¹ Salomo amaali monguta monde amene la wilanga liomu la isato, ndjongo aseselali monguta monde mwesi bii. ² Amaali yo monguta mo motulu e Liba, edjaali la olai e mapeko nkama eesi, la osungu e mapeko ntuku iata, koto la olondoi e mapeko ntuku isato. Abatali likolo la mikalakala inei ma makule ma sedele, midjaakali la mabaya masungu ma sedele likolo la makule maho. ³ La oumesi maho olamu, wadhihali maho la mabaya ma sedele likolo la mabaya masungu ma oheli motendo mungo modjaali likolo la makule ntuku inei la matano, madjaakali liomu la matano la ngbonda eesi eesi. ⁴ MOnguta muho modjaakali la ngbinda isato, eesi eesi edjaakali la maninisa mango madhendanali la madji. ⁵ Miluhe kpaa koto makule kpaa makelanali la wisuki winge wiengemani, eesi eesi e djinge ngbonda isato, mapokosaka meesi madhendanali la mapokosaka madji. ⁶ Amaaali koto etombo e makule enge edjaakali la olai e mapeko ntuku iata, koto odhohoi e mapeko ntuku isato. Liwoso laho edjaakali la etombo edji ekeke e makule koto ma motendo mwesi liwoso laho. ⁷ Amaali koto monguta engbelengo e okumu, enge ewolani koto monguta e sambesake ebete edjaakali inde osambesi wato, wadhihali witutu djaho la mabaya, opoti la mbume tee la likolo. ⁸ Monguta monde ebete eongoli inde oyabati, la lopango wodji, wodjaali ma lihele e monguta mosambesake, koto minguta maho mikelanali ndenge kikima. Salomo amaali koto monguta modji e ndenge eho la kole e mana o Palao ongo omoikali inde. ⁹ Djinge minguta kpaa ikelanali la mabukeli ma motio mosungu la otutiani wolai la osungu woho, mabukeli mango matenani la ewuni e oteni mabukeli, ndondo koto saa, opoti la mogindele tee la mabukeli ma gboo e etutu, la saa tee la lopango wosungu. ¹⁰ Mabukeli e motio mosungo mabatali iwo la mogindele madjaaali mabukeli masungu, mabukeli ma mapeko liomu, koto la mabukeli ma mapeko mwambi. ¹¹ La likolo, edjaali la mabukeli ma motio mosungu, la otutei wolai la wosungu woho, mabukeli mango walimi, koto la mabaya ma sedele. ¹² Lopango losungu ahue ahue eho, edjaali la mikalaka isato e mabukeli mango walimi koto la mokalakala mwesi mo mabaya masungu ma sedele, ndenge kikima koto la lopango wo ndondo e monguta mo Yawe, la monguta mo olingeleli wo monguta moho. ¹³ Likumu Salomo awatomali wato wake omototi Hilame ongo la Tila, ¹⁴ adjaali monga o moli mwesi ongo ogueli molome la liwota e Napatali, sango adjaakali moto o Tile, ongo odjaakali okeli otomu wo kuibele. Hilame atumali la lokenge , la mayele koto la woewi wo okeli tomu dja ndenge kpaa la kuibele. Aumali liwoso la likumu Salomo, apotali omokeli tomu djande kpaa. ¹⁵ Anangolali kuibele la okelei makule maale,likule liesi lidjaali la wolai wo mapeko liomu la mwambi, eongokoli moliki mwesi mo mapeko liomu la miale la opimi wosungu wo liesi liesi e makule maho maale. ¹⁶ Akelali mito miale ma kuibele mango manangolani, la obati maho la songo songo e makule maho. Moto mwesi modjaakali la wolai wo mapeko matano, koto moto modji wolai e mapeko matano. ¹⁷ La moto e likule liesi liesi edjaakali la wiho winge wakela nda woya, minge wakela la indjota djinge kekekeke, woya weesi weesi edjaakali la wisuki nsambo. ¹⁸ Akelali mikalakala miale e pukapuka