu wo Isalayele, ndji inga wana wa owe wahue la mboka ewu, inga wasomba liwoso la mbai, ndenge esombali owe liwoso la mbai. ²⁶ Ndjongo sikandjo, iyakongi la owe, ee Mwengei o Isalayele, dhee liwuna la owe linge limowunelali owe motuke mo owe wawa Davidi liengesane! ²⁷ Ase Mwengei! Okoyabata amene la mbume? Dhenda! Likolo, koto lihele ongo likolo mene, liwoengeitiaka owe, ndjongo ekodjaa woni la kole e mu monguta mo mai mbai! ²⁸ La djinge kpaa, Yawe, Mwengei o mbai, bata huaka la oyakongi e motuke mo owe, la oyatati wonde, oka mbelela la oyakongin enge ekowaaselaka motuke mo owe keke. ²⁹ Maiso ma owe madhuhuane madhende mu monguta likolo la wuse, ebete enge eyasali owe ate: Nkombo e mbai ekodjaa ango. Ooka la oyakongi wungo motuke mo owe akoyakongoko la ehele ebete. ³⁰ Ooka oyatati e motuke mo owe koto wo wato wa Isalayele, ango ekoyakongo iwo la ehele ebete! Ooka la ehele ebete ekoyabataka owe, la likolo, oka koto limbesa! ³¹ Inga moto amokelela miino onde obe, moto oho wamolapese ndai enge edjei la bumakolo mbe laate akondje bumakolo mbe djaho, inga adja olapi liwoso la etumbeli, ndondo e ehele monguta, ³² ooka ongo likolo. kela, koto wasambesa tuke dja owe, motolo moto mobe moto mobe, bata wobe wonde likolo la moto monde amene, motolo moto o omeemene moto o omeemene, moputa la otutei moto la omeemene wonde! ³³ Ango ekolonga motone wato wa owe Isalayele, la ebili ate waokeleli lisumu, inga waowongwanela koto watemeiya nkombo e owe, inga wayakongo la owe la oyatati la owe ndondo n e ehele monguta, ³⁴ waoka ongo likolo, limbesa lisumu la wato wa owe Isalayele, wawawongola la mbume djinge iwahekeli owe watata wau! ³⁵ Ango ekonangana likolo, koto ewongo etilwa, la kole e okeleli owe masumu, inga wayakonga la ehele ebete koto wagana nkombo e owe, koto inga watona masumu mawu, la ebili ate okowhekele etumbu, ³⁶ waoka ongo likolo, limbesa masumu ma tuke dja owe koto e wato wa owe Isalayele, wango okowatiesakola mboka elamu enge ekosomba iwo, koto loesa ewongo la mbume enge owekelali wato wa owe lisango! ³⁷ Ango ndjala, ekoni e pese, obitani, ogugi, waapepe e ndenge kpaa epumba la moki, ango motone mowu akowalenga la moki mowu, koto la miluhe mawu , edje odjiake e nda ndenge te koto wikoni e nda ndenge; ³⁸ inga edjaa moto moesi, inga wato kpaa wa Isalayele wakela mayakongi koto mayatati, koto moto la moto ayewia pota e motema monde nanola mawo ma owe la mu monguta, ³⁹ ooka ongo likolo, ebete e owe eyabatake, limbesa, kela, koto wongosela moto la moto la mboka djande, owe ongo oyewi motema mo moto la moto, la ebili ate owe amene oyewi motema mo wana wa wato kpaa, ⁴⁰ koto wakoowanga owe masio kpaa mango madjei iwo la mokalo la moki mungo owahekeli owe watata wasu! ⁴¹ Ango modjidji, ongo oti moto o owe o Isalayele, akodjaa la moki mo lihele, la kole e nKombo e owe, ⁴² laate wakoyewa ate nkombo e owe edjei mosungu, ewo e owe eteteli, ewo e owe enge enanolani, ango ekodjaa inde oyakongi la ehele monguta, ⁴³ mooka ongo likolo, ebete e owe e oyabati libela, mokelela modjidji muho enge ekoongo inde owe, laate wato kpaa wa mbume wayewe nkombo e owe laate wa owange, ndenge wato wa owe wa Isalayele wakowangaka, koto wayewe ate mu monguta mo mai mbai mowelani la nkombo e owe! ⁴⁴ Ango wato wa owe wakopumba osani wita la motone mowu, la otutei moka enge ekowatomaka owe, inga wayakongo la Yawe, maiso odhendji ongo la gbata enge eoni owe koto ongo la monguta mongo mo mai mbai la nkombo e owe, ⁴⁵ Ooka ongo likolo mayakongi mawu koto mayatati mawu, wakelela ndenge ebali iwo. ⁴⁶ Ango wakookelela lisumu, la ebili ate eti la moto tweeti ongo otikelaka lisumu, ango okowamalela iwo koto okowakawa la mawo ma motone, wakoahela