¹ Ekelali wilanga nkama la ntuku iwale mbuse e opumbu e wana wa Isalayele la moki mo Ezipito nde Salomo amomaelali Yawe monguta, elanga e nei e wokumu wonde la Isalayele, la ndebo e Zibe, edjei ndebo e wale. ² Monguta mungo likumu Salomo amomaelali Yawe modjaali la olayi wo mapeko ntuku motoba, koto la osungu wo mapeko ntuku iwale, la likolo mapeko ntuku isato. ³ Modhuhe molingelake la tepelo e monguta moho modjaali la wolai wo mapeko ntuku iwale, koto mapeka liomu e olindi ngambo e monguta. ⁴ Likumu akelali maninisa ma monguta la widhiheli mitetelake. ⁵ Amaali alidji monguta mwesi mungo monanganali la etutu e monguta moho ahue ahue, monanganali la etutu e monguta ahue ahue e tepelo koto la ebete eyakongake, akelali koto wamwange ahue ahue. ⁶ Mwange mungo mo sese edjaakali la wosungu wo mapeko itano, enge e wodja edjaakali la wosungu wo mapeko motoba, enge koto esato edjaakali la wosungu mapeko nsambo; la ebili ate awongelali wiiseli e monguta ahue ahue, laate motendo motilingele ndondo e witutu e monguta. ⁷ Monguta moho, ango odjaakali moho omaani, wamaali moho la mabukeli mango mawongelali iwo odjangi okeleli malato, engboma, te koto ekeleli eesi e wiwonda witiokanali engele edjaakali iwo omai monguta. ⁸ Olingeli e wamwange dja sese edjaakali la ewo e lilome e monguta; wadjaakali oteli la ngbolonda e lingake la ngbalando e wodja, koto la ngbalando e wodja la enge e sato. ⁹ Mbuse ende oseseli omai monguta moho, Salomo adhihali monguta moho la mabaya masungu koto la mikalakala ma mite ma sedelle. ¹⁰ Amaali ngbonda djinge ilingali monguta eesi eesi la olondoi e mapeko matano, anangesali koto djaho la mite ma sedele. ¹¹ Engbundu e Yawe emodjeeleli Salomo ate: ¹² Omai ehele monguta! Inga osomba ndondo e pui dja mbai, inga okelela witeneli dja mbai dja lisambi, inga okodhendelaka koto okotutiaka tomaka dja mbai, mbai koto ikoengesa atie owe liwuna linge imohekeleli Davidi sangwa, ¹³ Ikoyabata awodja e wana wa Isalayele, itidhee kine Isalayele wato wa mbai. ¹⁴ Mbuse e osiseli omai monguta, ¹⁵ Salomo awongelali ndondo e witutu e mabaya dja sedele, olongoi la mbume tee likolo; awongeleli koto mite mandondo, awongelali koto mbume e monguta la mabaya ma sipele. ¹⁶ Amaali koto mapeko ntuku iwale la wisuki wa mbuse e monguta moho la mabaya ma sedele, opoti sese tee la mabaya ma motendo, amaelali moho mwange mo ndondo, ebete enge eyeti wosatu. ¹⁷ Monguta moho, ebali oasi tepelo enge edjaali liwoso la moho, edjaakali la mapeko ntuku inei. ¹⁸ Mabaya ma sedele mango mqadjaali odhihi monguta la ndondo madjaali la wilima winge wikelanali nda ikoko koto nda mbombo dja pulele; djaho kpaa widjaakali la mabaya ma sidele, libukeli te liikima litidjaakali oeneni. ¹⁹ Salomo ekelali etumbeli awodja e monguta, laate abate sanduki e wogemeiyani e Yawe. ²⁰ Etumbeli edjaakali la mapeko ntuku iwale e olai, koto mapeko ntuku iwale e olondoyi. Salomo amunolali eho wolo. Akeleli koto liwoso la ebete eyeti osatu hema eesi e mite ma sedele amunolali koto eho wolo. ²¹ AMunolali koto ndondo e monguta la wolo, aetesali koto litambala ndondo e ma mindjota ma wolo liwoso la etumbeli, enge emunolali inde la wolo. ²² Amunolali monguta kpaa la wolo, monguta mwesi kpaa, amunolali koto wolo la hema enge edjaakali liwoso la etumbeli. ²³ Akelali ndondo e etumbeli wakeluba waale e mite ma oliba e motulu, djinge edjaakali la mapeko liomu la olondoi. ²⁴ Mambulu ngambo la ngambo e Wakeluba edjaakali la mapeko itano, enge edjaakali okeli mapeko liomu gbo e mambulu e ngambo eesi tee la gbo e mambulu ngambo edji. ²⁵ Mokeluba ongo odji koto adjaakali koto la mapeko liomu. Wakeluba wahowaale wadjaakali wosungu ndenge kikima koto waenganali. ²⁶ Wolai e mwesi mwesi e Wakeluba waho waale edjaakali e mapeko liomu ²⁷ Salomo abatali Wakeluba awodja e monguta, ongo ndondo. Ananolali mambulu mau: Limbulu e Akeluba mwesi iumali tee la ngambo eesi e etutu, limbulu e enge odji eumali koto tee la ngambo eeti e etutu, mambulu mau madji magbotononoli la gbo gbo djaho awodja e monguta. ²⁸ Salomo awamunolali Wakeluba la wolo. ²⁹ Adhingali wilima e Wakeluba la witutu kpaa e monguta, ndondo koto la saa, adhingali koto wilima wa mite ma mbila koto la pulele. ³⁰ Amunolali wolo la mbume e monguta, ndondo la saa. ³¹ La elingeleli la etumbeli akelali eho la miluhe ma mabaya ma mote ma olibe e motutu, ndenge makule maho mayamalali maengali la etutu eesi enge etano. ³² Miluhe maho maale mikelanali la mabaya ma mote mo oliba e motulu. Adhingali wilima e Wakeluba, mite ma mbila koto la pulele, amunolali koto maho la wolo, ayetesali koto wolo eho likolo la Wakeluba koto likolo la mite ma mbila. ³³ Akelali koto ndenge kikima la moluhe mo tepelo, makule ma mite ma olibe e motulu, djinge idjaakali esuki e nei la ohingi e etutu, ³⁴ koto miluhe maho miale midjaali la mite ma sipele, moluhe mwesi mwesi mikelalanali ma mabaya maale minge mibukei. ³⁵ Adhingali likolo e maho Wakeluba, la wilima wa mite ma mbila, koto la pulele, amunolali maho la wolo. ³⁶ Amaali lopango lo ndondo la mikalakala isato e mabukeli mango wawongela koto la mokalakala mwesi mo mabaya masungu ma mote mo sedele. ³⁷ La elanga enei la ndebo e Zibe, lipoteli e omai monguta mo Yawe mobatanali; ³⁸ koto la elanga e liomu la isato, la ndebo e Bulu, einyei ndebo e mwambi, munguta mosilali la wisuki ndji ndenge eengali eho odjei. Salomo amaali eho la wilanga nsambo.