e mote mo gelenade ahue ahue e esuki e woya woesi woesi laate edhihe mito minge midjaali la songo songo e makule maho; akelali koto ndjongo la moto e mungo modji. ¹⁹ Mito minge midjaakali la songo songo dja makule ahue e monguta mo olingeli, wakelali maho nda pulele lisi, edjaakali la mapeko manei. ²⁰ Mito maho midjaakali likolo e makule maho maale, solo djaho eyabatali likolo e wihoo winge wakela nda woya, edjaali la pukapuka e mote mo gelenade nkama iwale minge mibatani la mokalakala ahue ahue e moto mwesi mwesi. ²¹ Amalesali makule ma monguta mo olongeleli la tepelo. Ndjongo amalesali likule la ewo e lilome koto ahekeleli laho nkombo Yakine, amalesali alidji likule la ewo e liali ahekeleli laho nkombo Boaze. ²² La songosongo dja makule maho, madjaali la wihoo wakela nda pulele lisi. Ndjongo nde esilali wotumu e makule. ²³ Akelali eiseli esungu e malia la ewonda enge enangoli iwo. Edjaakali nda engbondo , koto monoko muho opoti iyati tee eeti iyati edjaakali la mapeko liomu, opoti sese tee likolo edjaakali la mapeko itano, eongoli koto moliki e mapeko ntuku isato la olingi eho. ²⁴ Sese e monoko e eiseli esungu e malia edjaakali la mikalakala miale e elima e mote mo podho, wilima liomu la lipeko liesi. Wanangolali ewonda e kuibele wakelali eiseli la wilima waho mbala kikima. ²⁵ Eiseli eho eyabatali likolo la ngombe pele liomu la iwale e kuibele. Ngombe isato idhengali nolodi, isato idhengali la elangeli e liwusa wuse, isato idhengali la sudi, isato idhengali koto la elongoli e liwusa wuse, eiseli esungu e malia eyabatali likolo laho, madjondjo maho kpaa madhendali awodja. ²⁶ Wokpondi wo ewonda woho wodjaali wotandu eesi, monoko muho modjaali ndenge ekodjaaka monoko mo kopo, nda pulele lisi. Edjaakali olingeli bati nkoto iwale. ²⁷ Akelali saleti liomu e kuibele. wolai wo saleti eesi eesi wodjaakali mapeko manei, wosungu woho wodjaakali mapeko manei, olondoi woho wodjaakali mapeko masato. ²⁸ Dhenda ndenge ekelali iwo saleti djaho. Idjaakali la manzanza ma miandi, manzanza maho malenganali la walate. ²⁹ La manzanza maho mango malenganali la walate, madjaakali la wasimba, wangombe koto la Wakeluba, wihoo waho koto widjaakali la walate, likolo koto sese e wasimba la wangombe waho, wakelali mbombo dja pulele djinge ikolembeleke. ³⁰ La saleti eesi eesi edjaakali la isombeli inei dja kuibele, la waakesi wa kuibele; wisuki waho winei e litumu edjaakali wiheleli waho. Wiheleli waho widjaakali sese e sani Eesi eesi eho ekelanali la kuibele enge enangolani la mbombo dja pulele. ³¹ Monoko mo sani eho edjaakali la ndondo e lingboka. opoti sese e sani eho tee ebete motole mopoti, edjaakali la lipeko liesi. Monoko mo sani muho modjaakali nda eyalingi, ekelali eyamaleli e lipeko eesi la ndambo, edjaakali la wilima la monoko muho. Manzanza maho ma mianzi eengemanali la wisuki waho inei, ase etiyalingali. ³² Wisombeli waho winei wdjaakali sese e manzanza e mianzi e salio. Edjaakali la wiheleli djinge ihelesali wisombeli waho la salio, koto wosanda e esombeli eesi eesi edjakali lipeko liesi la ndambo. ³³ Wakelali wisombeli djaho nda wisombeli wa likolo. Wiheleli waho la wazatele waho, la waleyo waho koto la wamwaye