la oki la iwo la moki mo motone, lihele inga ahue; ⁴⁷ inga wayawongwanela iwo amene la moki mongu mohelani iwo, inga waowongwanela koto wayatata la owe la moki mo wato wango wakeeli la iwo, koto waasa ate: Tokeli lisumu, towungi, tokeli koto obe. ⁴⁸ Inga waowangwanela la motema mou kpaa koto la molimo mowu kpaa, ongo la moki mo mitone mawu, wango wawakpalali mituke, inga wayakongo la owe, maiso madhendi ongo la gbata enge eoni owe koto la monguta mungo mo mai mbai la nkombo e owe, ⁴⁹ ooka ongo likolo, ebete e owe eyabatake libela, mayakongi djawu koto mayatati mawu, wakelela ndenge ebali iwo; ⁵⁰ walimbesa wato wa owe masumu mawu koto la sambo djawu kpaa dja obuki tomaka djinge ikelali iwo liwoso la owe, kela ate wato wango wawahelwali iwo wawaene iwo wato wato wa ookeli magba, laate wawaokele magba, ⁵¹ la ebili ate wadjei wato wa owe koto lisango la owe, linge lipumbesali owe la Ezipito, ndondo e lolemo la misa. ⁵² Dhuhola maiso ma owe la kole oyatati e motuke mo owe koto la oyatati e wato wa owe wa Isalayele, laate oagemeiyele djinge kpaa wakoongo. ⁵³ La ebili ate owe amene nde owakawanesali iwo la wato wa witondo kpaa wa mbume laate wadje lisango la owe, ndji ndenge eyasali owe la Moize, motuke mo owe, ango epumbesali owe la Ezipito, ee Yawe Likumu. ⁵⁴ Ango eseselali Salomo oasi la Yawe la ehele oyakongi koto ehele oyatati, ayamalali liwoso la hema e Yawe, ebete emaali inde mauli, ananolali mawo likolo. Ango eyamalali inde, apambwali la moli motetelake Isalayele kpaa, la oasi: ⁵⁶ Yawe apambwane, inde ongo ohekeli ohomi la wato wande wa Isalayele, la otutei mauna mdande. La wingbundu wilamu winge wiasali inde la Moize, motuke monde, ema teeti etidjangali okelani. ⁵⁷ Dhee Yawe, Mwengei osu, adje la iso, ndji ndenge edjaakali inde la watata wasu; atitodhee iso koto atitowosane, ⁵⁸ ase akukole mitema masu atie inde laate tosombe la mboka djande kpaa otemei pui djande matio mande koto la witeneli wande wa lisambesi djinge iwaaselelali inde watata wasu. ⁵⁹ Dhee ate wi wingbundu, ema e oyatati e mbai liwoso la Yawe, widje wuse la likolo ahue e Yawe, Mwengei osu, akele engele kpaa loi wo motuke monde wotenane la womeemene koto akele ate loi wo wato wande Isalayele wotenane la womeemene, la otutei ehoha e wuse la wuse, ⁶⁰ laate wato wa witondo kpaa wa mbume waewe ate Yawe adjei Mwengei omeemene. Odji nda inde ati. ⁶¹ Motema mo owe modje moesi kpaa atie Yawe, Mwengei osu, sombani ma matio mande koto la pui djande ndenge edjei wuse wo keke. ⁶² Likumu koto la Isalayele kpaa mongindji la inde wahekeli mbeka ngbii liwoso la Yawe. ⁶³ Salomo wambeka wa wookani djinge iwoongokoli Yawe, ngombe nkoto tuku iwale la iwale koto la mpata nkoto nkama eesi la ntuku iwale, la ebili ate likumu la wana kpaa wa Isalayele wadhuhole monguta mo Yawe. ⁶⁴ La wuse woho, eongokoli likumu asatese awodja wo lopango wungo wodjei liwoso la monguta mo Yawe, la ebili ate eongoki ahekele ongo mbeka dja otumbi la likao la pukapuka la isuki wa maita ma mbeka dja ookani; la ebili ate etumbeli e kuibele enge edjei liwoso la Yawe edjaali ekeke , etiengali la mbeka tumbake, la likao dja pukapuka la wisuki wa maita ma mbeka dja wookani. ⁶⁵ Salomo apotali okeli lipati la engele eho, Isalayele koto eesi bii wadjaakali la inde mongndji, liaboliani liesi lisungu la wat wangowalongali tee ahue ahue e Hamate tee la lobwaku e mkolo mo Ezipito, wabianali liwoso la Yawe Mwengei osu masio sambo la masio madj nsambo, nda masio liomu la manei. ⁶⁶ La wuse wo mwambi awadheeli wato wake. Wamopambwali likumu, mbuse wakeeli la minguta mawu, wakoemeleke koto la mwemu la motema la wolamu kpaa wungo womokeleli Davidi, motuke monde , koto la wato wande Isalayele.