waho kpaa widjaakali la kwibele enge enangolani. ³⁴ Edjaakali koto la wiheleli winei likolo e matumi manei e salio eesi eesi, wanangolali kuibele wakelali koto wiheleli waho mbala kikima la salio. ³⁵ La likolo e salio edjaakali la lingboka liesi lilingani enge ewosanda woho edjaakali esuki e lipeko liesi. Wanangolali kwibele wakelali koto la mbala kikima eheleli elingboka laho koto manzanza maho e mianzi ma salio. ³⁶ La wihelelo e lingboka koto la manzanza e mianzi e salio akelali wilima e wakeluba, e wasimba koto e mite ma mbila, la otutei ebete eesi eesi enge edjei ohola, akelali koto wilima e lingboka e pulele ahue ahue eho. ³⁷ Ndenge eho nde akelali wasalio waho liomu: kpaa ikelanali ndenge kikima la kuibele enge enangoli iwo, idjaakali la wolai la osungu ndenge kikima, eenganali koto. ³⁸ Akelali koto wassani wisungu liomu wa kuibele. Eesi eesi e eho eengali olingeli wati ntuku inei edjaakali la osungu e mapeko inei. Sani eesi edjaakali la kole e salio eesi eesi wasalio waho edjaali liomu. ³⁹ Abatali wasalio itano ngambo e ewo e lilome e monguta muho koto itano la ngambo e ewo e liali. Abatali koto eiseli esungue e malia la ngambo e ewo e lilome e monguta muho, ongo la sudi-epumbeli e liwusa wuse. ⁴⁰ Hilame akelali wasani ebatelake miwusu ma misa, waangele koto la mabakoli. Hilame aseselali wotomu kpa wungo likumu Salomo amokelesali la kole e monguta mo Yawe; ⁴¹ makule maale, la mito minge wakelal nda libakoli minge midjei gboo e makule maho maale, maeya maale la odhihi mito maho maale enge ekeli iwo nda libakuli enge edjaakali gboo e makule. ⁴² Pukapuka nkama inei dja gelenade la kole e mieya wiale, mikalakala miale ma pukapuka dja gelenade a kole e woya eesi, la odhihi mito miale minge wakela nda libakoli, linge lidjaali likolo la makule maho maale; ⁴³ saleti liomu, la sani sungu liomu likolo la saleti eho; ⁴⁴ Eiseli esungu e malia, koto la ngombe liomu la iwale sese e eiseli esungu e malia maho; ⁴⁵ Sani ebatelake miwusu ma misa, waangele, la mabakuli, koto wikeleli wiho kpaa winge Hilame amokelelali likumu Salomo e kuibele enge wawongela olamu la kole e monguta mo Yawe. ⁴⁶ Likumu adjaakali onangoli eho koto osu eho ndondo e teni e mbume, la moki mo Yolodani, enge edjaakali ndondo Sukote la Zaletane. ⁴⁷ Salomo adheeli winge wikeleli kpaa, atimekeli woliti wo kuibele waho, la ebili ate edjaakali ngbii. ⁴⁸ Salomo akelali alidji wikeleli wadji kpaa wa monguta mo Yawe: Etumbeli e wolo; meza e wolo; la obati makoke mainyake; ⁴⁹ wimaleseli wa miinda e wolo enge elangi, itno la ewo e lilome, itano koto la ewo e liali, enge edjaakali ebete eyeti osatu, mongindji la pulele, la matambe koto la pesi kekekeke e wolo; ⁵⁰ Sani sungu sungu, wihoo wa olimi misa, mabakoli, wakopo la wihoo wa obati misa wa wolo enge elangi, koto la wangelengele e wolo la kole e moluhe e ndondo e monguta la olingeli ebete eyeti wosatu, koto la moluhe e monguta la olingeli la tepelo. ⁵¹ Ndjongo likumu Salomo aseselali otomu kpaa enge eongoli la inde okeli la kole e monguta mo Yawe. Mbuse Salomo akpalali wihoo winge sango Davidi asatisali djaho, abatali palata, wolo la wihoo wadji la ebete e oisi wihooo wa motio e monguta mo Yawe.